کربلای مُعلا – کعبۀ مُعظّمه
.
✍️ زبدة الاشعار ✍️
?: @nohe_torki
.
مرحوم قدرت اله نادری میانجی
.
ای مکّه اگر سنده ده بیر کوه منا وار
قربانی قبول اولموش او هاجر تک آنا وار
.
فخر ائتمه گیلن شأنیوه اجلالیوه مکّه
سرخوش سان اگر بختیوه اقبالیوه مکّه
گل سیر ایلیاق حالیوه احوالیوه مکّه
ظنّ ائتمه وئرن شأنی سنه کوه منادور
بو فخری وئرن بلکه سنه کرب و بلادور
.
سن بیر دانا قربان وئریسن کوه مناده
یتمیش ایکی قربان کسیلوب کرب و بلاده
گول جسملری اوچ گونه تک قالدی اراده
هاجر نجه قان آغلاسا زهرا کیمی اولماز
یانمش جگری زینب و لیلا کیمی اولماز
.
اُول گون بُلوسن آه رباب عرشه دایاندی
قنداقدا علی اصغره اوخ دگدی اویاندی
سپدی او قانی عرشه حسین عرش بویاندی
سسلردی رباب حلقده پیکانیوه قربان
زهرا بالاسی بو قوزی قربانیوه قربان
.
قاسم کیمی دنیاده جوان مه جبین اولماز
یا فاطمه تک قاره دواقلی گلین اولماز
چوخ اوغلی ئولن وار ولی اُمّ البنین اولماز
عمری نقدر واردی دیوب آغلادی القان
«عباس بالا من بالاجا قبریوه قربان»
.
فخر ائتمه صفا مروه دی زوّاریوه جالب
اعمال طواف عُمرَه دی حجّاجیوه واجب
زینب عملی وار هامی اعمالیوه غالب
تلّ اوستونه تا قتلگهه نیلدی زینب
شمرون قاباقین کسدی اونا سویله دی زینب:
.
ای شمر اماندور گلی گلشندن آییرما
ال ساخلا حسین باشینی سن تندن آییرما
گل سن بو حسین قارداشیمی مندن آییرما
ظالم بُلوسن لبلری عطشاندی بو قربان
الله یولونا امّته قرباندی بو قربان
.
حجّاج گلوب جمعدی صحراده فراوان
گر مکّه بو گون محشر اولوب سنده نمایان
باخ کرب و بلایه نجه گور زینب نالان
لشگر توکولوب خیمه لره داده گلن یوخ
محشردی او گون زینبه فریاده گلن یوخ
.
محشر اودی که کرب و بلا ایچره قورولدی
حق قافله سی کوی حقیقتده وورولدی
سعد اوغلی حسین نعشینه آت چاپدی یورولدی
زینب الی قوینوندادی پیغمبری سسلور
گه فاطمه نی ، گه باباسی حیدری سسلور
.
نحر اولدی حسین باشی او گون بسکه قفادن
اللرده ئولوب فاطمه نون اوغلی جفادن
الاندا همان قاندی آخیر کرب و بلادن
توپراقی اولوب تربت سجّاده نمازه
جانلار اولا قربان بو شهنشاه حجازه
.
مینلرجه بو گون ذبح اولاجاق مکّه ده قربان
هر تک تکینه سو وئریلر قالمیا عطشان
لب تشنه قوری یرده حسین وئردی او گون جان
جبریل ملک لرله گلوب دشت بلایه
جمع اولدی پیمبرلر او گون کرب و بلایه
.
نوحیله خلیل آدم ائدوب تعزیه برپا
باش آچدی او گون ناله ائدوب حضرت موسی
ماتم دوتوب اُول شاهه او گون مریم و عیسی
زهرا دئدی ای تشنه وئرن جانی حسین وای
ناحق توکولن توپراقا القانی حسین وای
.
یوز ایللریله کرب و بلا مکّه دن اوّل
کامل حرمِ امنِ اِلهیدی مُجَلَّل
قرآندا بو یر وادیِ ایمندی مُسَجَّل
تعریفین ائدوب سیّد سجّاد بو دشتین
«بیر قطعه سیدور کرب و بلا باغ بهشتین»
.
اُول گون که بو یر گون کیمی محشرده درخشان
بیر یاندا حسین باشی الینده لبی عطشان
زینب اسرائیله گلر زلفی پریشان
خلقه تزه دن حشر قوپار شمری گورنده
عباس قولون محشره زهرا گتورنده
.
پیغمبره زهرایه حسین نور دو عیندور
بو جاه و جلال و عظمت، شأن حسیندور
هر یانه قولاق وئر نجه گور شیون و شیندور
یاز « #نادری » بو کعبه اگر بیت خدادور
ای مکّه مقدم سنه بو کرب و بلادور
گل تربته باخ هر مرض و درده دوادور
.
#کربلا_کعبه #عید_قربان
#مفاخره_کعبه_کربلا
#ای_مکه_اگر_سنده_ده_بیر_کوه_منا_وار
#نادری #ترکی
.
✍️ #زبدةالاشعار ✍️
?: @nohe_torki
نظر دهید