شجاعت حضرت ابوالفضل العباس(ع)
#جنگ_دو_برادر
.
✍️ زبدة الاشعار ✍️
?: @nohe_torki
.
مرحوم انور اردبیلی
.
.
مطلبی که ائدورم دفتریمه پیرایه
وئریلوب نسبتی اوچ مجتهد والایه
هر اوچی صاحب دانشدیله عالی پایه
ابن طاووس کبیر و رضی الله مفید
حضرت شوشتری هر اوچی ایلوب تأیید
.
.
ظهر عاشوریده عباس ظفرمند و قوی
بدر رخشان و درخشندۀ آل نبوی
سپر رد بلای نجبای علوی
دیزلری اوسته قویوب باش او ریاضت دیده
یره اگلشمیشیدی درد و غمه پیچیده
.
.
فکر ائدوردی سوسوزوندان سارالان گللرینه
آلیشوردی اورگی آتش نسگل لرینه
غیرتیندن باخا بیلموردی شیرین دیللرینه
غم و محنت اثر ائتمیشدی او حق بنده سینه
نگرانیدی خانم زینبون آینده سینه
.
.
اؤز اؤزیله دانیشوردی او شرفلی سردار
ملشور گورنجه جیران کیمی عطشان بالالار
بارالها بولارون ناخوشی وار دیلسیزی وار
یولّامور نهر فراته منی سلطان حجاز
بندۀ عشقینه باخمور بو شه بنده نواز
.
.
منی سقا ائلیوبدور حرم طاهایه
ساخلیوب خیمه ده مأذون ائلمور دعوایه
واردی بیر چاره گرک آند وئرم زهرایه
هر ندن کچسه ده کچمز آناسیندان بیلورم
سنی زهرا دیرم وئر منه رخصت ئولورم
.
.
گتدی تشریف اونون خیمه سینه میر انام
درک ائدوب عطر امامی ائدوب عباس قیام
ایکی ال سینه سی اوسته آقیا وئردی سلام
شه بویوردی اونا ای صاحب اراده قارداش
داریخوبسان بیلورم خیمه سراده قارداش
.
.
طاقتون یوخ گوره سن گللری گلشنده سوسوز
چوبالور جان قوشی بلبللریمون تنده سوسوز
باجیلاریمدا سوسوز سنده سوسوز منده سوسوز
باغبانم سارالوب صحن گلستان بیلورم
آلتی آیلیق صود امر جان وئرور الان بیلورم
.
.
بو حدیثی دیورم مندن ائشیت یاعباس
بیرگون ای عاشق تقوا و مبارک احساس
محضر شیر خداده واریدی بیر اجلاس
جنگ صفّین سوزین صحبت ائدوردی یاران
واریدی مالک و مقداد و کمیل و سلمان
.
.
قیلدی فرمایش آتام موقع بحران قتال
هرکیمون قارداشی اولسا اولی آسوده خیال
مثل سیمرغ آچار موقع دعوا پر و بال
قلبی قوّتلی اولار روحی قوی پنجه سی تیز
دالدالا وئرسلر ایلولّه برازنده ستیز
.
.
یاخشیدور قارداش اؤزون جنگیده قارداشه قوشا
ایستورم هر ایکیمیز عزم ائلیک جنگه قوشا
چشمۀ همّتیمیز عرصۀ هیجاده جوشا
ایستورم سنله منی قوم ستمگر تانیا
مرتضا زاده لری جنگیده لشگر تانیا
.
.
ایکی شمشیری ائدک طیر ابابیل کیمی
سپه دشمنی نابود ائلیک نیل کیمی
اوجا تکبیر دییک عشقیله جبریل کیمی
قویمارام جسمیده باش ترپدنی ساخلیا باش
جنگیده سن منیم آرخامدا دایانسون قارداش
.
.
عرض قیلدی اونا عباس گوزلدور سخنون
تک قالوبسان سنه قربان کمکه یوخ گلنون
عزم ائله جنگه گلوم منده رکابونده سنون
واهمم یوخدی قوشون اولسادا گر بوندان چوخ
سیّدی رجعتیمیز خیمه لره وار یا یوخ؟
.
.
دئدی بیر حادثه وار جنگیده جبران اولماز
پرده دن رد ائلدیم مطلبی پنهان اولماز
من اؤزوم خیمیه گلّم سنه امکان اولماز
دئدی عباس خوش اولدوم بو گوزل مطلبیله
وئر اجازه نچه کلمه دانیشوم زینبیله
.
.
مجلسی خلوت ائدوب زینبیله اشجع ناس
مظهر فاطمه نی قیلدی مخاطب عباس
اورگیمده نچه سؤز وار دیورم سن قولاق آس
ننمون پنجۀ اعدا چکه جک قلبینه داغ
اوچ چراغی سونوب ایستور سونه دوردومجی چراغ
.
.
تسلیت خوشدی وطنده دیه سن، سن ننمه
قویمادی دور زمان خدمت ائدم من ننمه
پرچمیم قالسا نشانه یتوررسن ننمه
دئمورم همسر مولادی عزیزوزدی سیزون
منزلوزده باش آغاردوبدی کنیزوزدی سیزون
.
.
بیرده وار ائوده منیم درده گرفتار اوغلوم
گوزی یوللاردا ایشیقلی گونوزی تار اوغلوم
یاشیوب عزّتیله قویما اولا خوار اوغلوم
آتاسیزلیق بیلوسن فاجعه دور هر اوشاقا
قویمیون تای توش ایچینده باشی دوشسون اشاقا
.
.
بیرده سیمرغ کیمی دوشسه ایکی شاه پریم
یخسالار قتلگهه گلسه شهادت خبریم
قوراسوز مجلس ماتم منه یوخدور نظریم
سیزی آغلاتسا اگر درد و بلاسی باشیمون
غمی آرتار بیلورم اوغلی ئولن قارداشیمون
.
.
زینبی قویدولا تنها ائله بیر بحراندا
عزم ائدوبدور ایکی قارداش دایانوب میداندا
رجز انشاد ائلدی هر بیری بیر عنواندا
دئدی اوّلده حسین سبط رسول اللهم
صورا عباس دئدی ابن ولیّ اللهم
.
.
او دئدی جدّیم ائدوب سِیرینی اَوْ اَدناده
بیت حقده بو دئدی گلمیش آتام ایجاده
او دئدی رتبۀ عصمت وار آنام زهراده
شهرت و جاهی سالوب عالم معنایه طنین
بو دئدی فاطمیه جاریه دور امّ بنین
.
.
هم صدا اولدی او صحراده مریدیله مراد
روح مولادن ائدوب هر ایکیسی استمداد
قوشونون حمله سی باشلاندی بولار ائتدی جهاد
چیره دستان بنی هاشم اولوب معرکه گیر
دالدالا وئردی ایکی صاحب شمشیر ایکی شیر
.
.
ائتدیلر بیربیره پیچیده کلف تک قوشونی
بیچدیلر سرعتیله هرزه علف تک قوشونی
سیندیروب سپدیله صحرایه خزف تک قوشونی
پوزدیلار نظم و نظام سپه اشراری
سر به زیر ایلدیلر عرصه ده کی فُجّاری
.
.
دئدی سعد اوغلی دوشوب رشتهٔ دعوایه دوگون
ایکی قارداش بیزه تنگ ایلدی میدانی بوگون
ال یتیشمز بولارا چون بیری آیدور بیری گون
ایکیسیندن بیرینه دگمسه میداندا یارا
قرعۀ فتحی چتین لشگر کوفه آپارا
.
.
ناگهان دگدی بیر اوخ یاره لنوب میر حرم
یارالاندی هاراسی پرده لی قالسون دئمرم
اکبرین قانی کیمی آخدی یره قانی او دم
نوش ائدوب یاره گوره نیش جفانون اولین
چکدی آتدان اوخی قویدی یارانون اوسته الین
.
.
شانۀ غم سوزومون زلفینی ایستور داریا
شل اولیدی اوخ آتان فاصله سالدی آریا
گوردی میداندا حسین چاره ائدنمور یاریا
دئدی عباسینه من معرکه نی ترک ائتدیم
دشمنون چوخدی اخا گوزله اوزوندن گئتدیم
.
.
یاره می خشک ائلیوم عرصیه الان گلّم
قویمارام اوخ یرینه خیمه ده درمان گلّم
باخمارام تشنه اوشاقلاره شتابان گلّم
نگرانم اورگیم هجریوه مشکلدی دؤزه
اوجا بوی سان گورونور قامتون هریرده گوزه
.
.
سوزی شرح ایلیورم سینه لری داغلاماقا
سیزه ده واردی علاقه بیلورم آغلاماقا
خیمیه گلدی حسین اوخ یاراسین باغلاماقا
آز زمان کچدی چاتوب مقصدینه اهل غرض
روزگارین ورقی دوندی اولوب صحنه عوض
.
.
ائشیدوبسوز بو سوزی مرثیه ده تکراری
قولاری گئتدی گوزی گئتدی بیلورسوز آری
مشکینی پارچالادی اوخ سویی اولدی جاری
باشینه ضربه یتوب غصه لی قلبین سیخدی
اوجا یردن او اوجا قامتی اوخلار یخدی
.
.
سوزدی من عرض ائلدیم قویما هوایه گئده، سن
قوی سوزی عقل ترازوسینه ای اهل سخن
ایکی قولدان بیر یوخ یوزنیده سنگین بدن
باشی اوسته یخیلان لحظه ده نه حاله قالار
اولماسا تکیه سی گور، یرده نه نوعی چوبالور
.
.
چون امان نامه نی رد ائتمیشیدی تاسوعا
شمری قوموشدی حریم نجبادن سقا
چوخ آغیر گلمیشیدی زادهٔ سعده گویا
ضربه ایستوردی حسینون یتیشه قارداشینا
پربها جایزه تعیین ائلمیشدی باشینا
.
.
بو دلیله گوره سر کرده لر ایلوردی تلاش
کسه لر باشین او قولسوز بدنه قالمیا باش
سینیق آئینیه بعضی سی وروردی گینه داش
غلبه یتمیشیدی طایفۀ خون ریزه
یارالی سینه سینه قالخوب اننده نیزه
.
.
نچه نامرد اونون دلده چوخالدوردی غمین
آلالار سینه دن ایستور دیله قانلی علمین
باشینه گتدیله ظلم و ستمین هر رقمین
علمین خاطرینه یرده او فرخنده لقا
گه دونوردی صولا چوخ زحمتیله گاهی صاقا
.
.
یتوروردی بو سؤزی رمزاً او نامردلره
قویدوز حسرت منی عنقا تک ایکی شاه پره
صاق گوزومده سوزولوب هئچ بیری گلمور نظره
وئرمرم پرچمیمی باوروز اولسون سوزومه
آبرودور بو علم هم ننمه هم اؤزومه
.
.
حجة ابن الحسنون عرضیمه شاهددی اؤزی
ناتوان جانیله نظم ایلدیم #انور بو سؤزی
آغلادی گوز اورگون اولمادی خاموش کؤزی
لنگ لنگان هله من مرکب عمری سوریم
آز قالور #یحیوی تک زیر لحدده چوریم
.
.
#عباسیه_شجاعت
#عباسیه_شهادت
#مطلبی_که_ائدورم_دفتریمه_پیرایه
#انور_اردبیلی
#صدای_عاشورا_انور
#ترکی
.
✍️ #زبدةالاشعار ✍️
?: @nohe_torki
نظر دهید