زبانحال امام حسین (ع) خطاب به مادرش
سوال و جواب
زبانحال امام حسین (ع)
#نطقه_گل_دردون_منه_آندور_آنا_یا_فاطمه
زبانحال حضرت زهرا (س)
#ایتمه_افغان_پوزما_زهرانی_حسینیم_آغلاما
.
✍️ #زبدةالاشعار ✍️
.
🆔: @nohe_torki
.
مرحوم تائب تبریزی
.
ایتمه شیون پوزما زهرانی حسینیم آغلاما
جانوه قربان آنان جانی حسینیم آغلاما
.
.
سن حسینیم آغلاما باخما آنان آغلار یانار
آتشین آهیله اودلی سینه سین داغلار یانار
دیدہ دن رخسارینه خون جگر باغلار یانار
آغلادان واردی بو نالانی حسینیم آغلاما
.
.
باخما من دولّام بولود تک اشگه سن دولما حسین
باغریقان اولّام باخوب من باغریقان اولما حسین
گل کیمی سولّام سارالّام سن بیله سولما حسین
من بو سولموش رنگ قربانی حسینیم آغلاما
.
.
غصّه لی گورّم سنی آرتار گوگلده نسگلیم
درده گلّم آغلینده سن گل اوزلی سُوگلیم
قلبیمی اودلار یانقلی سوزلرون شیرین دیلیم
اودلاما بو قلب سوزانی حسینیم آغلاما
.
.
من پیمبر گلشنینده گرچه بیر نورس گلم
ناله دن امّا بهاریمده نوالی بلبلم
نیلیوم گوگلوم آچیلمور بیر دیوب باری گولم
محنتیم چوخدور حسین جانی حسینیم آغلاما
.
.
سن خبر آلما ندن آغلار بولود تک دولموشام
بیر خزان دیده بهاری گل کیمی من سولموشام
ناامید اگلشمیشم حسرتله مأنوس اولموشام
دردیمین وار سرّ پنهانی حسینیم آغلاما
.
.
سرّی وار گوزدن آخار رخساره گوز یاشیم منیم
اود سالار آفاقه بو آہ شرر پاشیم منیم
کثرت غمدن آغاردی مشگ تک باشیم منیم
اولموشام غملر پریشانی حسینیم آغلاما
.
.
حقّیمی غصب ایتدیلر جانه دایاندیم ظلمیله
ووردیلار دربارمه اود منده یاندیم ظلمیله
محسنیم ئولدی حیاتیمدن اوساندیم ظلمیله
حق آلار بیر گون همین قانی حسینیم آغلاما
.
.
یوز چوؤردی دمبدم درد و محن سیلی منه
بیچدی خیاط قضا بیر جامۀ نیلی منه
گاه دشمن تازیانه ووردی گه سیلی منه
ظلمده قالموبدی نقصانی حسینیم آغلاما
.
.
بیر بیرینه اوندا که قاتل ایکی قانی قاتوب
سینه مه بیر آهنین مسمار او ساعتده باتوب
اولموشام پهلو شکسته ظلمیله سینم باتوب
قدّیم اولموش بیله چوگانی حسینیم آغلاما
.
.
آلمیشام بار مصیبت چوخ تن بیماره من
دوشموشم بیله ایاقدان حسرتم رفتاره من
یول گیدنده ایلرم تكیه اودور دیواره من
سن سوروشما وار نه عنوانی حسینیم آغلاما
.
.
باخما حسرتله منه گلمه بو قدری شیونه
قویما بوینون چگنوه گلسون اوغول دردون منه
آغلاما بیر بیله عالم لر گوزی آغلار سنه
آغلادان سنسن بو دنیانی حسینیم آغلاما
.
.
گوزلرون قربانیم اولما بیله مهموم سن
من نجه مظلومه ام سنده ایله مظلوم سن
من شهیده سن قتیل اشقیای شوم سن
ای منای عشق قربانی حسینیم آغلاما
.
.
بیر یانا هر غم سنون دردون حسینیم بیر یانا
بیر یانار اود دور غمون مطلق سالور آتش جانا
غملرون یاد ایلینده آز قالور دل اودلانا
اولموش آه و ناله عنوانی حسینیم آغلاما
.
.
یاده سالّام کربلانین شورش و غوغاسینی
بو بلالی زینبین بیر محشر کبراسینی
کربلا صحراسینین تشکیل عاشوراسینی
ایسل دار اشکیم بو دامانی حسینیم آغلاما
.
.
غرق اولار قانه سنیله اوردا یتمیش بیر نفر
بعضیسی پیر و جوان لب تشنه بعضی سودامر
قانلاریله تک به تک اول قانلو صحرانی بَزَر
لاله زار ایللَّه میدانی حسینیم آغلاما
.
.
ال تاپار اوردا حقیقت اهلینه اهل مجاز
ئولدورر تشنه نماز اوسته سنی اهل نما
باشون اوسته باش آچار یکسر خواتین حجاز
دولدورار شیون او صحرانی حسینیم آغلاما
.
.
اوردا ظلمیله قالار بی خانمان بیچاره لر
بیر یانان خیمه قورالّار آخر اول آواره لر
ماتمون ساخلار قرانلیقدا او باشدا قاره لر
خوار اولان شام غریبانی حسینیم آغلاما
.
.
ایله بیر ماتم سرا که هرکس آغلار بیر کسه
فاطمه مشکل قزیندان رشتۀ الفت کسه
اوردا گلّم منده ویرّم زینبیله سس سسه
قویمارام یالقیز او نالانی حسینیم آغلاما
.
.
اوردا اولّام دادرس بیر عدّه قاره پوشه من
هر بالا گیتسه اوزیندن تئز گتورّم هوشه من
چولده قالسا هر بیری آلّام اوزوم آغوشه من
اولّام اطفالون نگهبانی حسینیم آغلاما
.
.
قتلگهده گه ربابین دلدن آلّام سوزلرین
گاه سیلّم خیمه ده نازلی رقیه گوزلرین
بوسه قیلّام رأفتیله قزلارین گل یوزلرین
سالمارام گوزدن صبایانی حسینیم آغلاما
.
.
رنجبر ویردی نشان ایمائیله راه صواب
بو زبانحالی تائب ایلدی زیب کتاب
گوئیا ویردی حسینه فاطمه بیله جواب
ایتمه شیون پوزما زهرانی حسینیم آغلاما
.
.
.
.
#فاطمیه_تائب_تبریزی
#فاطمیه_شهادت
#ترکی
.
✍️ #زبدةالاشعار ✍️
.
🆔: @nohe_torki
نظر دهید