اربعین
وداع از کربلا
زبانحال ام کلثوم(س) به حضرت ابوالفضل(ع)
.
.
.
مرحوم میرزا علی عطار خیابانی (دلخون)
.
.
ای فرات اوسته آخان قوللارینون القانی
بیله ناله ائدرم آغلادارام دنیانی
.
آتامون صولت و سطوتلی علمدار اوغلی
اَسدِ بیشۀ قهرِ غضبِ یزدانی
.
وطنه گئتمه لیدی باجیلارون دور یولا سال
گوزلریمدن توکرم اشک ترِ نیسانی
.
طاقتیم یوخدی آنام ام بنین آلسا خبر
نیه بس گلمدی عباس او غیرت کانی
.
سو کنارینده سنی قبره قویوبلار سببی
خلق بیلسون سوسوز ئولدوردوله بو سقّانی
.
نیزه لرده دولانان باشوه باجون قربان
ای سوسوز جان وئرن الله یولونون قربانی
.
نه اوزیله وطنه یوز چووروم من قارداش
نه دیوم گر دئسه اوغلون آتام عباس هانی
.
شام کیفیتنون شرحینی من ایلمرم
کوفه ده سن دئ جفای ستم عدوانی
.
او حسینون یارالی جانینه آند اولسون کیم
چکمیشم غم او قدر یوخدی دئمک امکانی
.
اوخلانان مشکوی یاده سالوب آغلار چشمیم
چشمه چشمه سو وئرور وردیقیجان مژدگانی
.
باش آچوب شام و سحر ورد ائلرم قارداش وای
دیم عباس گرک دور ائلیم صحرانی
.
وطن آدین دئمگه یوخدی دلیمده یارا
داخی سندن صورا دونسون فلکون دورانی
.
باخورام آب فراته گئنه ده موج ایلر
سالورام یاده علی اصغری عاشورانی
.
اله جام آلدی سکینه دئدی یاندیم سوسوزام
ای وفا کانی عمو گور بو لب عطشانی
.
گلمدی سو اله وئردون قولووی سو اوسته
اَیَری قانلو عقابون دولانوب میدانی
.
اَسدی بیر باد ستم آل علی گلشنینه
قیلدی افسرده گل نسترن و ریحانی
.
اولدی بیر ایل بیزیچون مسجد ویران منزل
نجه ویرانه که یوخ ذلتینون پایانی
.
نه دیوم محنتیمی بسدی سنه اؤز دردون
سن منه آغلا ، سنه من ائدرم افغانی
.
دور گئدک یثربه یالقوز گئده بیلمز کلثوم
بی کسم یوخدی کسیم اکبر و اصغر جانی
.
بارالها به علمدار شهید حرمتینه
جرم «دلخونی» باغشلا چوخ ائدوب عصیانی
.
.
#اربعین
#اربعین_وداع
#ای_فرات_اوسته_آخان_قوللارینون_القانی
#دلخون
#ترکی
#زبدةالاشعار
نظر دهید