کوچ از کربلا – زبانحال حضرت زینب (س)
.
✍️ زبدة الاشعار ✍️
?: @nohe_torki
.
محمد هوشمند (مدهوش تبریزی)
.
ای نخل دینه قانی وئرن تازه جان حسین
قربان یارالی جانیوه جان جهان حسین
.
قلبیم سیخیلدی آیریلیقیندان داریخمشام
هجرونده اولموشام نئجه گور باغریقان حسین
.
قان ایچره یاتما دور باجیوی سال اوزون یولا
یول باشلیوب دی شامه گئدیر کاروان حسین
.
دور سال یولا بو قافله نی قیل اؤزون دعا
قاتل لرین اولوب دی بیزه ساربان حسین
.
اولدی شهید قاسم و عبّاس و اکبریم
یوخ بیر نفر بو قافلیه پاسبان حسین
.
چوخ بی مروّت اولدی سنین میزبانلارین
لب تشنه کسدیلر باشیوی کوفیان حسین
.
سندن صورا خیامه قُشون گلدی غارته
ائتدی اسیر قیزلاری شمر و سنان حسین
.
نصفی یانان چادیردا باجین منزل ائیله دی
یورقون همالره یوخودی آشیان حسین
.
دگدوقجا نیزه اوخ، گل آچیب قانلی پیکرین
کربُ بلا دیارین ائدیب گلسِتان حسین
.
یوخدور باشین بدنده دئسین شرح حالیوی
اولدون گئچن گئجه کیمه سن میهمان حسین
.
گودالیدن مشامه گلیر عطر جانفزا
زهرا آنام گلیب بو یئره بیگمان حسین
.
تورپاق لار اوسته بیکس و تنها نه یاتمیسان
قان آغلارام بو محنتیوه هر زمان حسین
.
گلدیم دوباره اللریوی بیر آلیم اله
گوردوم کسوبدی اللریوی ساربان حسین
.
آیا نئجه بو محنته من طاقت ائلییم
بیر دفن و کفنه وئرمیری دشمن امان حسین
.
بذل ائیلدین نیین واریدی کوی عشقیده
وئردین رضای حقیده خوش امتحان حسین
.
اولدون شهید لیک یئتیشدین مرامیوه
آزاده لیق مسیرینی وئردین نشان حسین
.
باش ظلمه اگمدین سنه آزاده لر فدا
وئردین فدا مرامیوه پیر و جوان حسین
.
باشین کسیلدی، تا کسه ظلم و جفا یولون
قانین توکولدی ائیله دی حقی عیان حسین
.
جبریله آیریلیب گئدیرم شام و کوفیه
یوخدور باجوندا درد فراقه توان حسین
.
تنها باجون دییل که ائدیر ناله و فغان
ناله ائدیر بو غمده زمین و زمان حسین
.
بیر گون بو عشق کعبه سینه ایستین لرین
هر سمت و شهریدن اولاجاقلار روان حسین
.
بیر گون بو کربلایه گلر شوق و ذوقیله
قبرین زیارت ائتماقا اهل جهان حسین
.
«مدهوش» اولور یازاندا قلم کربلا سوزون
خاک شفاده واردی نه شور نهان حسین
.
#کوچ_کربلا
#ای_نخل_دینه_قانی_وئرن_تازه_جان_حسین
#مدهوش_تبریزی
#ترکی
.
✍️ #زبدةالاشعار ✍️
?: @nohe_torki
نظر دهید