اربعین
.
✍️ زبدة الاشعار ✍️
.
?: @nohe_torki
.
مرحوم هندی تبریزی
.
شاماتی گزوب دیدۀ خونباریله گلدیم
قبر اوسته گلن دسته زواریله گلدیم
.
.
عالملری حیرتده قویوب پایۀ صبرون
زینب سنه قربان نیه شش گوشه دی قبرون
.
.
اوّل علی اکبر قانینی قانیوه قاتدون
باشسیز بدنون صونرا باسوب باغروا یاتدون
بو یاتماقیلا بیرق اسلامی اوجاتدون
طوبی آغاجندان آسیلان خوشه دی بو قبر
بولدوم باجون ئولسون نیه شش گوشه دی بو قبر
.
.
هر چند گل یاس قویولموش اطاقوندا
بیر گلبن نوخیزده واردور قوجاقوندا
بیر سرخ شکوفه آچیلوبدور بوداقوندا
قبرونده نهالان بهشتی گل آچوبدور
آرتیق دیمورم اصغریوون رنگی قاچوبدور
.
.
باشون بدنون معجزۀ شام و دمشقون
گوستردی اخا پختگی شیوۀ مشقون
امّا نه بیوک معجزه دور وحدت عشقون
بو قبره ایکی نور گرانمایه دوشوبدور
شاخه ایکی اما یره بیر سایه دوشوبدور
.
.
بو مرقده وار حسرتی جنّات نعیمون
جنّت باغینا درس وفا ویردی حریمون
خوش حالیوه خوش صحبت و خوش خودی ندیمون
باس باغریوا جانانوی زیبادی جواندور
عالم گوره بو قبر دگول خانۀ جاندور
.
.
قیرخوندی عیالمون هامی قبر اوسته گلوردی
غم خسته سی بیر دستۀ برجسته گلوردی
بو دسته حسینی لره وابسته گلوردی
منده قاریشوب اونلارا قبر اوستنه گلدیم
امّیدیمی هر یردن اوزوب بیر سنه گلدیم
.
.
ای کاش ئولوب تپراق اولوب مدفن اولیدیم
پیراهن گل تک سنه پیراهن اولیدیم
بیر سن بو مزار ایچره اولوب بیر من اولیدیم
اوّل سر ژگانیله بیر قبر قازیدیم
باش داشینه تاریخ ره شامی یازیدیم
.
.
ای قبر مطهّر نه عجب روح فزاسن
شمع شب وصل و نفس صبح صفاسن
غرق عرق پیکر شاه شهداسن
ای عود غم آلود یانان عطرووه قربان
ای صفحۀ قرآن یازیلان سطرووه قربان
.
.
ای سایۀ حق لطف خدا کعبۀ آمال
ای قوّت دل راحت جان شاهد اقبال
ای کان کرم یات قوری تپراقده خوشحال
یاتمش سان اگر صورت ظاهر قوری یرده
غم یوخ که یاتار گنج و جواهر قوری یرده
.
.
روحون کیمی وارسته و آزاده دی قبرون
قان آغلیوب آغلاتماقا آماده دی قبرون
باغرینده یاتان دلبره دلداده دی قبرون
ریحان خطیله کاتب سرمشق حسینی
قبر اوسته یازوب مدرسه عشق حسینی
.
.
ای باغ بهشتی گل و گلزاریوه قربان
ای غنچه تر عقده گشا خاریوه قربان
ای قصر زمرّد در و دیواریوه قربان
قارداشیمی آهسته چک آغوشیوه ای قبر
بیر مونسی وار چکمه تک آغوشیوه ای قبر
.
.
هر چند عزیز خاطریوه باردی زینب
درد اهلی دی چون یار دل آزاردی زینب
دیندیر اونی آخر سنه زوّاردی زینب
آغلار گوزی خم قامتی گیسوی سفیدی
ترسیم ایدر آق صفحه ده ایوان یزیدی
.
.
پروانه اگر شمع صفت شامله خوشدور
عاشق نفس گرم دل آرامله خوشدور
زینب ده بو درگاه فلک بامله خوشدور
قوی قبر شریفونده مجاور اولا باجون
دائم دوشنوب قبروه زائر اولا باجون
.
.
یوللاندی مدینه یولونا قافله قارداش
ایل گیتدی گرک منده گیدم یوخ گله قارداش
یوخ کیمسه منیم دردیمی من تک بوله قارداش
آرامگهون حسرتیله ترکینی ایتدیم
الله اوزی عالمدی که گیتدیم نجه گیتدیم
.
#سبک_ای_باد_صبا … 7 سبک
.
.
#اربعین
#شاماتی_گزوب_دیده_خونباریله_گلدیم
#هندی_تبریزی
#ترکی
.
✍️ #زبدةالاشعار ✍️
.
?: @nohe_torki
نظر دهید