ای شهید کوی جانان خسرو زمن حسینیم #اربعین_هوشی_تبریزی

اربعین
وداع از کربلا
.
.
.
مرحوم غلامعلی باقری الهامی ( هوشی)
.
.
ای شهیدِ کویِ جانان
خسرو زمن حسینیم
دور اولوبدور اهلِ بیتین
عازمِ وطن حسینیم
.
.
زینبه یارالی قارداش
اول اوزون بو یولدا یولداش
توکمسین عذاره قان یاش
چون دُرِ عَدن حسینیم
.
.
شکرلِلَه اولدی آخربو بلالیه سعادت
گلدیم ایلدیم یارالی قبر پاکیوی زیارت
قورتولوب ولیک وصلت باشلانور زمان فرقت
عازمم حجازه سنسیز ای شه زمن حسینیم
.
.
بولمورم نه چاره ایلوم من بو باره ده برادر
ایلیوب ایکی علاقه قلبیمی زیاده مضطر
بیر سنی سویر بو گویلوم بیرآنام مزارین ایستر
قالموشام ایکی اود ایچره یانه یانه من حسینیم
.
.
گر اولیدی اختیاری قبرین اوسته من قالاردیم
جانکیمی کناره قارداش قبر پاکیوی آلاردیم
دوده آهمیله سایه قبرون اوستنه سالاردیم
گوزدن اشگیمی توکردیم چون دُرعَدن حسینیم
.
.
گر اوزوم علاقه سندن دلده حسرتیم یارالی
آشکاردور کی آرتار درد و محنتیم یارالی
بولورم مزارون اولماز بیرده قسمتیم یارالی
قلبیمی بو غصه ایلر درده مُرتَهن حسینیم
.
.
اولموشام حجازه قارداش اوزگه حالتیله عازم
اشگ چشمدور ندیمیم آه و ناله دورملازم
دلده کی غم و ملالیم ایلیوب بو عزمی لازم
بیر به بیر گیدوب آنامه ایلییم علن حسینیم
.
.
گر منیم نصیبیم اولسا قبر خاتم رسالت
جور و ظلم اشقیادن ایلرم اونا شکایت
هر نه چکموشم بو یولدا بیربیر ایلرم حکایت
سویلیوم نه نوعی اما قالدی بیکفن حسینیم
.
.
قیزلارین حجازه آخر ای شه جهان آپارّام
ظلم شامیدن یارالی جسمیده نشان آپارّام
جدّیمین مزاری اوسته الده ارمغان آپارّام
پاره پاره پیکرون تک قانلی پیرهن حسینیم
.
.
سویلرم جفا دن آخر گلمیشم بابا فغانه
قولّاریمی نیلی ایلوب ضرب ظلم تازیانه
وار هنوز او ظلم لردن پیکریمده بیر نشانه
اولموشام گوره نه نوعی نیلگون بدن حسینیم
.
.
گر بقیعه دوشسه قارداش بیرده باجوون گذاری
اولسا قسمتیم او یرده فاطمه آنام مزاری
ایلرم خجالت اوندا آه و ناله دن هزاری
عندلیب خوشنوا تک باشلارام سخن حسینیم
.
.
شوریله او یرده گللم عندلیب تک نوایه
ایلرم آنامه دورِ روزگاریدن گلایه
رسمیدورجهاندا هر قیز دردینی دیَرآنایه
چون قیزین آنا تک اولماز دردینی بولن حسینم
.
.
غصه دن یوزوم بیر آنی گُلمز آغلارام وطنده
هر قدر وار عمروم آخر سینه داغلارام وطنده
گول عذاریمه سرشگ عالی باغلارام وطنده
گر اولا جهان سراسر گلشن و چمن حسینیم
.
.
«هوشیا» وارون بو شهدن گر اُمید لطف و احسان
یاز حسین آدیله نوحه خدمت ائت او شاهه هر آن
خوش دوشوب ازلکی عنوان بو سوزونله ایله پایان
ای شهیدِ کوی جانان خسرو زمن حسینیم
.
.
.
#سبک_سو_یوخومدی_قزلاروندان … 5 سبک
.
.
#اربعین
#اربعین_وداع
#ای_شهید_کوی_جانان_خسرو_زمن_حسینیم
#هوشی_تبریزی
#ترکی
#زبدةالاشعار