تنها ماندن امام مظلوم//مناجات با خدا//سوختن خیام//تکبیر گفتن سر امام در نوک جدا//جمع شدن اطفال بپای نیزه//مفقود شدن دو طفل
.
✍️ #زبدةالاشعار ✍️
.
🆔: @nohe_torki
.
مرحوم حسینی سعدی زمان
.
اهل حقیقت عین بلایه بلی دیر
اهل مجاز لفظ بلا گلسه لا دیر
.
حبّ عالمینده واردی تقرّبده امتحان
محبوب البلاء اودور للولاء دیر
.
معشوق رسمیدور ایدر اور عاشقینه ناز
عاشق حبیبه عشقیده روحین فدا دیر
.
بیگانه ناز دلبره دوزمز محقّقاً
اما بلی بلایه مدام آشنا دیر
.
یوخ قدرت جواب بو رسوای عشقیده
ایتسن سؤال پادشه کربلا دیر
.
بو نکتۀ دقیقه او عالمدی فصل فصل
علّت اودور بلایه بلی برملا دیر
.
عشق عالمینده گور نقدر امتحان ویروب
احسنت او شاه عشقه تمام انبیا دیر
.
جانان یولندا ماملکین ایله ترک ایدوب
محبوب لم یزل او شهه مرحبا دیر
.
توپراقلار اوسته قانه باتوبلار کومکلری
هر کیم باخار او دشت بلایه منا دیر
.
یالقوز -سوسوز -یارالی -کومکسیز -پناهسیز
تکیه ایدوب جداسینه وا وحدتا دیر
.
بو رسمدور که هر کیمه شدّت ایدر بلا
احبابینه گوگل غمینی مطلقا دیر
.
بیرده یارالی نعشلره یوز دوتوب او شاه
قانیاش توکر عذارینه واغربتا دیر
.
گاهی دییر دورون منی یالقیزلیوب قشون
گاهی باخار خیامینه واحسرتا دیر
.
گه عون و فضلی و جعفری سسلر هراینه
واکربتا او وارث قل انّما دیر
.
سسلر حزین سسیله وفالی کومکلرین
وا قلّت المعین امام هدا دیر
.
گه مسلم و حبیب و زهیری ایدر ندا
درد دلین هلاله گهی جابجا دیر
.
گه اوغلی اکبری چاغورور گاه قاسمی
گاهی باخار فراته طرف یا اخا دیر
.
گاهی یوزین دوتوب قوشونا احتجاج ایدر
هل من معین او خامس آلعبا دیر
.
سلطان دین اوجالدوب ا من ناصرٌ سسین
اهل حرم خیامده وا ذلّتا دیر
.
هل من معین صداسینه اولمور جواب ویرن
لبّیک عنایت اوسته گلوبدور خدا دیر
.
.
ای سویگلوم حسین دیمه یوخ یار و یاوریم
لبّیک امروه هامی ارض و سما دیر
.
یالوارما دشمنه من اوزوم ناصرم سنه
اولما ملول لا سوزیوه اشقیا دیر
.
گر بزم یاره گلمه لیسن یاره چوخ گوتور
یارون یارالی گورسه سنی باوفا دیر
.
قوی مهجۀ دلون قیرا اوچ شعبه لی خدنگ
جنّتده گر چه فاطمه وا مهجتا دیر
.
معراج وصل آختارانا نیزه دور براق
کیم رفرف جلالته نوک جدا دیر
.
جدّون آتان آنان باش آچوب گوزلوری یولون
گل – باخما شمر زینبوه ناسزا دیر
.
قوی صورتاً اسیر اولا شمره حرملرون
گر چه اولاره خارجی اهل جفا دیر
.
حوریّه لر یول اوستینه گیسولرین سالوب
باخ فرش راهه گور سنه کیم خوش صفا دیر
.
آغزوندان اوخ وروبلا دولانمور اگر دلون
اوخلار سنون دلونجه منه چوخ ثنا دیر
.
مرآت حق نمادی یوزون -گر چه قان دوتوب
عالم بو وجهه آیینۀ حقنما دیر
.
باشون قلجلانوبدی آتان مرتضی کیمی
یرده حسین گوی اهلی سنه مرتضی دیر
.
سن مندن اوتری ماملکون ویرموسن بو گون
عین ولادی عشقوه کیم ابتدا دیر
.
منده تمام ماملکیمدن گیچم گرک
اهل جهان بو عالمه بیع و شرا دیر
.
باش ویرسن ایلسن اگر اسلامی سربلند
اسلامیان مدام سنه مقتدا دیر
.
باخما ئولوبدی قارداشون عبّاس علم یاتوب
صاحب لوای حمد اونا صاحب لوا دیر
.
روز جزاده تاج شغاعت باشوندادور
این الحسین اهالی روز جزا دیر
.
چوخ تشنه سن حسین قورویوبدور دوداقلارون
آغزوندا خشک اولان دلون الماء ما دیر
.
عالم سنون بهشت سنون کوثریم سنون
گر چه سو ایستینده سنه شمر لا دیر
.
حور و ملک سنون بو هامی ماملک سنون
یا لیت کنت حزب حسین اصفیا دیر
.
ارض و سما سنون بو هامی ماسوا سنون
اعطیت هر نه فکره گله ذوالعلا دیر
.
عرش و سمک فلک سنون حتّی اوزوم سنون
ذاتین سنه سنی یارادان خونبها دیر
.
قوی عالم وله ده قالا شاه کربلا
گور خیمه ده سکینه نجه وا ابا دیر
.
قطع الوتین امامی قیلوب تیر زهردار
الده عمامه وا ولدا مصطفی دیر
.
آتدان دوشوب ترابه عزیز ابوتراب
درد دلین حبیبینه ایلر ادا دیر
.
عرض ایلر ای خدا بو حسینون بو کربلا
احسن وفای عهدیمه گور ماسوا دیر
.
عنقای قاف وحدتم اوخدان پر آچموشام
هر کیم گورنده بال و پر آچموش هما دیر
.
قانیم تراب کرب و بلانی گل ایلیوب
بو قانلی تربته هامی خاک شفا دیر
.
زینب گلوب نوایه دییر وا محمّدا
وا زینبا بهشتده خیرالنسا دیر
.
عریان یارالی اوچ گیجه بی غسل و بی کفن
قالسام خوشام حسین رضاً بالقضا دیر
.
باشیم جداده کوفه و شامی دولانماسا
زینب گیدنده شامه کیمه رهنما دیر
.
هر کیم حسینه اولسا (حسینی) علاقه مند
صدقاً شهادت امرینه یا لیتنا دیر
.
طرز کلامی ملهم غیبی دولاندوروب
بو یرده منطقیم بیر عجب ماجرا دیر
.
///مفقود شدن دو طفل///
.
چون امر حتم ختمه یتوب ئولدی پادشاه
گون قاره پرده سالدی یوزه یاندی بارگاه
.
قان ایچره آفتاب امامت ایدوب غروب
برج حیا نجومی بساط عزا قوروب
.
گون باتدی آی دوتولدی چخوب پرده دن نجوم
یاندوردی هاشمیّه لری شعلۀ رجوم
.
یاندی یانان قالانلار اسیر اولدی دشمنه
گلدی مخدّرات حرم داد و شیونه
.
سجّاد عمامه الده دیوب وا مصیبتا
زینب الینده زلفی دئدی وا فضیحتا
.
یاندی خیم سویولدی حرم گیتدی عزّ و جاه
بیر کیمسه فاطمیّه لره اولمادی پناه
.
آل عبا قالوب نه گونه وا محمّدا
باشه سالوبلا هر بیری بیر مندرس عبا
.
فکر ایتمین او حالی محال امردور بُوله
بیر بیر چادردان عورت اوشاخ یوز قویوب چوله
.
باشدا عبا قاچاندا چوله بانوان دین
آت سالدیلار خانملارین آردینجا اهل کین
.
خوردا اوشاخ گورنده گلور آتلی بی درنگ
خوفه دوشوب قاچاردی ووراردی عبایه چنگ
.
قورخاردی آتلو گلسه وورا معجرین آلا
ناموس پرده سینده قالان باش آچوخ قالا
.
اهل حرم داغلدیلا صحرایه با فغان
پنهان اولوبلار هر بیری بیر یاندا قورخودان
.
هریاندا گوردی خار مغیلان مخدّرات
گیزلندی سایه سینده مبادا گوره عدات
.
سعد اوغلی باخدی گوردی داغیلدی چوله حرم
یوز دوتدی شمره سویلدی اولشوم بدشیم
.
چاره ندور داغیلدی چوله آل بوتراب
هاردان تاپوب یغاق ایلیاخ بستۀ طناب
.
فرمان یازوب منه بلوسن کوفه دن امیر
ئولسه حسین اهل و عیالین ایدم اسیر
.
ویردی جواب شمر ستمگر او کافره
ایمدی قاچانلاری یغارام جمله بیر یره
.
سلطان دین باشین گتوروب ووردی نیزیه
گتدی تمام انفس و آفاقی لرزیه
.
گچدی جدایه سرّ حقّین رأس انوری
اوج ایتدی عرشه نالۀ الله اکبری
.
آندوردی اهل بیتینه ایمائیله سوزین
آچدی جدا باشندا ایکی قان دولان گوزین
.
باخدی صاقا صولا بوئیدی عین مطلبی
گورسون بتوله نایبه مظلومه زینبی
.
یعنی آنام باجی باشوا یغ حرملری
چوللرده قویما قالسون عیال پیمبری
.
شامه کیمی حرملریمون ترکین ایتمرم
سیز گلمه سوز دالمیجا باجی شامه گیتمرم
.
حیران باخاردی هر طرفه قانلی گوزلری
تکبیر صوتی یغدی بنات پیمبری
.
شرق جدادن ایتدی طلوع آفتاب دین
یوز قویدی نیزیه طرف اطفال مه جبین
.
بدر تمام تک باشی تا اولدی جلوه گر
آی دوره سینده هاله وروبلار ستاره لر
.
بی امن لر امان آپاروبلار امان یره
بیربیر قاچان قایتدی یغشدی همان یره
.
آل علی فغانی سماواتی داغلادی
هر کیم گلوب یخلدی جدانی قوجاقلادی
.
یردن اوجالدی ناله سسی عرش طاقینه
اهل حرم دوشندیله نیزه ایاقینه
.
توکدی خانملار عارضه گوز یاشی آغلادی
یرده حرم جداده حسین باشی آغلادی
.
اوج ایتدی آل حیدرین افلاکه شیونی
زینب خصوصاً آغلادی آغلاتدی دشمنی
.
عرض ایلدی حسین سنه بو زینبون فدا
قویمولّا بیر دویونجا ایدم ناله و نوا
.
باشدان آلوبلا معجریمی سنگ دل سپاه
قمچی سالوبدی باشیمه بیر معجر سیاه
.
هر قدر اینجیده وورا بو لشگر لئام
هیهات من ئولونجه حسین سندن آیریلام
.
چولدن یغوب بالالاروی بیر بیر آغلارام
گلّم دالونجا شامه کیمی سینه داغلارام
.
اوز قولینه بو حالده بیر امتحان ویروب
مدّ نظرده بیر به بیر اطفاله سان ویروب
.
اوّل حرملری ایلیوب بیر به بیر ندا
دوتقون سسیله هر بیری تک تک ویروب صدا
.
اوندان اوشاقلاری چاغوروب ویردیلر جواب
سس گلمدی ایکی بالادان اولدی دلکباب
.
فرمایش ایتدی غیظیله بیرحم دشمنه
بو قانلی باش بالالارینی تاپشوروب منه
.
دیّار قویمارام بو بیاباندا من قالا
بو دشتیده تاپولماسا گر بو ایکی بالا
.
سعد اوغلی گوردی زینب کبرانی خشمناک
بُلدی باش آچسا لشکر شامی ایدر هلاک
.
ایتدی خطاب لشگره اول شوم زشت خو
فوراً گیدون ایدون او ایکی طفلی جستجو
.
وقّاص زاده لشگره تا ایلدی خطاب
تاپماقلیقا ایکی نفر آتلی ایدوب شتاب
.
آت سالدیلار صاقا صولا چوخ اضطرابیله
آختاردیلار او دشت بلانی شتابیله
.
حیران گزوبله هر طرفه ایتدیلر گذر
اصلا گورونمدی او ایکی طفلدن اثر
.
بیر تلّین اوستنه یتشوبلر همان زمان
مفقود لردن اولدی نمایان او دم نشان
.
ایلر او حال صخرۀ صمّا اولا اثر
گوردی سواره لر ایلین وقتده نظر
.
گوزدن همان ایکی بالا عالملری آتوب
توپراقلار اوسته هر ایکیسی قول بویون یاتوب
.
یورقون دوشوب یاتوب او ایکی طفل گلعذار
افسرده گل کیمی بوریوب یوزلرین غبار
.
آتلار دوشونده چوخ یورولوب خسته دل یاتوب
سنبلدی ساچلاری دیه سن توپراقا باتوب
.
قلب اودلانوب شرار عطشدن ز بس یانوب
گوز یاشلاری آخوب سو کیمی توپراق ایسلانوب
.
نم تربتیله سوز عطش بلکه اسگیله
مکبوبتاً یاتوبلا اورک چسپ اولوب گِله
.
تا آتلولار اوزاقدان او حاله ایدوب نظار
بو ما وقع اولاردان ایدوب سلب اختیار
.
دشمن یانوب او حاله – نجه شیعه یانماسون
آتدان انوبله تا یاتان اطفال اویانماسون
.
سویلوبله بیربیرینه یاتوبلار اویاتمیاخ
آهسته پاپیاده گیداخ سس اوجاتمیاخ
.
آت شیهه سی ایشتسه اویانسا بو ایکی زار
قورخالّا آتلی گورسله ایللَّه آه و زار
.
آهسته گلدی اول ایکی آتلی همان یره
شرح ایلرم اگر منه اشگیم امان ویره
.
دلدن اورک گوزی اولارین حالینه باخور
احوالیمی پوزور یوزیمه گوزیاشیم آخور
.
گوردی او آتلولار دله یوز ویردی اوزگه سوز
توپراقلار اوسته هر ایکیسی جان ویروب سوسوز
.
هر آتلی گوتدی سالدی آت اوسته بیرین او دم
فی الفور گتدیلر اولاری تا گوره حرم
.
بنیان صبر زینبی غم ووردی بیربیره
نیزه یانندا گتدیله تا قویدولار یره
.
اهل حرم گوروبله ئولوب بو ایکی بالا
باشه وروبلا باشلادیلار تازدن نوا
.
من بولمورم نه حاله قالوبلار خدا بولر
بو ذلّتیله هانسی یتیمه بالا ئولر
.
زلفین یولوب او حاله باخوب عترت امام
اول غملی حاله دشمن و دوست آغلادی تمام
.
بو محنتی زبان قلم ایلمور ادا
دوندر «حسینی» مطلبی یاز اوزگه ماجرا
.
.
.
#حسینیه_سعدی_زمان
#حسینیه_شهادت
#غارت_خیام
#اهل_حقیقت_عین_بلایه_بلی_دیر
#ترکی #کنزالحسینی2
.
✍️ #زبدةالاشعار ✍️
.
🆔: @nohe_torki
نظر دهید