کوفه
سؤال وجواب حضرت زینب (س) با سر مبارک امام حسین (ع)
..
..
..
..
مرحوم ذاکر مراغه ای
..
..
..
..
//زینب//
ای لاله کیمی قانه باتان باش باجون ئولسون
آچ قانلی گوزون باخ منه قارداش باجون ئولسون
..
بیر باشدا که قارداش اولا بیر بیله جراحت
مطبخده کول اوسته یاتار آیا نجه راحت
یاتدون نجه مطبخده سن ای شمس امامت
ای ماه تمام اوّل شبده نیه باتدون
آخر یارالیدون کول ایچینده نجه یاتدون
..
..
..
..
//امام//
چوخ آغلاما پوزما منیم احوالیمی زینب
بو قانلی یوزومدن گوروسن حالیمی زینب
..
ائو صاحبی مهمانه ائدر لطف و کرامت
لازمدی یاتاندا یرینی ایلیه راحت
خولی ده ولیکن یوخیدی بسکه لیاقت
کول اوسته جگر قانیمى گوز یاشینه قاتدیم
قویدوم یوزیمی حسرتیله کوللره یاندیم
..
..
..
..
//زینب//
مطبخ که حسینجان سنه بیت الحزن اولدی
آیا دی گوروم یانوه هئچ بیر گلن اولدی
یا قانلی کولی قانلی یوزوندن سیلن اولدی
هئچ صبح آچلینجا گئجه نی یاتمامیشام من
بیر لحظه نظردن حرمون آتمامیشام من
..
..
..
..
//امام//
خولی باجی جان دینینی دنیاسینه ساتدی
قویدی منی مطبخده اوزی قصریده یاتدی
یاتمیشدیم او حالیله آنام گلدی اویاتدی
سسلندی حسین عترتوی گوزدن آتوبسان
پیغمبرین اوغلى نیه مطبخده یاتوبسان
..
..
..
..
//زینب//
نه حالیده گوردون آنامی ای شه خوبان
شرح ائت باجووا شادیدی یا حالی پریشان
آیا آنامون حالی نجیدی سنه قربان
سینمیش قولون آیا یارالی سینه ده گوردون
سنله دانیشوب گولدی و یا غمزده گوردون
..
..
..
..
//امام//
ای مهر و وفاده منه زهرایه برابر
زهرا یوزی گولمز نقدر وار بو ستملر
پهلوسینه قویمیشدی الین زار و مکدر
ناراحتیدی چوخ در و دیوار اثریندن
اوپدیم یارالی سینه ده مسمار اثریندن
..
..
..
..
//زینب//
گر اولسا جدادن باشووی اگماقا امکان
اگ پاک ائلیوم قانینی ای سرور دوران
دشمن نیه گورسون یوزیوی قانیله الوان
زلفیمله سیلم مه یوزیوی دوشمه خسوفه
شاید سنی گورسون تانیسون ملّت کوفه
..
..
..
..
//امام//
سیلمه یوزیمین قانینی ای منبع عصمت
بو قاندی منه شاهد و عنوان شفاعت
حشره یوزی قانلی گلرم روز قیامت
الده یارالی باشیمی عنوان ائدرم من
بو قانیله چوخ دردلره درمان ائدرم من
..
..
..
..
//زینب//
سنسن یارالی نیده کسیک باشلارا رهبر
باشوز ائلیوب کوفه نی پر نور و معطر
سقا باشی اما آرادا یوخدی برادر
چوخ آختاریرام ماه بنی هاشمی قارداش
دؤزمور اوره گیم ایستوری قارداشیمی قارداش
..
..
..
..
//امام//
هیچ کس اونون احوالینی مندن صورا بولمز
بیر باش که او حاله قالا نی ده دورا بولمز
قاتل اونی چون گوردی جدایه وورا بولمز
قویدی یارالی جسمینی میدان آراسیندا
شامه گئدیر اما باشی قلخان آراسیندا
..
..
..
..
//زینب//
قرآن سسیوی کسمه برادر قولاقیمدان
حالین بولورم قزلاریوین اوز سیاقیمدان
ایستور اوزین آتسون بو رقیه قوجاقیمدان
دؤزمور بالا قزلار داخی یوخ چاره محلی
قرآنیله وئر عترت اطهاره تسلّی
..
..
..
..
//امام//
قرآن اوخویاندا وورور اعدا من زاری
قرآنیله یوخدور بو گروهین سر و کاری
سن ناقه ده لای لای دئ رقم یاتا باری
ناراحت اولار قویما جداده منه باخسون
دیندیر گوزینون یاشینی سیل قوی سنه باخسون
..
..
..
..
//زینب//
دشمن سنی مظلوم ائلدی کامینه چاتدی
بیگانه خیانت الین اسلامه اوجاتدی
قرآنی شهید ائتدیله قرآن سسی یاتدی
تنها بوئیدی دلدہ کی مقصودی یزیدین
پامال ائده احکامینی قرآن مجیدین
..
..
..
..
//امام//
ظالم باجی مین ایل یاشاسا کامه چاتانماز
هنداوغلى داخی بیر گئجه آسوده یاتانماز
قرآنیمون احکامینه خائن ال آتانماز
هر حالده من حامی قرآن مبینم
تفسیر ائلین قانیله قرآنی حسینم
..
..
..
..
//زینب//
بیر گونده داغیلدی هامی یاور باشیمیزدان
قمچی ووروری ایمدی بو لشگر باشیمیزدان
هاردیدون او گون آلدیلا معجر باشیمیزدان
الله بولوری حاضرم هرگونه عذابه
اما دگولم راضی بو جور کشف حجابه
..
..
..
..
//امام//
سندن باجی جبریله قشون معجر آلاندا
جان اوسته چالوردیم ال ایاق قرمزی قاندا
باش سجده ده جان سینه ده قلبیم ضرباندا
چوخ سعى ائلدیم تا گلم امداده او ساعت
افسوس دیزیمده یوخودی دورماقا طاقت
..
..
..
..
//زینب//
باشون کسیلندن صورا ای مهر ولایت
گون باتدی گئجه گلدی دوتوب عالمی ظلمت
من خیمه ده مشغولیدیم اطفاله او ساعت
کیم نیمۀ شب یاد ائلیوب یانیوه گلدی
کیملر دئ گوروم شام غریبانوه گلدی
..
..
..
..
//امام//
سن گئتدون آنام گلدی الینده قره معجر
قارداشیم حسن گلدی آتام ساقی کوثر
سالدی اوزینی سینه مه حسرتله پیمبر
بجدل یتیشوب مقصده چاتماقه تلسدی
چیخموردی اوزوک دؤزمدی بارماقیمی کسدی
..
..
..
..
//زینب//
ایکاش نظامات جهان منحل اولیدی
نه شمر نه خولی نه بو گون بجدل اولیدی
بارماقوى قطع ایلین اللر شل اولیدی
بیر ال که چکردون فقرا باشینه هرآن
کیم کسدی بیلکدن اونی زینب سنه قربان
..
..
..
..
//امام//
قویماز باجی بو قانلاری یرده ید قدرت
بیر گون گلی دنیانی دوتار صوت عدالت
ظاهر اولاجاق مهدی موعود امامت
نیروی عدالت یخاجاق ظلم بناسین
ظالم گوره جاق ظلمتون البته جزاسین
..
..
..
..
جهد ایله «کریمی» اولاسان اهل حقایق
تا یازدیقون اشعار اولا فعلونله موافق
گورسونله سنی منصب نوکرلقا لایق
سعی ائتمه آدون شعریده دلدن دله دوشسون
دلدن دله جاری ائله قوی سؤز دله دوشسون
..
..
..
..
#کوفه #ذاکر_مراغه_ای #ترکی #زبدةالاشعار
نظر دهید