ای کمال اهلی باخون پستی دورانی گورون #فاطمیه_سیفی_اردبیلی

شهادت حضرت زهرا (س)
.
#زبدةالاشعار
.
: @nohe_torki
.
سیفی اردبیلی
.
ای کمال اهلی باخون پستی دورانی گورون
پیر دوشیزه ی پر غمزه ی دنیانی گورون
.
بو همان دهر پرآشوب و فتادور آیلون
اونا دل باغلیان اشخاصیده خُسرانی گورون
.
تیز قدّاره سالوب پنجه ی ضحّاک لره
دست چنگیزلره تاپشوروب عنوانی گورون
.
نه چوخ اسکندری لب تشنه قویوب چوللرده
چشمه ی خون ائلیوب چشمه ی حیوانی گورون
.
تیغ رستمله یاروب سینه ی سهراب لری
بلیوب قانه نه چوخ رستم دستانی گورون
.
دست شدّاده وئروب قدرت جور و ستمی
اوخ آتوب خالقه، سیز بنده ده عصیانی گورون
.
اویمیون اُلفتی صوری فلکون عشوه سنه
حقى إبقاده بو ویرانه یری فانی گورون
.
محک عقله ورون نفس سلیمون قزلین
بی ریا عامل اولون ارزش والانی گورون
.
دوشسه بش گون الوزه میز ریاست قلمی
قهروزی مهر ائلیون حکمیده میزانی گورون
.
قلموز جهد ائلیون گورمیه قدّاره ایشین
دوز قضاوت ائلیون اورتادا وجدانی گورون
.
داش وراندا ایته ده آختارشون صاحبنی
چشم اربابیله سیز حرمت دربانی گورون
.
جهد ائدون جهل مرکب یوخسیندان آیلون
معرفت قلّه سنه اوج ائدن انسانی گورون
.
سوزی قرآنه ئوزی خاتمه قارداش تانتان
کرسی عدل و دیانتده که مولانی گورون
.
داد مظلومه گوره قانی آخان محرابه
حامی بیوه زنان یار یتیمانی گورون
.
وصله لی باشماقیجان باغلامادی عالمه دل
روح انساندا گوزل بینش معنانی گورون
.
تأنماز کیمسه على تک بو دنی دنیانی
اور دییَن سوزده قوی منطق و برهانی گورون
.
پستی عالمه ایستورسوز اگر ساده دلیل
جور شیخینه باخون خیرة النسوانی گورون
.
او بتولی که اولوب شأننه کوثر نازل
ماخلقدن آپاروب رتبه ده رُجحانی گورون
.
او خانم که آدینا فخر ائلیوب ختم نبی
ای عجب سالدی غم و درده اونی ثانی گورون
.
ای قلم صدقیله ور غصه ی زهرایه رقم
وئر خبر خلقه گلون محنت عُظمانی گورون
.
دل گوزین ناظر ائدون حیدر کرار ائوینه
دست اعدا یارادان قورخلی طوفانی گورون
.
جبرئیل ئوپدیگی درگاهه باخون گورنه یانور
باب حقدن اوجالان آتش سوزانی گورون
.
ایاق آلتندا سِنور گوهر گنج نبوی
إلى قوینندا قالان سید أعلانی گورون
.
بو همان شخصیدی مرحب لری یخشمدی یره
جنگ صفین أحدده ید بیضانی گورون
.
بو هماندور که اونون خیبر آدیندان تترر
بیر سالون یادوزه بازوی توانانی گورون
.
گوزی چخسون فلکون گور کیمی گوزدن سالدى
دام روباهلره صید اولان اصلانی گورون
.
علی ائوده اوتوروب ثانی ورور ناموسین
وای عجب هرزه شیوخ ائتدیگی بلوانی گورون
.
نیلسون چخمادی امداد ائدنی قرخ نفره
دین و پیمان مسلمانیده نسیانی گورون
.
گئجه لبیک دینلر سحره داندی سؤزین
چوره گی نرخه یین شیخیده نقصانی گورون
.
قویمیوبلار قوریا ختم رسولون کفنی
در و دیوار آراسندا قزی زهرانی گورون
.
هانسی زهرا، او که طاها ننه سسلردی اونی
ایندی داغلی سینه سندن سوزولن قانی گورون
.
نه روا زینب امن سینه نی مسمار دله
سؤزدی عنوان ایلدیم شدت بحرانی گورون
.
او که بی پرده گورئمزدی یوزین شمس و قمر
الى سنسون نه آغیر سیلی وروب ثانی گورون
.
او که گزلتدی بؤیون دیده ی نابینادن
سیندی پهلولری کفر ائتدیگی غوغانی گورون
.
او الیکه علی ئوپمشدی تبرّکله اونی
دولادی قمچیه قنفذ تَفِ طغیانی گورون
.
نجه سیندیردی دیوم ثانی یاتان درگاهی
نه سیاق عمری اولوب فاطمه نون فانی گورون
.
آچیلوب باغلی قاپی فاطمه نقش اولدی یره
فکر ائدون ایندی بیر آز حالت طفلانی گورون
.
دور ائدوب چلچله لر قانه باتان طاووسی
هر یانان دلدن اوجالمش گوگه الحانی گورون
.
ننه نون سینه سینون قانی آخور غش ائلیوب
بالالاردان اوجالان ناله و افغانی گورون
.
بیری سؤیلردی نفسدن دوشوب أم النجبا
ال دعایه گوتورون رحمت منّانی گورون
.
بیری سؤیلردی آنامدان آتام اولدی مظلوم
تک قالوب حلقه ی اشراریده سلطانی گورون
.
بیزه زهرا ننه دی حیدره ناموس و شرف
سینه سینده او شهون شعله ی حرمانی گورون
.
بوردا بیر جمله ی باریک وار عنوان ائدورم
من یازوم سیز ائشیدون فیض تباکانی گورون
.
فاطمه تُپراقا دوشمشدی علی زنجیره
دام عفریتده بلقیس و سلیمانی گورون
.
زینب اول صحنه دن آلدى ئوزینه درس غمی
خامه ی حکمت تقدیریده انشانی گورون
.
ننه قالسون گلون ایندی بالاسندان دانشاق
کربلاده قوجالان زینب کبرانی گورون
.
شیر اولار شیره ی پستانین امن زهرانون
همت شیرزن کربِ مُعلّانی گورون
.
فاطمه آتدى اگر قنفذ آچان قمچیه ال
قزی زینب یاپشان خنجر عریانی گورون
.
سینه دن آخدی اونون قانی بونون اللردن
یاخچی اندیشه ائدون فرق دو چندانی گورون
.
سینه گورسه یارا شاید گینه ال چاره تاپا
الدن امکانی گیدن زینب نالانی گورون
.
قمچی دگمزدی باشا آل اولا بیلسیدی سپر
زینبون غملرینون واردی مگر سانی گورون
.
او یخلدى ئوز ائوینده بو ولی مقتلده
عمق محنتده گزون گرمی سودانی گورون
.
او گینه فضه نی سسلندی بو حیران قالدى
کیم واریدی ائده امداد او پریشانی گورون
.
او تلاش ائتدی مبادا که علی یاره لَنه
بو ولى شاهد أولان دوغرانان اعضانی گورون
.
او على دامننی چکدی آلا اللردن
نه قدر هر یارادان چکدی بو پیکانی گورون
.
او طنابی گوره بیلموردی على بویندا
بو قلنج آلتدا باخان حنجر عطشانی گورون
.
او گورنموردی علینون یاخاسین ثانی دوتا
بو باخوب شمر دوتان قانلی گریبانی گورون
.
تک باشا طى ائلدی عشق یولین دخت بتول
مرحبا عشقیده بیر قدرت شایانی گورون
.
قارداشی نوک جداده اوخیدی آیه ی کهف
ائتدی محملده باجی ترجمه قرآنی گورون
.
نیزه اوستونده اونون آلننا داش وردی عدو
بودا محملده یاروب باشینی وجدانی گورون
.
غم چکن دلبره باخ عشقیده بیر جوهره باخ
قولدا زنجیر بلا سینه ی بریانی گورون
.
صوت حیدر اوجالوب حنجره ی زینبدن
کاخ فرعونه گلون معجز موسانی گورون
.
بیلیسوز نیلدی زینب اُموی زاده لره
نکته باریکدی شعریمده که ایمانی گورون
.
نطق زینبله یزیدون ایلیون قهرین عیار
غرش شیره باخون روبه ترسانی گورون
.
چخدی زینب سؤزینون قانلی دوداقدان آجقین
خیزران نقشه سالان لبلری دندانی گورون
.
«سیفی» ام فاطمه نون نوکریَم نه زر و زور
عمر سرمایم اولان شعریله دیوانی گورون
.
.
#فاطمیه_سیفی_اردبیلی
#فاطمیه_شهادت
#ای_کمال_اهلی_باخون_پستی_دورانی_گورون
#ترکی
.
#زبدةالاشعار
.
: @nohe_torki