مدح و منقبت مولا علی علیه السلام
..
..
..
حاج اسماعیل زرین
..
..
..
ای چراغ عارفان نور هدایت یاعلی
وی سپهر حقیده مهر ولایت یا علی
..
..
..
سن هدایت چرخنه خورشید عالم تاب سن
گنج عزتده اولان بیر گوهر نایاب سن
حجت یکتا و روح منبر و محراب سن
حق سنه تعیین ائدوب حق خلافت یا علی
..
..
..
سن شه مشکل گشا سن سن وصى مصطفى
سن أمام أتقیاسن سن امیر اولیا
شاه اقلیم ولایت هادی دین خدا
ای وجودی عزت و شان و شرافت یاعلی
..
..
..
بیر نفر اولماز سنه شان وشرفده همطراز
کون و امکان ماسوالله سنله اولموش سرفراز
اوج رتبنده سنون پرواز ائدنمز شاهباز
ای هامی مخلوقیدن مافوق رتبت یاعلی
..
..
..
اولماسیدی خلق اگر پیغمبر والامقام
کیمسه اولمازدی سنون مافوقون ای شاه انام
مادر گیتی دوغا بولمز نظیرون لاكلام
چون اراده ائتمیوب خلاق رحمت یا علی
..
..
..
نفسوی اوز نفسی فرض ایلردی ختم الانبیا
حبّون حبّ الهیدور ای مظهر نور خدا
دشمنون دشمندی یکتایه ایا شاه ولا
طاعتوندی ذات پاک حقه طاعت یا علی
..
..
..
سنله طاعتلر اولار مقبول هامی مخلوقیدن
شرط اكمال عملسن سابق و مسبوقیدن
حبط دور اعمال سنسیز لاحق و ملحوقیدن
اولماسا حبّون قبول اولماز عبادت یا علی
..
..
..
حق سنه مخلوق ایچینده وئردی عالی امتیاز
گتدی بیتینده سنی دنیایه ای شاه حجاز
قبلۀ اهل ولا بولسون سنی اهل نماز
بیر سنه مخصوص دور بیله ولادت یا علی
..
..
..
بیتدن چیخدی آنان، ال أوسته سن تک نورعین
گوردی اعمى سن اولوبدور بی نهایت دلغمین
محضر پیغمبره تاگلدی اول عصمت مکین
چولقامیشدی قلبینی بی حد ملالت یاعلی
..
..
..
لیک غفلتدیدی بولمزدی او بانوی گرام
کیم سنون قلبونده وار بیر اوزگه منظور و مرام
چشم حق بینون او دم آچدون که ائتدون اخذ کام
گوردون آغوشه چکوب ختم رسالت یا علی
..
..
..
اولین دیدار یتدون مصطفی دیدارینه
کسب نور ائتدون گوزون باخدوقجا گون رخسارینه
دم آلوب وئردون قولاخ گفتار گوهر بارینه
نطقه گلدون ایلدون قران تلاوت یاعلی
..
..
..
رشد قیلدون محترم آغوشیلرده بیر زمان
اون یاشیندا ظاهر اولدی سنده اسرار نهان
اوندا کی ابراز راز ائتدی حبیب لامكان
اولین اسلامی سن ائتدون اجابت یا علی
..
..
..
تاج عزت باشه قویدون ای امیر صادقون
خلق ایچینده اولدی ظاهر معنى السابقون
بو مقامی درک ایدنمز سابقون و لاحقون
مرحبا یاخشی آپاردون کوی سبقت یا علی
..
..
..
بو مقام شامخ اوسته روز و شب ویردون قدم
عهدون اوسته ثابت اولدون گون بگون اولدون علم
حق مقامون آرتیروب اولدون شه حلّ و حرم
باشون اوستونده آچیلدی چتر نصرت یا علی
..
..
..
بسکه اوج ائتدی مقامون ای شه والاتبار
چگنینه آلدی سنی پیغمبر ذوالاقتدار
بام بیت اللهه چیخدون دلده ذکر کردگار
باشلادون تكبیر ذات ذوالجلالت یاعلی
..
..
..
بت لری توکدی یره یکسر یدالله اللرون
اوج ائدردی گوکلره آواز الله اکبرون
محو و نابود اولدی معناده اوگون دشمنلرون
ائیلدون كفاری غرق بحر محنت یاعلی
..
..
..
بدرده پوزدون صفوف لشکر اعدانی سن
تنگ قیلدون دشمنه اول عرصۀ هیجانی سن
پایدار ائتدون لوای حضرت سبحانی سن
تاپدی استقلال او گون دین و شریعت یا علی
..
..
..
ای شجاعت کانی شیر شرزۀ میدان جنگ
سن اُحُد ده رزمگاهی ائیلدون اعدایه تنگ
دینوه خدمتده اصلا ائتمدون آنی درنگ
گرچه یتمیشدی سنه بی حد جراحت یا علی
..
..
..
لشکر اسلام اولموشدی پراکنده تمام
تک لموشدی سیزلری اول فرقۀ بی ننگ و نام
دشمن بی شرم آرا قالمیشدی چون فخر انام
شیر تک دورنده ایلردون حراست یاعلی
..
..
..
ضرب تیغونله یره توکدون گروه ارذلی
نعش ناپاکیله دولدوردون زمین مقتلی
جبرئیل گویده دیردی لافتى الا علی
بسکه گوستردون أو چولده چرخ شهامت یا علی
..
..
..
مدحوی نه دللریله شرح ائدوم ای شاه دین
من سنه قربان اولوم ای سرور بدر و حنین
زینت مجلس ائدوم خوشدور که خیبر صحبتین
ای آدی محفل لره ایفای زینت یاعلی
..
..
..
روز خیبرده نه خدمت ائتدون ای ناموس دین
رکن دینی پایمال ایستردی ائتسون مشرکین
نچه گونلر گرچه اوردا جنگ ائدردی مسملین
مشركینه لیک تاپمازدیلا نصرت یاعلی
..
..
..
اوّل و ثانی اگر چه قویدی میدانه قدم
گوردولر اولماق مبارز امر مشكلدور اهم
پنجۀ دشمن قوی دور ایشده واردور پیچ و خم
ترک ایدوب هیجانی قاشدیلار خجالت یا علی
..
..
..
رعب مرحب سالدی لرزه اونلارین اعضاسینه
وئرمیویلر تن پیمبر امرینون اجراسینه
گیتمیوبلر بی حیالر مرحبون دعو سینه
سالدیلار گردنلرینه طوق ذلت یاعلی
..
..
..
ائتدی فرمایش رسول حق حبیب کردگار
پرچمی ویرّم صباح بیر شخصه ائیلر افتخار
هم سوور الله اونی، اللهی اول والا تبار
فکر ایدوبلر کیمده وار بیله لیاقت یاعلی
..
..
..
چشم نازون چون او گون اولموشدی درده مبتلا
سندن ال اوزموشدولر بو باره ده اهل وغا
چون صباح اولدی سنی احضار ائدوبدور مصطفی
گوزلریوه لطفیله ائتدی طبابت یاعلی
..
..
..
پرچم اسلامی پیغمبر سنه ائتدی عطا
گوندروب میدان اعدایه سنی ائتدی دعا
تیغ تیزونله شرر سالدون سپاهه ببر ملا
پهلوانلاردان آپاردون تاب و طاقت یا علی
..
..
..
مرحبی که شهرتی دوتموشدی دنیانی تمام
گون او گونده مثل و مانندی یوخیدی لاكلام
قدرتی اولموب قباقونده سنون ائتسون قیام
ضربتونله توپراقا سالدون او ساعت یا علی
..
..
..
چوخلی مرحبلر او گون نیرانه سن ائتدون روان
فتح خیبر ائیلدون ای خسرو کون و مکان
پیکر اسلامه وئردون تازه دن بیر تازه جان
ای وئرن اسلامه رونق شیر صولت یا علی
..
..
..
سن کیمی بیر عاشق جانبازی ای نیکو سیر
ویرمیوب هرگز نشان بو عالم پر شور و شر
خوابگاه حضرت طاها ده هنگام خطر
یاتدون ائتدون رغبتیله استراحت یاعلى
..
..
..
وار روایت اولسا گر اشجار عالملر قلم
یا مركّب اولسا دریالر ایا شاہ امم
رتبه و شان و مقامون ائیلیه بولمز رقم
شانیوین میزانینه یوخدور نهایت یاعلی
..
..
..
بیر بشر که ذات حقّ و هم رسول کردگار
مدحینی قران و اخبارینده ایلوبدور کرار
اوزگه دیللرده اونون تعریفنه یوخ اقتدار
مدح ائده نلر ایلور اظهار ارادت یا علی
..
..
..
منفعلدور جود و احسانونده هر صاحب کرم
معترفدور علم و حلم و فضلوه کل امم
اسم پاكون عالی و دانی یانندا محترم
شخصوی تعریف ائدور اهل عداوت یا علی
..
..
..
عمروده سن بیر نفردن ائتمدون عجز و سئوال
روز و شب بیچاره لردن ائیلدون جویای حال
بینوالردن ائدردون دائما دفع ملال
اوزگه لردن اوتری چوخ چکدون ریاضت یا علی
..
..
..
بیر بیله شان و شرفله ای شه ملک عرب
قدریوی افسوس بولموب قوم بی شرم و ادب
بوینوا ایپ سالدیلار جهلیله دونان ای عجب
گون کیمی حقون دانوب اهل ضلالت یا علی
..
..
..
محرمون نامحرم ایچره یخدیلار قوم ضلال
محسنین سقط ایتدلر یوز وئردی حال ارتحال
بو تعدی لر گتوردی قلبوه بی حد ملال
بی حیالر ائتدیلر بی حد جسارت یا علی
..
..
..
بو جسارت روحوه اندازه سیز وئردی فشار
روز روشن غصه و غمدن گوزونده اولدی تار
ثانی بی دین سنی زهرادن ائتدی شرمسار
تاپدی قلبون تیر محنتدن جراحت یا علی
..
..
..
یا امیرالمومنین ای شاه صاحب ذوالفقار
ای امام الاتقیا وی رادمرد روزگار
ای یگانه حجت برحق حیّ کردگار
لطف قیل «زرینه» سن ایله شفاعت یا علی
..
..
..
#حیدریه #اسماعیل_زرین #حیدریه_مدح #جنگ_خیبر #یاعلی #حیدریه_شجاعت #ترکی #زبدةالاشعار
نظر دهید