صوری مسلمان اولمیون
.
.
مرحوم رجایی تبریزی
.
.
ای مسلمانلار گلون صوری مسلمان اولمیون
سوء تبلیغات لردن سست ایمان اولمیون
.
.
خوش یاشار عالمده هر کیمسه که خوش پیمان دور
عهدوزی سیندرمیون پیمان شکن شیطان دور
چکمیون اسلامیدن اَل ناسخ ادیان دور
دینوزون قدرین بولون هرگز پشیمان اولمیون
.
.
باخمیون ناحق سوزه حق جادّه سیندن چیخمیون
اوز الوزله بو گوزل دینون بناسین یخمیون
منجنیق غمده پیغمبر وجودون سیخمیون
صاحب دین قلبنه بیر تیر و پیکان اولمیون
.
.
ای جماعت دین مدیر عالم امکان دور
دینینه عامل اولان خوشبخت بیر انسان دور
ایلِین اغوا سیزی آدم صفت شیطان دور
گوزلیون توغلانمیون بی دین و ایمان اولمیون
.
.
دین دیمور ترک ایلیون دنیانی، سیز دنیا ندور
دین دیور بیدار اولون بو غلفت بیجا ندور
ساتمیون اعلانی ادنایه عبث سودا ندور؟
ایله سودا ایلیون مشمول خسران اولمیون
.
.
اهل قرآنسوز اگر انکار آیات ایتمیون
بو گوزل احکام دینی بیر خرافات ایتمیون
یخماقا دینین اساسین چوخ مباهات ایتمیون
ای جماعت منکر آیات قرآن اولمیون
.
.
آیۀ «اَمّن یجیبُ» مشکلاتی ایتسه حل (1)
مقصده یتمز ولیکن هر دغل باز و دغل
اهل قرآنه اوغول لازمدی اولسون خوش عمل
اولماسوز قرآندن، جویای درمان اولمیون
.
.
صاق صولا باد صبا تک اَسمه ای مرد خریف
اوز مرامین بوشلاماز دنیاده بیر شخص شریف
گوزلیون قوربانوز اولّام چوخ قوی دور بو حریف
جهل اوزیله تابع ابلیس و شیطان اولمیون
.
.
باخمیون توولانمیون چوخ سوز دیر هر بیر گلن
قویمیون دولسون بو باغ و گلشنه زاغ و زغن
شیوۀ ایمانیدن محسوب اولوب حُبُّ الوطن
چکمیون ال بو وطندن خانه ویران اولمیون
.
.
دین یولوندا سعی ایدون ای شیعۀ اثنی عشر
قویمیون پیغمیرین زحمتلرین گیتسون هدر
دینوزی الدن آلالّار غافل اولسوز مختصر
دینی مُهمَل دوتمیون هرگز پریشان اولمیون
.
.
حقّله باطل بولَنّمَز چشم حق بین اولماسا
بیر بشر آسوده قالماز دین و آئین اولماسا
استراحت گورمه سوز دنیاده گر دین اولماسا
اولماسا، امیّدوار لطف یزدان اولمیون
.
.
اینجیمه مندن دیدیم صوری مسلمان آدوزه!
ایستدیم دینون شئوناتین سالام من یادوزه
گر بو اسلامیله گیتسوز حق یتیشسون دادوزه
دردوزه درمان ایدون بیر گون پشیمان اولمیون
.
.
ناز و نعمت خلق ایدوب دور سیزلره خالق بیلون
قصرلرده اگلشون استبرق و سُندُس گیون
نعمتین قدرین بیلون باری تشکّر ایلیون
«اِن شَکَرتُم» یاد ایدون سیز اهل کفران اولمیون(2)
.
.
سعی ایدون دنیاده توشه اخذ ایدون اوز قبروزه
ساتمیون بو دینوزی دنیایه عار اولسون سیزه
دین یازیق دور چون پیمبردن امانت دور بیزه
دینوزه قربان اولون دنیایه قربان اولمیون
.
.
گر اولا دنیا و مافیها سیزون ای مرد و زن
سیر ایده کام دلونجه روز و شب چرخ کهن
عاقبت وار دوز نصیبوز بیر نِچه اَرشین کفن
سیز کفن فکرین ایدون پابند میلیان اولمیون
.
.
جادّۀ حقّدن چیخاردان مال دنیا دور بیزی
هامّونون وار دور یقیناً مال دنیاده گوزی
هر کسه روزی مقدّر ایلیوب رزّاق اوزی
آختارون رِزق مقدّر چوخدا حیران اولمیون
.
.
گرچه سعی و اهتمامیله گلر ثروت اَله
لیک بیر ثروت دگول، بو ثروته لعنت گله
ثروت اوسته ساتدی دینین ابن سعد و حرمله
دشمن آل پیمبر شمر و مروان اولمیون
.
.
باخسالار بو ثروته چشم حقیقت بینله
چوخ مغایر دور بو ثروت مذهب و آئینیله
نیلسوز بیر ثروتی اولسون بهاسی دینیله
ثروت اوسته روز و شب سرگرم عصیان اولمیون
.
.
اهل دین دنیاده، دنیا فکرینی باشدان آتار
قبره باور ایلین آیا نجه راحت یاتار؟
پر بهانی کم بهایه، ابله و نادان ساتار
گوزلیون قربانوز اولّام سیزده نادان اولمیون
.
.
هاردا گورسه بیر نفر ایستور وورا دینه ضرر
ساکت اَگلَشمَز مسلمان امر بر معروف ایدر
امر بر معروفدن ال چکمیون ای شیعه لر
کیم دیور آیا یاتون سیز مرد میدان اولمیون ؟
.
.
امر بر معروف و نهی از منکره عامل اولون
اورگشون معنیِّ قرآنی، نه تک حامل اولون
سیر ایدون حق جادّه سنده عامل کامل اولون
فکر باطل ایتمیون حیران و ویلان اولمیون
.
.
خلق ایدوب دور عالم امکانی خلّاق جهان
ایلیه مخلوقنی دنیاده هر آن امتحان
تا گوره کیم لایق نیرانیدی کیم اهل جنان
سعی ایدون دنیاده هرگز اهل نیران اولمیون
.
.
اصل قانون اساسی حکم قرآن دور بیزه
حکم قرآن هر عملده الده برهان دور بیزه
پیرو قرآن اولاخ گر دین چوخ آسان دور بیزه
پیرو قرآن اولون سیز اهل حرمان اولمیون
.
.
ای«رجائی» اولما سنده فعلوه مغرور سن
اشتباهه دوشمه، دینه معرفتدن دور سن
صدقله یازسان اگر بو مصرعی مأجور سن
ای مسلمانلار گلون صوری مسلمان اولمیون
.
.
(1) قوله تعالی: أَمَّنْ یجِیبُ الْمُضْطَرَّ إِذا دَعاهُ وَیکشِفُ السُّوءَ وَیجْعَلُکمْ خُلَفاءَ الأَرْضِ ( النمل: 62 )
(2) قوله تعالی: وَإذْ تَأذَّنَ رَبُّكُمْ لَئنْ شَكَرْتُم لَأزِيْدَنَّكُمْ وَلَئنْ كَفَرتُمْ إنَّ عَذابِي لَشَدِيدٌ ( ابراهیم : 7 )
.
.
#پندیات #رجایی_تبریزی #ترکی #قرآن #زبدةالاشعار
نظر دهید