شهادت حضرت علی اکبر(ع)
..
..
مرحوم ناطق اردبیلی
..
..
ای قانه باتان ظلمیله مه پیکریم اکبر
قربان اولا قانلو گوزوه گوزلریم اکبر
..
..
زلفون داغیلوب قانه باتوب دسته به دسته
چوخ نیزه دگوب خنجر ایدوب جانوی خسته
بی غسل قالوب گل بدنون قوملارون اوسته
بو گوزدن آخان یاشیله غسلین ویریم اکبر
..
..
قانون قوریوب یاره لرونده گله اوخشار
اوخلار قیزاروب قانوویلن سنبله اوخشار
ذی حقّیدی لیلا سنی بو نحویله اوخشار
ناکامیم اوغول صورت پیغمبریم اکبر
..
..
گون شعشعه سی یاره لی سینونده نمایان
یاروندن آخان قان کیمی قلبیمدن آخار قان
جان چیخماز علی نعشوی لیلاگورر عریان
گون یاندیری قوی نعشوه زلفیم سریم اکبر
..
..
گر دهریده تطبیق اولونا محنت نسوان
ما فوقى منم، یوخدو منیم تک ایوی ویران
دنیا غمی بیر قطره دی لیلا غمى عمان
سرلوح جهان اولدی منیم غملریم اکبر
..
..
گتدوم سنی نه زحمتیلن حدّ کماله
طوی ایلمدیم تا یته سن سنده وصاله
حاشا بو سرآمد بالا گلمزدی خیاله
قالدی اورگیمده هامی نسگل لریم اکبر
..
..
داغون چکیلوب سینه مه ای شبه پیمبر
نقاش او کسدور که قویوب حلقوه خنجر
بیر نکته دی درک ایتسه جوان اوغلی ئولنلر
قانونله مُحنّادی بو گیسولریم اکبر
..
..
شیرین دیلیلن سن چاغیراندا آنا لیلا
هر کلمه وه جان سؤیلمیشم ای قد رعنا
گوز یاشمیلن یاره وه گر اولسا مداوا
هر یاره وه مین قطره دی اشک تریم اکبر
..
..
دنیانی آتوب عزم بقا ایلدون اوغلوم
لیلایه عزاخانه بنا ایلدون اوغلوم
صبحیم ایشقین لیل دجا ایلدون اوغلوم
ای عمری سحر اولدوزونا بنذریم اکبر
..
..
آلدون او زمان که شه عطشاندان اجازون
بیلدیم بلشور قانه سنون خلعت تازون
گلدی ایله که خیمه لره قانلو جنازون
برپا او زمان اولدی منیم محشریم اکبر
..
..
هر ایل که گلور ظاهره اوضاع محرم
برپا اولونور محنت ایچون مجلس ماتم
«ناطق» که یازار محنت دشت غمی هر دم
زینت سنون آدونله تاپار دفتریم اکبر
..
..
..
#اکبریه #ناطق_اردبیلی #اکبریه_شهادت #ترکی #زبدةالاشعار
نظر دهید