((زبانحال حضرت زهرا(س) بر راس بریده امام))
.
.
محمد علی مصیبی تبریزی
.
.
ای کول اوستونده یاتان باش منی یاندیرما بئله
آناوام آچ گوزیوی بیر منه خوش گلدون ائله
آناوام آچ گوزیوی
دێ محبت سۆزیوی
.
.
.
بو نه عالمدی باشین قانیله غلطاندی حسین
بو تنورین اودونا فاطمه اودلاندی حسین
ئورگیم یاندی نِئجِی کی قاپیمیز یاندی حسین
بو همان اوتدی تنور ایچره ائدوبدور نَزَله
.
چاتدون آخر نه گوزل کعبه مقصوده اوغول
وصل اولوب منزلتون درگه معبوده اوغول
یاتمیسان کوللرین اوستونده نه آسوده اوغول
سنی زهرا گوزون آچ تا ئورگیم گلسین اله
.
شام اولوب بزم مناجاتیده عشقون سحری
فاش اولوب کرب وبلاده باشیوین سرّ و سَری
گوره سن یوخدی بو خولی ائوینین آیری یری
کول ایچینده یئر ائدوب هاتف سرّ ازله
.
باشیوین آردیجا گئتسن هارا گللم گوزلیم
گوز آچوب عشقیله گولسن گینه گوللم گوزلیم
قانلی باشیندان ئوزوم کوللری سیللم گوزلیم
باغریقان فاطمه دن ائتمیَسَن بلکه گله
.
بسترون فکر ائله مزدیم اولا برگ تر اوغول
ایندی اما کول اولوبدور باشیوا بستر اوغول
اولا چرخ فلکین باشینه خاکستر اوغول
بو نه عالمدی گلِ فاطمه غلطاندی کوله
.
چرخ گردون بوتون اوباشی ییغوب دوره سینه
بیر نفر یوخ وئره سس بیکس آناوین سسینه
مطبخین گوشه سی مسکن دی علی زاده سینه
آه و افسوس بو اوباش جحیم ثقله
.
گول صولان وقتی دیئللر گوزی شبنم دیدی
عاشقون زمزمه سی سینۀ همدمدیدی
وار یادیندا باشیوین منزلی سینمدیدی
ایندی خاکستر اولوب منزل او شمس و زحله
.
گله حاشا بئله دنیایه مثالون گوزلیم
لوحه زینت اولاجاق شرح مقالون گوزلیم
مطبخی طور ائلیوب نور جمالون گوزلیم
گویلومی آل بوکولن قامت زهرا دوزله
.
سنیلن منده حسین دشت بلاده واریدیم
داش دگنده باشیوا قانلی مناده واریدیم
ووریلاندا بو باشین نوک جداده واریدیم
واریدیم هاردا دوشوردی بو باشون الدن اله
.
محویدیم کربوبلاده قورولان محشریوه
قان دولان گوزلره قمچی وُرولان اللریوه
اوخلار اولموشدیلا خلعت یارالی پیکریوه
چرخ گردون یولین آچمیشدی او قوم دغله
.
گه سیلوردیم سینه وین قانینی گه حنجریوی
ناگهان گوردوم او چوللرده کی غارتگریوی
ساربانیدی کی گلمیشدی کسه اللریوی
زلفیمی یولدیم حسین باخجاق او جنگ وجدله
.
مرغ عشق ازلی طعمۀ کرکسدی اوغول
باد صرصر او چوخور قتلگهه اسدی اوغول
ساربان گوردی ایشین اللریوی کسدی اوغول
دئدیم آلله بو شب اوّل ِ سودادی هله
.
نعشیوین سمتینه گوردیم کی بیر ارذل گلوری
بارماقیندا گوروب انگشتری اَغفل گلوری
اگیلوب بارماقیوی کسماقا بجدل گلوری
کسدی بارماقیوی انگشتریوی سالدی اله
.
کوفه نین اهلی شرافت لرینی پوله ساتوب
کیم گلوب مقتله ساری اوخ آتوب خنجر آتوب
یوزیوین شعشعه سیندن بوگئجه آیدا باتوب
باتدی آی ، چیخماقینا ائتمیه جاقدور عجله
.
وُریلوب قانلی باشون نوک جدایه سر ِشب
آت چاپوبلار سینه وین اوستونه اوباش عرب
گورونور اون ایکی خنجر یری باشینده عجب
گور نئدوب کوفه لیلر گلمیش آنان بیله دیله
.
نیزه ده باشیوی مهتابه من اوخشاتدیم حسین
دیمه بیر لحظه گوزومدن گوزیوی آتدیم حسین
زلفیمی حنجریوین قانینه ایسلاتدیم حسین
بوغازون یاره لری آز قالوری قلبی دله
.
باشیوین وار نه یاراسی اونا مرهم ئوزومم
نفسیم گلموری امّا دم عالم ئوزومم
ناگران قالما اوغول زینبه همدم ئوزومم
حق دئسه دم وئررم حیّ اولونار هر قَتَله
.
گوزلیم باشیوین عشقینده کواکب آغلار
کیم ده وار چشم حزین سینۀ طیّب، آغلار
قان یازار لوحه قلم ، چشم «مُصَیـّب» آغلار
عشقیوی زینت ائدر لوحه یازیلمیش غزله
.
.
#تنور_خولی
#ای_کول_اوستونده_یاتان_باش_منی_یاندیرما_بئله
#مصیبی_تبریزی
#ترکی
.
نظر دهید