حالات حضرت باب الحوائج موسی بن جعفر(ع)
.
#زبدةالاشعار
.
: @nohe_torki
.
مرحوم صحاف تبریزی
.
ای چرخ سفله پرور و بی ننگ و کجمدار
دورنده قیلدون عالم امکانی تارمار
.
آل رسولی قویمادون آسوده دهرده
سالدون کناره فاطمه قبریندن اشکبار
.
پوزدون عزیز فاطمه نون دودماننی
زهرا بالالارین ایلدون ذلته دچار
.
بغداده سالدون حضرت موسی بن جعفری
قالدى بالالارى گوزی یوللاردا انتظار
.
گلمز مقاله کشف ایلیم حال غربتین
نه وار او حاله طاقت و صبر و اختیار
.
مشغولیدی عبادته قبرینده جدینون
تزویریله او شاهی نماز استه دوتدیلار
.
ایلوب سوار محمله جبر تمامله
اعزام بصره ایلدی هارون کین شعار
.
حبس نظر ایدوبله نچه ایل او سروری
قید ملال عزتیله لیل و النهار
.
هارون بو ظلمه دویمادی بیر مدت مدید
ایلوب امامی حسرت اهل دیار و دار
.
بغداده جلب ایدوب او اسیر بلاکشی
تاپشوردی سِندِ شومه او سردستۀ شرار
.
محبوس ایدوبدی گوشۀ زنداندا اون بیر ایل
نه بیر انیس و مونس و نه یار غمگسار
.
اوچ گونلریله گوشه زنداندا آج سوسوز
صبحه کیمی نماز قیلاردی او شهریار
.
ایلردی عرض خوشدی خدا بو مکانه منه
زنجیر گر چه بوینمی ایلوب جریحه دار
.
حسرتله جان ویرم بو قوری یرده راضیم
جدّیم حسین کیمی منه بسدور بو افتخار
.
مسموم ایدوبله جبریله آخرده اولشهی
اود ووردی قلب عالمه هارون نابکار
.
احساس ایدوبدی شیعه لرین ازدحامنی
تشویشه دوشدی سلطنتی دوتمیا قرار
.
جمع کثیر مجلسنه حاضر ایلدی
حتّى نقدر عالم دارای اشتهار
.
شاهانه بیر لباس امامه گیندیروب
یر ویردی اوز یانندا او بی شرم و ننگ و عار
.
دوتدی یوزین او جمعه بو پیغمبر اوغلیدور
نه پایه ده یانمدا منیم احترامی وار
.
هاموز گورون لباسی بو دور منزلی بویر
مندن یتشمیوب دلنه ذکر انزجار
.
ایندی وجود طیبنون وار نقاحتی
گویا مریض اولوب بو شنهشاه تاجدار
.
امر ایتدی بیر طبیبه که ایتسون معاینه
قول طبیبده اولونور صدق و اعتبار
.
دوردی طبیب ایاقه که باخسون او سروره
ویردی نشان مبارک الین اول بزرگوار
.
سسلندی ظلمله بونی مسموم ایدوبدیلر
حاذقدی بو نشان ویرور أوز دردین اشکبار
.
مجلس داغلدی گیتدی هامی اوز مکاننه
هارون اولوب نئجه مجلسده شرمسار
.
سند بن شاهک، ایلدی ظاهر شقاوتین
آچدی الین امام او غدّار روزگار
.
بیر سیلی وردی حضرت موسی بن جعفره
غش ایلدی یخلدی او مظلوم باوقار
.
یاندوردی قلب فاطمه نی باغ عدنده
گلدی تزلزله او زمان عرش کردگار
.
جلب ایتدی محبسه گنه سندی او سروری
زنجیر وردی بویننا صاحب جنایه دار
.
قطب مدار عالم او محبسده ویردی جان
وار دور یری بو غمده یانا چرخ کجمدار
.
هارونه ویردیلر خبر ئولدی غریب امام
حکمون ندیر بو باره ده ای شوم بدفکار
.
سویلوب چکون جنازه سینه اوز عباسنی
فارغ دلیله تامن اولوم عازم شکار
.
اوچ گون گیدوب شکاره هارون قیتمدی
قالدى جنازه گوشۀ زنداندا خوار و زار
.
گلدی شکاردن دیمورم من نه حکم ایدوب
ای کاش اولیدی عالم امکانی تار مار
.
شرم ایتمدی پیمبر و زهرادن، ایلدی
دفن امامی دورت نفر حماله واگذار
.
بیر تخته پاره ای گتوروب قویدیلار یره
تا حمل مدفن اولسون او نعش شه فخار
.
هر قدر ویردیلر حرکت نعش طیبه
ترپنمدی نئجه حرکت ویردیلر کرار
.
حیرتده قالدیلار نیه بو نعش آغرلاشوب
ایتدی او دم عبانی بیری نعشدن کنار
.
کونده ایاقدا گوردیله زنجیر باغلیدور
جان تاپشورب او حالیله سلطان کامکار
.
نعش امامی دورت نفر حمّال او وقتده
زنداندن چخاتدیلا چوخ ذلّتیله خوار
.
وهن تمامله او مقدس جنازه نی
حمل ایلبوبله مدفنه اسلامه اولسون عار
.
حالی اولوب او وقته سلیمان بو حالدن
ووردی یره عمامه سنی قیلدی آه و زار
.
سسلندی وای اولا منه نعش أمامه باخ
اسلامیانه وار یری طعن ایتسه زنگبار
.
امر ایلدی غلاملر آلدى جنازه نی
اهل عیالنه ایدوب اوُل دمده اختیار
.
تا آلدیلار آرایه او نعش مقدسی
ایلردیلر هامی یوزه گوز یاشلارین نثار
.
جمع اولدی شیعه لر هاموسی آه زاریله
عمامه الده جمله سی محزون و دلفگار
.
نعش امامه قیلدیلا بیر پر بها کفن
چوخ عزتیله ایلدیلر داخل مزار
.
جانلار فدا تماماً اولا یا حسین سنه
حشره کیمی غمون دل زهرانی یاندورار
.
بیر کس تاپولمادی سنه تا دفن و کفن ایده
اولدی کفن نلر نجه عرض ایلیوم آشکار
.
آت چاپدیلار داغلدی یر اوستنده پیکرون
دورت مین یارالی جسموی ایلوبله خاکسار
.
آت دیرناقی هارا او مبارک بدن هارا
اولدی کفن او گل جسمده پردۀ غبار
یتمز حسین مصیبتی «صحاف» آخره
حشره کیمی یازیلسا گنه تاپماز اختصار
.
.
#کاظمیه_صحاف_تبریزی
#کاظمیه_شهادت
#ای_چرخ_سفله_پرور_و_بی_ننگ_و_کجمدار
#ترکی
.
#زبدةالاشعار
.
: @nohe_torki
نظر دهید