شهادت حضرت زهرا سلام الله علیها
.
.
عندلیب تبریزی
.
.
سس دوشدی که تار اولدی شب تار مدینه
قان آغلادی یکسر در و دیوار مدینه
.
یعنی که علینون الی درماندان اوزولدی
یومدی گوزونی حشره جه بیمار مدینه
.
بیر قاره چکوب فاطمه نین نعشینون اوسته
آچدی باشینی سید ابرار مدینه
.
بیر سوز دیدی آهسته نه سوز ، سوز دیماق اولماز
اود توکدی یره انجم و سیار مدینه
.
یخدین ایویمی سن دیدی زهرا نه یاتوبسان
اولدوم داخی مین درده گرفتار مدینه
.
سن اولماسان ای یار علی کیم آچاجاق بس
بیرده قولومی باغلاسا اشرار مدینه
.
دوزمزدین عزیزیم گوره سن آغلور حسینون
دور گور نجه آغلور گل و گلزار مدینه
.
گوردی دولانیر ائو باشینا اگلشه بولمور
تِز صحنه چخوب حجّت دادار مدینه
.
ناگه قاپودا گوزلری میخ دره دوشدی
یومدی گوزونی دیده سی خونبار مدینه
.
هیچ کیمسه نی دنیاده غریب اولماسین آلله
یار آختاریری غم گونی بی یار مدینه
.
یوز دوتدی حسینه دیدی مقداده خبر ویر
تا بولمویه زهرا ئولوب، اغیار مدینه
.
مامور حسنی ایلدی سلمانی چاغیرسین
فورا گله اول یار وفادار مدینه
.
سلمان نگران ائوده اوتورموشدی علیدن
پوزموشدی حالین فتنه اشرار مدینه
.
گوردی که دوگولدی قاپی هولیله آچاندا
بیر منظره گوردی او دل افکار مدینه
.
رنگی حسنون برگ خزان تک سارالوبدور
گوز یاشی توکور جدینه اوخشار مدینه
.
آغوشینه آلدی دیدی جانیم سنه قربان
سیل گوزلرین ای منشاءِ اخیار مدینه
.
زهرا سنی گوزدن بالا قویمازدی کناره
اولدون گجه وقتی نیه سیار مدینه
.
بو سوزده ئورکلندی دوتوب بغض گلوسین
عرض ایلدی اول صاحب گفتار مدینه
.
ئولدی آنامیز بیزده یتیم اولدوق عمو جان
ایستور سنی دیداره یتیمدار مدینه
.
بولمم که نه چکدی علی سلمان گلینجه
حاصل جمع اولوب بیر یره احرار مدینه
.
یدّی نفریله گجه نین یاری او ائودن
قبره گیدوری عبد سزاوار مدینه
.
تابوتینی یردن گوتورنده او غریبون
ووردی باشینا زینب او غمخوار مدینه
.
عرض ائتدی آنا سن گئدیسن بیر گونی اما
زینب اولاجاق قافله سالار مدینه
.
اولدی ایکی مداح بو اشعاریمه بانی
خوشدور دیدولر نظم اولا اشعار مدینه
.
قسمت ایله یارب بو ایکی نوکر زهرا
باهم یازانینان اولا زوار مدینه
.
.
#فاطمیه_شهادت
#سس_دوشدی_که_تار_اولدی_شب_تار_مدینه
#عندلیب_تبریزی #فاطمیه
#ترکی
#زبدةالاشعار
نظر دهید