شهادت حضرت امام حسن (ع)
.
✍️ زبدة الاشعار ✍️
.
🆔: @nohe_torki
.
مرحوم سید احمد یاسر نجفی (ثریا تبریزی)
.
ای غمکشیده خواهریم
آچ گوزلرون زینب اویان
زهریله یاندی لبلریم
آچ گوزلرون زینب اویان
.
.
دور گور نجه بو چرخ دون
ایلر منی سندن کنار
جور و جفای جعده دن
بو دل دوداقیم اودلانار
تاثیری وار قلب اود دوتوب
بیر پارچا آتشدور یانار
سوندورموری اشک تریم
آچ گوزلرون زینب اویان
.
.
بیر باد ظلم اسدی باجی
یکسر پوزولدی گلشنیم
ایچدیم سویی سیراب اولام
اود دوتدی یاندی خرمنیم
بیرده آچیلماز بولموشم
گلشنده سرو سوسنیم
سولدی سارالدی گللریم
آچ گوزلرون زینب اویان
.
.
ازبس باجی خرسند ایدر
بو دعوت جانان منی
یاریم ضیافتخانه ی
عشقه ایدوب مهمان منی
زلف نگاریم گورسنور
هردم ایدر حیران منی
حسرتله آغلار گوزلریم
آچ گوزلرون زینب اویان
.
.
باجی آییلسان خوابیدن
معلوم اولار حالیم سنه
گل صاحبی ایلر علاج
آفت دوشنده گلشنه
ای من غریبه باغبان
دور چاره ایله سن منه
ای جانشین مادریم
آچ گوزلرون زینب اویان
.
.
ازبسکه دل تشویق ایدور
لرزه دوشوبدور جانیمه
سرّی اودور بو نوعیله
باعث اولور افغانیمه
دور بی پدر اطفالیمی
جمع ایله باجی یانیمه
موجه گلوبدور غملریم
آچ گوزلرون زینب اویان
.
.
دور ویر خبر قارداشیمه
بولسون منیم احوالیمی
ویرسون تسلّی قلبیمه
سیلسون بو اشک آلیمی
گورسون نجه دورِ فلک
قویدی یتیم اطفالیمی
اولسون حسینیم یاوریم
آچ گوزلرون زینب اویان
.
.
دور پرشکسته قوشلارا
آماده ایله بیر قفس
قاسمله عبداللهیمه
عبّاسیم اولسون دادرس
تنگ اولیدی میر قافله
باجی دوشوب سسدن جرس
قوینومدا قالدی اللریم
آچ گوزلرون زینب اویان
.
.
بو شاهراهی ای باجی
جدّیم بیزه ویردی نشان
ظلمیله مسموم ایتدیلر
پیغمبری بو کوفیان
حیدر قلجلاندی، حسن
زهریله اولدی باغریقان
قورتولمیوب محنتلریم
آچ گوزلرون زینب اویان
.
.
یرده حسینی ای باجی
قوم کین ایلر بندبند
باشی اوجالسا نیزیه
اسلامی ایلر سربلند
دردینده قارداشیم ایدر
دنیانون اهلین دردمند
آغلار «ثریّا» نوکریم
آچ گوزلرون زینب اویان
.
.
.
#سبک_ای_شاه_مظلومان_حسین (5 سبک متفاوت سینه و زنجیر و … )
.
.
#حسنیه_شهادت
#ای_غمکشیده_خواهریم_آچ_گوزلرون_زینب_اویان
#ثریا_تبریزی
#ترکی
.
✍️ #زبدةالاشعار ✍️
.
🆔: @nohe_torki
نظر دهید