ای کاش فراتین سویی سن قانه دونیدون #فرات_تائب_تبریزی

در بسته شدن راه فرات
…
…
…
مرحوم تائب تبریزی
…
…
…
ای کاش فراتین سویی سن قانه دونیدون
خونابۀ چشمیم کیمی مرجانه دونیدون
شرم ایلمدون سن باش آلوب چوللره آخدون
حسرت اودونا یاندیروب آل اللهی یاخدون
…
…
…
گوردون که سوسوزلوق اودی هر بیر دلی یاخدی
دللرده سو گوز یاشلاری گل یوزلره آخدی
آخدون چوله سن تشنه اوشاقلار سنه باخدى
اشگ تر زینب کیمی گلدون جریانه
دوندردون حسین قزلارینون باغرینی قانه
…
…
…
ای قانه دونن سو نجه بی شرمیدون آیا
اولدی آدون آفاقده مهریۀ زهرا
ذرۀیّۀ زهرایه نصیب اولمادون أما
دلده نچه لب تشنه قزین سو سوزى قالدى
گوز یاشلاری آخدی یوزه سنده گوزی قالدى
…
…
…
باخدی سنه چوخ یاندی بیوکلر بالالاردان
سو ایستدی لب تشنه اوشاقلار آنالاردان
یاندی آنالار اولدی خجالت بالالاردان
چکدون نه خجالت سن او خجلت زده لردن
نه سود سوز آنادن نه سوسوز آج سود امردن
…
…
…
چون لاله سوسوزلار اورگه آلدی سو داغی
پژمرده سوسوزلوقدان اولوب فاطمه باغی
تاپموبلا سو هر قدر ایلیوبلر سو سراغی
بیر بیرلرینه اولدی پناهنده سوسوزلار
بی طاقت اولوب یوز یوزه قویدی بالا قزلار
…
…
…
مخیمده سزیلتی سسی افلاکه دایاندی
خون دلیله هر ساری رخساره بویاندی
حسرت اودونا هر آنا یاندی بالا یاندی
گوز یاشلاری بیربیرلره رشگ ایتدی آخشدا
آلدی آنالار صبرینی اطفال باخیشدا
…
…
…
سولدی او بیابان دا بولورسن که نه گل لر
یا سَپدی نه شبنم او یرین خاکینه گل لر
آچماقدان ایدر شرم اولاردان گینه گل لر
عالمده اولاردان صورا نه گل نه گلستان
اولسون هامو گلزار اولاردان صورا ویران
…
…
…
بولدون قوناقون اولدی نجه نازلو قوناقلار
بولدون که نجه سولدی سوسوز غنچه دوداقلار
بولدون نه قیامت ایلدی خردا اوشاقلار
جمع اولدولا اول وقت که اللرده سو جامی
دللرده سو دور ایتدیله گوز یاشلی خیامی
…
…
…
گوردی نه عطش عارضه سی جوهر جانلار
دللرده سو جان ویردی نه نورسته جوانلار
آخدى نجه توپراقدا سو تک قرمزی قانلار
چالدی ال ایاق چوخلاری لب تشنه او قاندا
گلدون جریانه ولی آخدون سن اویاندا
…
…
…
بولدون سنون اوستونده نه عالم نه غم اولدی
یا اینکه نگون هانسی اوجا بیر علم اولدی
سیندی نجه بیر باش نجه قوللار قلم اولدی
قول صاحبی عباس علی صاحب غیرت
اولدی بالالاردان سنون اوستونده خجالت
…
…
…
آخدون چوله سن یاندیلا گل لر بوداقیندا
چوخ غنچه نی سولدوردی عطش غنچه چاقیندا
اصغر سارالوب سولدی ربابین قوجاقیندا
اَمدی قوریان لبلرین آرامینی آلدى
گوردی بالاسی یاتموری بوش سینیه سالدى
…
…
…
درک ایلموسن تائب عجب باب نجاتی
دوت صدقیله دامان شه حقّ صفاتی
یالوار گنه آل جنّت و فردوس براتی
زهرا بالاسی اوردا قورار بزم ضیافت
گیت سنده او مجلسده اونی ایله زیارت
…
…
…
#فرات #تائب_تبریزی #ترکی #زبدةالاشعار