زبدةالاشعار

بیلمم گیدیم مراحل عرفانی سیر ائدیم #فاطمیه_هدایت_تبریزی

فاطمیّه
16 بند
.
.
محمد هدایتی تبریزی
.
.
بند ۱
.
بیلمم گئدیم مراحل عرفانی سیر ائدیم
مجنون کیمی و یا کی بیابانی سیر ائدیم
.
ابراهیم ئیله همدم اولوم بین نارده
آتش ایچنده باغ و گلستانی سیر ائدیم
.
یا کی منای عشقده قربان کسیلماقا
اسماعیل ئیله حکمت قربانی سیر ائدیم
.
آرامشیله کشتی نوحه سوار اولوم
بحر بلا و غرّش طوفانی سیر ائدیم
.
یونس کیمی آتیم ئوزومی کام ماهیه
دام بلاده رحمت رحمانی سیر ائدیم
.
مین حسرتیله سسلیوم ارنی نگاریمه
حال نزار موسی عمرانی سیر ائدیم
.
لن ده دئسه ، رئاٰ ده دئسه نوش دور منه
ایستک بودور کی رحمت جانانی سیر ائدیم
.
عیسیٰ نفس تاپولمور اولام همنشین اونا
گر پا پیاده عالم امکانی سیر ائدیم
.
بسم اللّهی دئیب سو یوزونده یولا دوشوم
ناباورانه قدرت ایمانی سیر ائدیم
.
دنیانین عیش و نوش نی دنیایه بذل ائدیم
حور جنان لا جنّت رضوانی سیر ائدیم
.
پیمانه الده ، گردن جانان دا بیر قولوم
صحّه قویوم ئوز عهدیمه ، پیمانی سیر ائدیم
.
واردور هوس باشمدا تاپام سلطه عالمه
تا حشمت ئیله کاخ سلیمانی سیر ائدیم
.
فرش اوسته عرش و فرشی گزیم دید بازیله
جلوات حسن خالق سبحانی سیر ائدیم
.
خلقت گوزل دی نعمت الوان شماره سیز
قدرت یوخوم دی نعمت الوانی سیر ائدیم
.
چوخ گوگلوم ایستئیر ائله بیر قدرتیم اولا
لحظه به لحظه خلقت انسانی سیر ائدیم
.
حکم ایلینده سجدیه خالق ملائکی
حکم حقه تمرّد شیطانی سیر ائدیم
.
عُجب عالمنده منطق ابلیسی درک ائدیم
حق محضرینده شدّت طغیانی سیر ائدیم
.
ایلئم نظاره عرش ده عالّین جمالینه
ارباب فضل و منبع احسانی سیر ائدیم
.
اندازه می نه خوشدو بیلیم ، درک ائدیم کیمم
واقف اولوم حقیقته میزانی سیر ائدیم
.
آللّهی ذکر ائدیم ئورک آرامشه چاتا
دردیم زیاده اولسادا درمانی سیر ائدیم
.
حال و هوای دوزخه ده بیر نظر سالیم
شرب حمیم و آتش نیرانی سیر ائدیم
.
گوگ لرده کهکشان لاری ، سای سیز ستاره نی
گوردوقجا ، نظم حیّ توانانی سیر ائدیم
.
تیر شهاب ئیله قوولان دا اجنّه نی
گوی ده حضور جمله نگهبانی سیر ائدیم
.
گوردوم محالدور عملی فکریمی اولا
اولدی حواله ذهنمه قرآنی سیر ائدیم
.
قرآن عمیق بحردی ، عمقی پر از گهر
قرآن دا دور تمامی اخبار خشک و تر
.
بند ۲
.
قرآن کتاب عشق دی یوخدور برابری
قرآن طهور دور ، اونا اطهار مشتری
.
قرآن کتاب معرفت و عشق و اعتلا
ائتمش افاضه آیه ی پاک و معطّری
.
قرآن کتاب حکمت و عرفان و تزکیه
ایقان تاپار کیمین اونا گر اولسا باوری
.
قرآن کتاب مِکیَل و میزان و تربیت
قرآن جدا ائدیب دی مطلّائیله زری
.
قرآن دئیبدی منکر و مفسد علامتین
قرآن تانتدربدی بیزه آل اطهری
.
قرآن نشان غالب و مغلوبی فاش ائدیب
قرآن دئیبدی رمز و نشان مظفّری
.
قرآن حقوق حقّه نی خلقه بیان ائدیب
قرآن دی متّقی نی وئرن خلقه برتری
.
قرآن مجاهدین دئیب ارج و مقامنی
قرآن مذمّت ایلیب الحق فسونگری
.
قرآن کتاب زندگی و علم و اجتهاد
کلماتی نور و گوهر و هر عیب دن بری
.
قرآن دلیل راه و ربیع تفضّلات
قرآن یئتردی اوج علایه پیمبری
.
قرآن صفیر صوت خداوند ذوالجلال
قرآن مریض شرک و جهالت شفا گری
.
قرآن کتاب صلح و صفا و ولا و مهر
قرآن دی جود و حسن و کرامات محوری
.
قرآن دی علم و منطق و سلک و صراط عشق
قرآن دی سالکین پر پرواز و شهپری
.
قرآن کلام فوق بشر ، رهنمون خلق
قرآن دی راه حقه چکن گبر و کافری
.
قرآن دی آب کوثر و تسنیم و سلسبیل
قرآن دی بی بدیل و طهارات مظهری
.
قرآن دی عرش و کرسی و قرآن دی بیکران
قرآن دی کهکشان هنر ، فیض داوری
.
قرآن ارم دی ، عدن دی ، رضوان دی اهلینه
چکمش مقام قربَ سیه چهره نوکری
.
قرآن ائدیب دی روزبهی اهل بیت دن
قرآن یئترمیش عزّت منّایه بوذری
.
قرآن پیمبره ملکوتی وئریب نشان
آگه ائدیب دی کون و مکانه او سروری
.
قرآن وئریب علی الینه ذوالفقار عشق
تاج شرفله افضل ائدیب اول دلاوری
.
قرآن شرنگی شهد ائلیب کام حیدره
ممتاز ائدیب دی سلم ده ، تقویٰ ده حیدری
.
قرآن وئریب دی فاطمیه عالی امتیاز
تخصیص ائدیب دی سرور نسوانه کوثری
.
قرآن آغیر امانتیدی اهل بیت ئله
یاد اولدی مصطفیٰ سوزی آرتدی دل آذری
.
قرآنی اهل بیت دن آیرلماسئن دئیب
یاددان چخارتدیلار نجه بو حکم اشهری
.
دفن اولمامشدی پیکر پاکی او سرورین
اینجتدیلر سقیفه ده روح مطهّرین
.
بند ۳
.
لعنت سقیفه ده چکیلن طرح ظلمته
غاصب لر انتخاب ائلین کج طریقته
.
بیر نقشه چکدیلر کی جهان تا جهانئدی
اهل جهانی سالدیلا دام مصیبته
.
صدیق اکبر آدین علی دن گوتوردولر
نصبت وئریب له بی شرف و بی صداقته
.
بیر ظلم اولوندی مثلنی گورمز جهان گوزی
تیشه ورولدی ریشه ی دین و شریعته
.
دین باغنه سموم ستم اسدی ناگهان
صدمه یتشدی گلشن و باغ رسالته
.
عزلت نشین ائدیبله پیمبر خلیفه سین
لطمه وروبلا عهد و وفا و شرافته
.
کهنه لمه مش پیمبر عزاسی مدینه ده
ال وردولار رذیله صفت لر رذالته
.
گلسین گرک علی دئدی لر بیعت ائتماقا
دعوت ائدیب له فاضلی مفضوله بیعته
.
پیغمبرین عزیزه سی پشت دره گلیب
دعوت ائدیب دی امّتی راه هدایته
.
فرمایش ائتدی ساکت اولون ، شورش ائیمئین
تمکین ائدین مودّته چکسین سعادته
.
عالم تانور بیز عترت پاک پیمبروخ
حق دعوت ایلیب بیزه خلقی مودّته
.
قرآن و عترتی سیزه تاپشردی مصطفیٰ
علّت ندور خیانت ائدیرسیز امانته
.
بوبکر ائدیب دی منبر پیغمبره جلوس
خیبر شکن علی سخلیب کنج عزلته
.
غصب ایله دیز حکومتی بیزده نه ایستیسیز
چکدیز عموم امّتی راه ضلالته
.
بیز راضی یخ رضای خداوند قادره
دین ساحه سینده حاضریخ هر دم رشادته
.
ایثار و جود و بخشش و احسان بیزیم کیدی
گوز تکمئیب دی آل پیمبر حکومته
.
چوخ دردمیز وار ال چکین اینجتمئین بیزی
سالمون پیمبر عترتین آرتیق مشقّته
.
افسوس هر نه دل دئدی تأثیری اولمادی
سردسته ی شرارت اولان بی مروّته
.
نمرودیان شراره چکیب باب رحمتی
آل الّهیله ایش چکلیب دور کدورته
.
اود شعله لندی یاندی ملک اذن آلان قاپی
شرّ اهلنین الی آچلیب دور شرارته
.
ناگه فشاریله آچلیب دور یانان قاپی
پیغمبرین عزیزه سی دوشدی مرارته
.
دیوار و در سوزون اوتانیر شرح ائده قلم
اوخشار نجه دئیم کی او صحنه قیامته
.
محشرده کیمدی عرصه نی زهرایه تنگ ائده
اهل فضیلتی سالا دام مذلّته
.
آیا نجه دئیم نه حالا قالدی سینه سی
درمان تاپلمادی سینه اوسته جراحته
.
دیوار و در فشاری اونا اولدی پر خطر
نقش اولدی صحن خانیه محزون و پر شرر
.
بند ۴
.
سسلندی فضّه گل منه تنگ اولدی روزگار
سندیم ، گوزوم قارالدی ، گئدیب الدن اختیار
.
دردیم آغردی ، یوخدو توانیم بیانینه
گل روزگاریمی نجه گور ایلیبله تار
.
سینه مده وار یارا ، دیزیمین یوخدی طاقتی
یاندردی آستانیمی ظلمیله اهل نار
.
دیوار و در سخان دا نه چکدیم خدا بولور
سقط اولدی محسنوم ئوزوم اولدوم جریحه دار
.
تئز گل یامان گونوم دی یوخومدور توان دورام
طاقت گئدیب دی صلب اولونوب الدن اقتدار
.
فضّه ئوزون یئتردی او بانوی اطهره
بیر حالدا گوردی فاطمه نی صلب اولوب قرار
.
سسلندی یا علی ئوزووی تئز یئتر گیلن
ئولدوردولر بتولی ایا سیّد کبار
.
سینه یارالی دور خانمئن ، سقط اولوب بالان
زخم ستمله فاطمه نین سینه سی یانار
.
یارین یامان گونون ده یئتر یاری دادئنه
زهرا یامان گونه قالیب ای غملی شهریار
.
اگلشمه ، گل ، بتولی ایاقدان سالیب عدو
بی پرده نقش اولوب دی یئره معدن وقار
.
قویما پیمبرین گولون اعدا ایاقلیا
تأخیرئن اولسا بو گولو گولچین ایاقلیار
.
چک ورطه ی خطردن امانگاهه یاروی
گل گور نجه جفاسین عدو ایلوب آشکار
.
خیبر آچان علی ائشدیب فضّه نین سسین
گوزلر دولوب ئورک آلشئب اولدی پر شرار
.
صحنه چخاندا فاطمه نی گوردو پرده سیز
فوراً عباسی ئیله اونو ائتدی استتار
.
صحننده گوردو صحنه ی محشر اولوب بپا
دولموش حریم عصمته اشیاخ کین شعار
.
صبر امامی غارت ائدیب دور بو ماجرا
الدن وئریب قرارین اولوب دیده اشکبار
.
بوالفتنه نین ال آتدی گریبانینه چکیب
یخدی ایاقی آلتدا ، اولوب سینیه سوار
.
طغیانوین دئدی اوجالیب عرشه توستوسی
شرم ایلمورسن هئچ عملیندن ، جفا شعار
.
گر اولمییدی ختم رسالت وصیّتی
بو نحس پیکریندن ائدردیم باشون کنار
.
واقف سن هئچ کیمین قاپی سین چکمیسن اودا
جبریل ادبله وارد اولا ، بوردان اذن آلار
.
پیغمبرین وصیّتنی بیلدی ثانی تا
قئلدی اشاره دورمیون ای فرقه ی شرار
.
فوراً گلین علی نین الیندن آلین منی
شیر خدانی سینه مین اوستن قلین کنار
.
قورتاردی ثانی ، بنده گئچیب مرتضیٰ الی
بیلمم ندن داغلمادی بو چرخ کج مدار
.
شالین سالیب لا بوینونا باغلاندی قوللاری
ایوای ، رعیّت ایسته دی ائتسین امامی خوار
.
عرشه نوا اوجالدی گلیب گوی تلاطمه
سس کی اوجالدی گوزلرینی آچدی فاطمه
.
بند ۵
.
طاقت گترمه دی گوره یارین فسرده حال
دوردی حمایت ائتدی علی دن او خوش خصال
.
من قویمارام دئدی سیزیلن مرتضا گئده
آزاد ائدین عم اوغلومو ای قوم بد سگال
.
درک ائتدیلر علی نی آپارماق محال دور
زهرا علی دن ال چکه ، بیر امردور محال
.
اولدی اشاره قنفذا کی ایش قالیب سنه
وقت عمل دی ، ایلمه بیر دم ده اغتفال
.
قنفذ ال آلتدی قمچیه یا صاحب الزّمان
بیر ظلم ائدیب کی اولدو خانم دان توان ذوال
.
زهرا یخلدی کون و مکان دگدی بیر بیره
صبر ایلدی بو ظلمه عجب ذات لایزال
.
زهرا یخلدی ، اولدو علی نین ائوی خراب
اولدی اسیر اهل شرر شاه با جلال
.
دنیایه باخ کیمی ائلیب گور کیمه اسیر
تاپسین جهان گرکدی بو محنتدن اشتعال
.
طعنه ورا ورا او شهی چکدی مسجده
بیر عدّه مست جام ریاست شقی رجال
.
طاها باخشلی گوزلرینی آچدی فاطمه
فوراً عم اوغلوسون ائلدی فضّه دن سؤال
.
گلدی جواب عم اوغلووی زهرا آپاردیلار
بیلمم نه نوعی دوردی یئرینده او با کمال
.
پیراهنین عوض ائله ماق ممکن اولمادی
یوخ یئر یوبانماقا گوروب ، الدن چخیر مجال
.
تعجیلیله عباسنی سالدی باشا خانم
دوشدی یولا فسرده و زار و شکسته بال
.
بیر ال قابورقادا ، بیر الی قانلی سینه ده
دلده علینین آدی ئورکده غم و ملال
.
هردم دئیردی حفظ ائله آلله علینی سن
یوخ بیر کسی ، اسیر ائلیب فرقه ی ضلال
.
بیلمم ئوزون یئتردی نه نحویله مسجده
درگاهئنه دایاندی توکوب گوزدن اشک آل
.
طاقت گتیرمه دی گوره قول باغلی حیدری
فرمایش ائتدی ال چکین ای فرقه ی شِمال
.
شیر خدادن ال چکین آز ایلئین ستم
گوردی ، گورونمه دی ستم اهلندن انفعال
.
پوزقون حالی پوزولدو الین آتدی معجره
مسجد تزلزل ایلدی ، قوزاندی قیل و قال
.
سلمانه امر ائدیب دی شهنشاه نه قباب
قویما بتول آچیب باشنی ائتسین ابتهال
.
اوضاع ائله دولاندی دوشوب نطقدن عدو
جان لار دوشوب دی واهمیه دل لر اولدو لال
.
خیبر آچان علی الینین بندین آچدیلار
قبر رسوله دوتدی یوزون ایلدی مقال
.
بو قوم آنام بالاسی منی ایلدی ضعیف
قتلمده نقشه طرح اولونوب ایلورم خیال
.
خوش گون سنیله گئتدی بیزیم خانواده دن
ظلم اهلی سالدی عترت و قرآنه انفصال
.
مشکول گشا علینین آچیب مشکولون بتول
عزم ایلیوبله منزله محزون دل ملول
.
بند ٦
.
قربان اولوم دئدی سنه ای شاه انس و جان
قوی باشوه دؤنوم نه قدر جاندا وار توان
.
ای کعبه ی ولایت و ای کونه مقتدا
عشقیم ، وقاریم ، عزّت و شأنیم ، منه روان
.
غم چکمه یوخدو یار و هوادار و یاورین
زهرا سنه کمک دی ، منم حالوه یانان
.
سنسین قابورقا ، قول ، یارالی سینه گوینه سین
اولسون یارالی سینه غم و محنته نشان
.
شخصیّتین سنین ولی ایکاش سنماسئن
سن سن امید و ملجاء و میر جهانیان
.
غم چکمه کی مدینه لی لر آتدیلار سنی
حرمتله آدووی گتیرر گوگ ده قدسیان
.
فضل و کمالوی بیله بیلمز بو اهل شرّ
سجده ائدر قدم لریوه اهل آسمان
.
سن لنگر زمین و زمان سان ، سنه فدا
صد حیف اولا کی قدرین اولوب خلق دن نهان
.
ای قهرمان بدر و احد ، خندق و حنین
ای جان بکف مجاهد و سردار جانفشان
.
تا جان بدنده وار ، سنه قویمام خطر یئته
ایثارئمی محبّتمی ایلرم عیان
.
قلبین سنق دی ، غصب اولونوب دور خلافتین
خانه نشین ائدیبدی سنی گردش زمان
.
سنمش منیم ده قلبیم ، الیمدن فدک گئدیب
گولزاریمه خزان یئلی جبراً اولوب وزان
.
تنگه دوشوب معاشمئز ، اولما ملول آقا
صبر ایلرم چتین لقا چوخ اولما ناگران
.
باشون اشاقه سالما ، بئله چکمه آه سرد
افسرده سن اولاندا ، اولور گوزیاشیم روان
.
یوخدور وفاسی اهل زمینین ، سنه فدا
سرمست اولور گلنده آدین ، جمله عرشیان
.
آی دا ، ستاره لرده ، سنه ایلر اقتدا
ایستر قدوموه دوشنه گویده کهکشان
.
سن شاهراه عشق و وفا و وقار سن
ای مرشد سرآمد و ای سرور جهان
.
هفت آسمان دا ساکن اولانلار باخار سنه
طوبیٰ سنین جلالوه ای میر مهربان
.
نیزه گوجیله لذّتی یوخدور حکومتین
دل لرده وار حکومتین ، ای میر مؤمنان
.
غم چکمه یاندی درگه میز ، وردولار منی
اولدی بیزه فضیلت میز درد جانستان
.
افسوس اولا سنین کیمی سلطان عادلی
خانه نشین ائدیبله جفادن ستمگران
.
قلبیم یانیر ، قوجاقلاما بو نوعی دیزلرون
قلبیم قانی گوزومدن اولور صورته روان
.
مین یول دا ورسالار منی ، تک قویمارام سنی
غم چکمه ضربه دن گوزومه لکّه سالدی قان
.
پهلو شکسته یم قولوما قمچی یئر سالیب
میخ درین یاراسی منی ائتدی ناتوان
.
دردیم چخیب یادمدان آقا آغلارام سنه
بو دیزلرون قوجاخلاماقین درد اولوب منه
.
بند ۷
.
نئیلیم آتام ئولندن اولوب محنتیم زیاد
نه بیر یوزوم گولوب ، ئورگیم نه اولوب دی شاد
.
مهر و وفا کوچوب دی آتام لا مدینه دن
زندانی اولموشوخ ، بیزه زنداندی بو بلاد
.
یوخدور صفا ، عدالت ئولوب ، دفن اولوب شرف
بازار عدل و صدق و صفا چوخ اولوب کساد
.
کذّاب اوتوردی منبر طاهاده بی درنگ
رهوار اولوب دی طاغی لره مرکب مراد
.
شدّاد روزگازه عجب بختی یار اولوب
تخت شرافت اوسته چخیب ایلدی فساد
.
بیداد اوتوردی داد ائلیه دادگاه ده
بیداد داد ائدنده ، اولار خوار عدل و داد
.
ایشلر عوض اولوب ، کسیلیر حق دئین زبان
دین دوشدو مشکوله ، آرادان گئتدی اعتقاد
.
آخر بو نه روش دی ، بو نه راه و رسم دور
جور و جفای حاکمه اولمور هئچ انتقاد
.
هر کیم کی بیعت ایله میور اهل جوریله
فوراً قویوللار اوستونه بیر نامناسب آد
.
آخر کیمه ئورک ده اولان دردیمی دئیم
بیعت ندن گرک ائده فسّاده پاکزاد
.
ترویج دین ائدور ، او کی دینی دوشونمئیب
اِشرافی یوخدو دینه و لیک ایلور اجتهاد
.
اصلاح ائدم جماعتی چوخ ایلدیم تلاش
وئرموب ثمر فسوس اولا من ائتدقیم جهاد
.
قرآنه پشت پا ورولوب ، رسم و ره دونوب
غصب ایلیوب خلافتی نادان بد نهاد
.
انصاف دور یالانچی خلافت ده اگلشه
عزلت نشین اولا چکه آه ائوده مرد راد
.
یوخ چاره دای ، دؤنرگه دؤنوب ، بد گلیب زمان
یوخدور داخی مهاجر و انصاره اعتماد
.
بیت الحزن ده من اوتوروم ، اگلش ائوده سن
بو نوعی اعتراض ائلیاخ سنسین انجماد
.
دلده آتا آدی سنه من آغلورام آقا
من انقلابی ام ، منه بیت الحزن ستاد
.
آهیم یخار بو قوم پلید و ضلالتی
حقدن کمک لیق ایستورم ای میر با وِداد
.
قارنی جرلسین اود ورانین آستادنیمه
بیزده نه عیب تاپدی ، نه یه ائتدی استناد
.
شرعین حلال حرامنه بیزدن یوخ عارفی
الگو بیزیخ بو امّته ، بیز رهنمون و هاد
.
خلقت ده کیمدی علم ده اولا اولا سنه
بیراهه گئتدی آتدی سنی فرقه ی عناد
.
رخسار زردئمه یازارام قانلی اشکیله
بد گلدی روزگار علیَ اولدو غم شداد
.
روشندی بو قضیّه نین آخر عواقبی
با فاطمه هر آنکه در افتاد بر فتاد
.
دؤزدوم تظلّمه ، نجه دؤزدوم خدا بولور
ساعت به ساعت اولدو غم و دردیم ازدیاد
.
دوشدوم ایاقدان اولدو گونوم قاره یا علی
عمروم قوتاردی یوخدو منه چاره یا علی
.
بند ۸
.
رؤیاده گورموشم بابامی گلدی دعوته
دعوت ائدیب بابام منی تئزلیقجا جنّته
.
اگلش یانمدا باخ یوزومه ای طبیب عشق
منده باخیم سنه یئتشیم فیض لذّته
.
باشه یئتیر وصال مئز افسوس اولا آقا
قالدی وصال فیضی علی جان قیامته
.
بیرده گورنمه سن منی عمروم باشا یئتیب
فرصت قوتاردی ، ایله عمل بو وصیّته
.
وئر غسلومی ئوزون ، کفن ایله ئوزون منه
یئتسین محبّتین منه خاطر نهایته
.
قویما نمازئمه اولا حاضر بو قوم دن
مین فتنه ایله یوردو منی سالدی زحمته
.
ناراضیم بو قوم دن ای راز دار عشق
سالدی بولار نه قدری بولورسن اذیّته
.
سینه یارام ، قابیرقا ، قولوم شاهدیم دی لر
محنتدن اولمادی یئتشم بیر فراغته
.
واردور شکایتیم آتاما بو گروه دن
یوز قویدولار بو اهل شرارت شرارته
.
یاندردیلار ملاکه گلن آستانه می
سندردیلار حریمیمی سئیر ائت شقاوته
.
دوشدوم فشاره ، دگدی یارا ، تنگه دوشدو جان
باخ جانیان مرده دله ، باخ جنایته
.
باخ تازیانه ردّینه مولا ، قولوم دادی
باخ بیر منه جفا و جسارت ده شدّته
.
قورخوم بودور کی محسنومون ده باتا قانی
گوز آچمامش جهانه یئتشدی شهادته
.
گیزلنجه دفن ائله منی کشف ائتمه قبریمی
گیزلنجه گل مزاریمین اوسته زیارته
.
تابوت ایچنده حمل ائله قبره جنازه می
صبر ایله یوخدو چاره علی جان مشقّته
.
فرقت یاخنلاشیب دی ، گوزوم نوردن دوشوب
واردور نیازیم ایندی عم اوغلی حمایته
.
خوش گون لری سنیله گئچیب عمرومون آقا
ایندی ولی دچار اولوروخ درد فرقته
.
مین زحمتیله بسله میشم دورت گوزل بالا
هر دوردی گول دو ، واردی نیازی طراوته
.
قویما سولا بو گول لریمی درد و غصّه دن
ئولسه آنا دوشر بالالار درد و محنته
.
ایله نوازش ، آغلیانین سیل گوزون ئوزون
وار احتیاجی جمله یتیمین محبّته
.
چوخدور بلاسی باشلارنین بو بالالارین
آینده ده دچار اولاجاقلار مرارته
.
مظلوم اولار ، حسن بالاما بد گئچر زمان
آخر عیالی زهر وئرر ، باخ کدورته
.
واردور حسین باشندا ولی آیری ماجرا
ایلر نجه تحمّل او قدری جراحته
.
بو زینبیم نه قدری گرک دور صبور اولا
اعوانی دوغرانئب ئوزی گئتسین اسارته
.
آغلار گوزیله باشه یئتردی وصیّتین
سوندوردی اشک دیده ئیله دل حرارتین
.
بند ۹
.
وقت اولدو گوز یوما بو جهان دان او گلعذار
احضار ائدیب دی محضره اسمانی دلفکار
.
فرمایش ایلدی یئریمی رو به قبله سال
حلّ ائتماقا اموریمی یوخ منده اقتدار
.
وارد اولوب دی بستره قئلدی اشاره کی
چک اوستومه قتیفه ، بئله اولما اشکبار
.
چئخ صحن خانیه ، دارخان دا گل ائت صدا
چوخ صحن خانه ده دایانیب چکمه انتظار
.
وئررم جوابوی نفسیم باتماسا اگر
اوللام سنیله همنفس ای یار غمگسار
.
سس وئرمه سم اگر سسیوه بیل ئولوب بتول
اسماء چخبدی صحنه سکوت ائتدی اختیار
.
بیر قدر مکث ائدیبدی یانا یانه صحن ده
ناگه اولوب دی قلبی غم و محنته دچار
.
الدن وئریب تحمّلونی ، ناگران اولوب
زهرانی قصد ائدیب اویادا اول وفا شعار
.
بالینینه گلیب دئدی یا بنت مصطفیٰ
ای خلقتین سرآمدی ، خلقت ده شاهکار
.
ای خلقتین گوزل لئقی ، طاهایه نور عین
آچ گوزلرون ، گوزوم ده گونوز اولدو لیل تار
.
وقت نمازدور ، بو نجه خواب نازدور
دور آسمان لار اهلی سنه ایله سین نظار
.
دور ، یومما گوزلرون ، او گوزل گوزلره فدا
قلبیم دولاندی قانه ، منه صلب اولوب قرار
.
مأیوس اولوب جواب دن اسمای با وفا
آتدی الین قتیفه نی آرام ائدیب کنار
.
طاها باخشلی گوزلرینی گوردی کی یوموب
ایوای دئدی ، سرشک نی توکدی سحاب وار
.
گوز یاشینی توکوب ئورگین ساکت ایلدی
صحنه قیتدی خوندل و گریان پر شرار
.
زهرا دئیردی ئولدو ، یخلدی علی ائوی
پیغمبرین عزیزلری اولدو داغدار
.
ناگه قاپی دوگولدی گلیب فتح باب ائدیب
گوردی حسن حسین دی ائدیر گوزیاشین نثار
.
آلدی حسن خبر کی آنامیز نه حالدادی
ائوده یاتئب دئدی ، ندن ایلورسوز آه و زار
.
وقت نمازدور دئدی یاتماز بو وقت آنام
ئولموش آنام ولی ائدیسن بیزدن استتار
.
گئتدوخ بابام مزارینه بیز ایلیاخ دعا
بلکه شفا تاپا آنامیز اولمیاخ نزار
.
خلق اولدی بیر ندا بیزه کی ، ئولدی فاطمه
دنیا اوچولدی باشیمیزه ، گتدی غم فشار
.
آغلار گوزیله ناله کنان گئچدیلر ائوه
سولموش گول اوسته شیونه گلدی ایکی هزار
.
سالدی ئوزون آنا سینه سی اوستونه حسن
سسلندی کی دانش منیلن ای بزرگوار
.
قویدی آنا ایاقنه یوز آغلادی حسین
ئوللم دئدی دانشماسان ای مام با وقار
.
آز قالدی پارتلیا ئورگیم جان وئرم آنا
جانی ایاقون ئوپماقا قربان وئرم آنا
.
بند ۱۰
.
اسماء بالالاری آنادان ایلدی جدا
ایلون خبر دئدی گله تئز میر اولیا
.
آغلار گوزیله ناله کنان مسجده گلیب
عرشه اوجالدی ناله لری ، وا محمّدا
.
یوز دوتدولار آتالارینا گلدیلر دیله
تئز گل آنامیز ئولدی یتیم اولموشوخ بابا
.
بیلمم نجه آغیر خبریدی بو بیر خبر
شیر خدانی یخدی یئره ، غشّ ائدیب آقا
.
شیر خدانی یاره یخانمازدی ، وا عجب
یخدی بتولون ئولماقی ، اولدی گونی قرا
.
سندردی مرتضانی ، سنیدی بو چرخ دون
بیر درده سالدی وار نه علاجی ، نه وار دوا
.
غشّ عالمنده اولدی نه لر بیر ئوزی بولور
هوشه گلیب آچیب گوزونی میر اتقیا
.
عزم ایلدی ئوزون یئیره فوری منزله
گوردی دیزینده یوخدو توان ، صلب اولوب قوا
.
ایوای ، دیدی یخلدی ائویم ئولدو فاطمه
اولدوم بلا و درد و مصیبتله آشنا
.
اود دوشدو جانیمه یانیرام ، سندی قول قاناد
خیر و وفاسی یوخ بئله دنیایه افّ اولا
.
او آز یولی اوتوردی یئره نچّه یول امام
بیر کیمسنه یوخیدی اونا ائتسین اتّکا
.
گلدی یئتشدی منزله افسرده حالیله
گوردی خموش عزیزه سینی یئرده جابه جا
.
اگلشدی باشی اوسته آچیب خواهشه دلین
یا بضعة الرّسول ، ایا بنت مصطفا
.
ای نور چشم سرور لولاک آچ گوزون
آل گوگلونی علینین ، اولوب درده مبتلا
.
گل نطقه بیر عم اوغلو دئ ، شاد ایله حیدری
ای مایه ی سرور علی ، ای فرشته سا
.
دور گور نجه ائویم یخلیب ، گولشنیم سولوب
حسرت دیزین قوجاقلامشام ایلورم نوا
.
سن یومموسان گوزون ، گوزوم آغلار قالیب منیم
وار حقّی مرتضانین اگر یانسا آغلاسا
.
زهرا ، ائشیتمیسن سسیمی؟ وئرمیسن جواب
یا بولموسن فغان و نوایه منی روا ؟
.
قالخسا قولون گوزوم یاشنی سیل سنه فدا
یاد ایلر آشنانی یامان گونده آشنا
.
ایندی یامان گونوم دو منیم ، چوخدو محنتیم
بیر درده دوشموشم کی تاپلماز دوا اونا
.
ای همدمیم ، قولوم ، قانادیم ، یار و یاوریم
سندی قاناد قولوم ، ئورگیم یاندی هٰکذا
.
ناز ایلمه ، علینی دانشدیر یورولموشام
دردین یوروب علینی ایا خیرةالنّسا
.
پوزقوندی زینبین و حسین و حسن بالان
آه و فغان سپهره چخیر غملی دور فضا
.
سولموش گولون مثالیدی سولموش بالالارین
ال لر قالیب دی سینه ده ، ایلورله آه و وا
.
روحی قیتدی جسمنه زهرای اطهرین
ناگه گوز آچدی بیر بیرینه وردی لبلرین
.
بند ۱۱
.
عرض ایلدی ابالحسن ای میر محتشم
فیض وصالون عالم امکانه وئرمرم
.
امّا نه چاره صادر اولوب حکم رحلتیم
لابد گرک دی جام اجل نوش ائدیب گئدم
.
قرآن سسین منی آپارار آیری عالمه
قرآن اوخی ائشتماقا قرآنی مایلم
.
بیر یاسینین تلاوتی مهمانوام سنین
یاسین قوتارسا منده قوتاررام نه بیش و کم
.
عزائیله نیاز یوخ آل جانیمی ئوزون
جان ایسته ، بی وفایم اگر لفظ لا دئسم
.
دل آچدی مرتضا ائده یاسین تلاوتی
زهراده اونلا ذکر ائدیب آیاتی دمبدم
.
دل ذکر ائدردی آیه ی قرآنی ، گوزلری
حسرت باخاردی بیر بیرینه کپرگینده نم
.
آخر باخش لاریدی ، زمان فراقیدی
ایلوردی کاخ وصلی اجل تیشه سی هَدم
.
سخدی علینی گور نه یامان یئرده روزگار
قلبین فشاره سالدی غم و محنت و الم
.
قرآن اوخور ولی دؤیونور سینه ده ئورک
تسلیم اولوبدی حکم قضایه او محترم
.
آلله بولور نه عالمیدی حیدر عالمی
هجرانه توشه اخذ ائلیردی ئورک ده غم
.
حسرت باخاردی فاطمیه گوزده گوز یاشی
تک قویما سویلیردی منی ای نبی شیم
.
سن ئولمه میش علی نین ئولوب روحی فاطمه
چوخ خوشلورام گله اجلیم سنله جان وئرم
.
یاسین قوتاردی ، فاطمه ده یومدی گوزلرین
غم غصّه دن علی ئورگی باغلادی ورم
.
جغد بلا علی ائوینی ائتدی آشیان
پیک عزا او مأمن ائوه نصب ائدیب علم
.
دورت خئرداجا بالا بیر آتا یاندی آغلادی
گوزلر ئورک قانیله دولوب موجه گلدی یم
.
شاه ولا نوازش ائدیب دور بالالاری
صبر ایلیوبله فاطمه اطفالی لاجرم
.
گون باتدی ، اولدو نیمه ی شب ، یاتدی اهل شهر
پرده چکیبدی شهره گجه ، شهر اولوب ظُلم
.
گتدی بتولی شیر خدا قویدی مغسله
غسلون وئرنده گوردو نلر ، صبر اولوب بهم
.
بیردن اوجا سسیله چکیب ناله آغلادی
ایوای دئدی گورندو گوزه صدمه ی ستم
.
سینه ن یارالی دی ، قولووا قمچی یئر سالیب
وار یوزده ده نشانه ، بو ساعت خوشام ئولم
.
بو ظلم بی نهایته دؤزدون نجه خانم
بو درد بی نهایتیله قدّین اولدو خم
.
کیمدور بو ظلمه تاب ائله سین سن کیمی ، خانم
قانین گرکدی کی آلینا ، جانوه قسم
.
من آلماسام دا مهدی بالان قانوی آلار
ایلر مزارین اوسته بنا بیر گوزل حرم
.
یاندیم نه قدری یانسا علی یوخ مذمّتی
پهلوده ، قولدا ، سینه ده گوردوم جراحتی
.
بند ۱۲
.
اسماء توکردی سو او وجود مطهّره
پیراهن اوستن ائتدی علی غسل دلبره
.
ائتدی کفن یانا یانا زهرایه مرتضا
حاضر اولوندی حمل اولونا پای مقبره
.
اوغلان لاریلا قزلارینی ایلدی ندا
گلسین له نعش فاطمیه غسل اولان یئره
.
امر ائتدی تئز گورون آنازی لنگه سالمئین
زهرانی بیرده گورماق میز قالدی محشره
.
اطفال آنا جنازه سینه سالدی ئوزلرین
سس لر اوجالدی ، چخدی نوا عرش داوره
.
آچدی قولون بالالارینی باسدی باغرینا
شیون قوپوب سزلتی لاری دگدی بیر بیره
.
سس خلق اولوب آیر آناسندان بالالاری
شور و نشور عیان اولونوب چشم حیدره
.
شیر خدا آیردی آنادان بالالاری
امر ایلدی حسن بالاسی گلدی محضره
.
بو شهرده بویوردی اوغول بیز آدامسیزئخ
وار احتیاج میز بالا بو دمده یاوره
.
سلمانی گئت چاغیر ، دئ کمک سیز قالیب آتام
ارکیم یئتر بو شهرده بیر اول هنروره
.
گئتدی حسن ائدیب در سلمانی دقّ باب
آگه ائدیب او پیری فرامین رهبره
.
سلمان گلیب دی ، بیلمه دی امّا نجه گلیب
باشی ، یوزی ، گوزی بورونوب خاک اغبره
.
بیر عدّه ی قیل اولوب جمع او بزم ده
قلدی نماز دختر پاک پیمبره
.
آلله بولور علی نجه قلدی نمازنی
تسلم اولوب او حضرت امور مقدّره
.
تابوته وئردیلر حرکت دلده آه و وا
بیر کیمسه یوخ تسلّی وئره آل اطهره
.
غربت علینی سالدی نجه گور یامان گونه
قلب شریفی چکدی شرر یاندی آذره
.
اولدی نه تسلیت دئینی نه قولون دوتان
چوخ یورقونیدی دوشموشودی جسمی لنگره
.
زهرا نیه گرک بئله گیزلنجه دفن اولا
غصب خلافت ایلین اولسون یوزی قره
.
آز عدّه احتیاطیله سس سیز باخا باخا
حامل اولوبلا پیکره ی پاک کوثره
.
وئردی صفا بقیع چولونه پیکر بتول
مدفن اولوب دی تا او وجود منوّره
.
قبرین قازئیدی شخصاً علی گیردی قبرینه
محنت اولوبدی چیره او شاه مظفّره
.
گئتمشدی آز کمک لری ، عباس دی قالان
عمرونده بو سخلماقی گلمزدی باوره
.
ایستیردی دلبرین قویا تپراقلار آلتنا
گوزدن آخاردی اشکی ، دوتولموشدی حنجره
.
هردن دئیردی فاطمه من ئولمه دیم نیه
سن سیز اولار جهان من اوچون پر مخاطره
.
یانسام فراق اودوندا محقّم صباح و شام
قلبیم چتین دی رام اولا دائم گر آغلاسام
.
بند ۱۳
.
جانیم چخنجا غربتوه آغلارام سنین
آلام بی نهایتوه آغلارام سنین
.
بیر لشکره مقابل دین ، یاردین منه
یاد ایلئیب مهابتوه آغلارام سنین
.
ئوز آستانین اولدو سنه محشر عرصه سی
دنیاده کی قیامتوه آغلارام سنین
.
میخ دریله داغ چکیلن داغلی سینه ده
قانی آخان جراحتوه آغلارام سنین
.
قول صدمه لی ، قابیرقا سئنخ ، گوزده لکّه قان
صورت ده ال علامتوه آغلارام سنین
.
آغلار گوزونده گوز یاشوا ، رنگ زردی وه
احوال پر ملالتوه آغلارام سنین
.
بیت الحزن ده ایلدقین سوز و سازوه
پیغمبره شکایتوه آغلارام سنین
.
سن تکیه گاه دین منه ای کوه استوار
هر وقفه ده صلابتوه آغلارام سنین
.
چوخ اینجدین جهاندا ، هئچ اینجتمه دین منی
ای همدمیم ، عنایتوه آغلارام سنین
.
دردیم اولاندا منله اولاردین شریک غم
غم صحنه سی شراکتوه آغلارام سنین
.
کیمدور یامان گونون ده اولا حامی علی
درده گلیب حمایتوه آغلارام سنین
.
ای اسوه ی قناعت و ای اسوه ی رضا
هم سلم و هم رضایتوه آغلارام سنین
.
حسن و وقار و عزّت و شأن و جلالوه
داغدان آغیر متانتوه آغلارام سنین
.
حددن زیاده خدمتی ، ای خرجی حددن آز
ادراکئوه ، لیاقتوه آغلارام سنین
.
یوخسوللوقیلا سازش ائدیب ائو دولاندیران
برنامه و درایتوه آغلارام سنین
.
احسان الی آچخ ، گوزو توخ ، گویلو توخ ، شریف
احسانوه ، شرافتوه آغلارام سنین
.
اهل کسانین عزّتی طاهایه نور عین
ای اصلی نور ، اصلالتوه آغلارام سنین
.
طاها باخشلی گوزلره طاها دوروش بویا
طاها سیرلی سیرتوه آغلارام سنین
.
صدّیقه سن مطهّره سن بی مثال سن
گلمز تایئن صداقتوه آغلارام سنین
.
ای قول و فعل و خلقتی مظهر پیمبره
ایثاروه ارادتوه آغلارام سنین
.
کیم باغلیار علی یارالی اولسا یاره سین
سوز دل و طبابتوه آغلارام سنین
.
یوخدور گوزم یاشین سیلن ای دردیمی بیلن
ای خوش خصال خصلتوه آغلارام سنین
.
حاشا محبّتین چخا خاطردن ای گولوم
بی شائبه محبّتوه آغلارام سنین
.
یاد ایلئیب بیر الی قیام و قنوتوی
اخلاصیله عبادتوه آغلارام سنین
.
تاپشردی قبره روحونی چخدی مزاردن
تپراق توکوبدی قبرینه دوشدی قراردن
.
بند ۱۴
.
پیغمبرین مزارینه یوز دوندریب امام
شرمنده حالیله او شهه ایلدی سلام
.
اولسون سلام حضوروه مندن ، بتول دن
ای صاحب شریعت و ای میر ذوالکرام
.
گلدی بتول محضروه ای امیر عشق
اونسوز منه گونوز دولانئب اولدی تیره شام
.
حالین سوروشما مندن ، ئوزوندن سوروش گیلن
شرح ایله سین سنه ، کی اونا قوردولار نه دام
.
مندن نهان ائدردی ملال و کدورتین
اولمازدی هئچ رضا کی اسیر ملال اولام
.
دردین دئموب منه ، سوروش امّا سنه دئیر
شرح ایلیر کی اولدو نجه هتک احترام
.
سندن سورا بلا یاغشی یاغدی باشینه
هئچ کیم دوام ائدنمزیدی ، ایلدی دوام
.
اولدی ایشیق گونوز گوزونه تار ، شام دن
ظلم اهلی دولدو منزلنه ائتدی ازدحام
.
ملکون الیندن آلدیلا ، الدن گئدیب فدک
ظلمونده نقص قویمادی جرثومه ی ظلام
(جرثومه : ریشه ، بن )
.
هم آستانین اودلادیلار ، هم ده قلبنی
عمر شریفی محنتیله اولدو اختتام
.
غسلون ئوزوم وئریب کفنه بوکموشم ئوزوم
بیله وصیّت ایله مشیدی بو ذوالحشام
.
ایوای نجه دئیم بو ئورک یاندران سوزو
ئوز اللریمله فاطمیه قبر قازمشام
.
قویدوم مزاره فاطمه نی ، ئولمه دیم ، عجب
صبریم ائوی بو مرحله ده اولدو انهدام
.
دردیم آغردی ، طاقتیم آز ، محنتیم فزون
کام آلمادیم ، بلا و محن مندن آلدی کام
.
هئچ بیلمیرم نه نوعی گئدم دودمانیمه
بیلمم نه نوعی فاطمه قبریندن آیریلام
.
ائوده شکسته دل بالالار منتظردیلر
بوندان اضافه یوخ یئری بو عرصه ده قالام
.
ترک ایلیب دی قبر بتولی شکسته دل
گلدی ائوینده باش چکه اطفاله خسته گام
.
نه دیزلری گلردی ، واریدی نه گلماقی
ناچاریدی گله ائوه امّا او خوش مرام
.
یورقون ، فسرده حال و ملول و فکار و زار
وارد اولوبدی منزله ، اطفال ائدیب قیام
.
اطرافین آلدی دورت گوزو گریان یتیم بالا
هر دوردو ائتدی دامن مولایه اعتصام
.
عرض ائتدیلر آنامیزی دفن ایلدین بابا ?
اولدی هارا او مام مصیبت کشه منام
.
دیللن دیلین فداسی بیزی قویما ناگران
هاردا قویولدو قبره او ناموس لاینام
.
قان اولو قلب میز بابا قان اولدو اشک میز
آز قالدی غصّه دن ئولاق ای میر خوش کلام
.
فرمایش ائتدی ایلمئین بیله آه و زار
طاها جواری اولدو آناز جسمینه مزار
.
بند ۱۵
.
زینب دل آچدی سسله دی وای خسته جان آنا
وای آتش حسادتیله اودلانان آنا
.
وای آستانینه توکولن فرقه ی شریر
وای آستانی آتش ظلمه یانان آنا
.
وای گوزیاشی توکن آتا هجرینده عارضه
اشکیله دردین عارض زرده یازان آنا
.
غاصب لریله ایلین حقّ اوسته کشمکش
ظلم و فساد جانینه رعشه سالان آنا
.
یوم بلاده سینه بلایه سپر ائدن
مسمار گرمیله سینه سی اوخلانان آنا
.
قان لکّه سی گوزونده گئدن دار باقیه
قانلی سرشکی عارض زرده روان آنا
.
دارالامان ائوینده جسارت لری گورن
یاره دگوب وجودینه قانی آخان آنا
.
ایوای قولوندا قمچی یئری قبرینه گئدن
تیر جفا و ظلم طغاته نشان آنا
.
وای دردی چوخ ، مصیبتی چوخ ، محنتی فزون
آرامشین سواحلنه چاتمیان آنا
.
ئوز منزلئنده آغلاماقا اولمویان مجاز
بیت الحزن ده ناله ائدیب آغلیان آنا
.
ایوای قابورقاسی یارالی ، سینه یاره لی
مظلوم آتام دالیجا گئدن مهربان آنا
.
مظلوم آتام قولوندا گوروب بند ذلّتی
ایثار ائدیب طنابنی قولدان آچان آنا
.
مهر و محبّت و کرم و رئفتی زیاد
رنج و مشقّت و المی بیکران آنا
.
قان ایلین سرشکئنی غاصب دسیسه سی
مین درد و مین بلایه دؤزن باغری قان آنا
.
قدّ کشیده سی بوکولن جور و ظلمدن
الدن گئدن توانی ، اولان ناتوان آنا
.
اهل مدینه ائنجدیب آغلاتدیلار ، ولی
آغلار سنه ملائکه ی آسمان آنا
.
باغ فدک اولوب دی بیزه مایه ی الم
قلبنده گئتدی قبریوه سرّ نهان آنا
.
کیم وار یتیم بالالاروون نازینی چکه
ای نازیله بالا بؤیودن ناگران آنا
.
اطفال اوچون آنا ئولومی سخت سخت دور
یان نئخ ملال رحلتوه وای جوان آنا
.
بیز هئچ هله ، قالیبدی کمک سیز غریب آتام
قوینوندا اللری ائدر آه و فغان آنا
.
صرصر اسیبدی گولشنوه گول لرین سولوب
گولشن دوشر صفادن ئوله باغنان آنا
.
قارداشلاریم سولوب سارالیب درد و غصّه دن
خیردا باجیم دا ناله ائدیر بی امان آنا
.
محراب دن سسین کسلیب یوخدو آغلیان
بوشدور یئرین ، گورم سنی یوخدور گمان آنا
.
تاپسام مزاروی سپرم باشه تپراقین
ایوای آنادئیب اولارام نوحه خوان آنا
.
آغلاشدلار یانا یانا محزون و پر شرار
دلدن دوشوب اوتوردولا خاموش و دلفکار
.
بند ۱٦
.
گئچدی گجه افق دا گئدیب محو اولوب قمر
گون چخدی ، سالدی شعشع ، ایشقلاندی بحر و برّ
.
ثانی گئنه یغیب باشنا بیر نچه شقی
اتموب حیا یانان قاپیا سالدیلار گذر
.
مقداد اولاردان آلدی خبر نیّتز ندور
جمع اولموسوز نه نیّتیله ای گروه شرّ
.
پیغمبرین قزین دئدی گلدیخ کی دفن ائداخ
آل رسوله خدمت اوچون باغلادئخ کمر
.
قیل سین گرک خلیفه بتولون نمازینی
اولسون مدینه اهلی بو فضلیله مفتخر
.
وئردی جواب فاطمه نی دفن ائدیب علی
یئتدی بو سوزده ثانی گستاخه چوخ کدر
.
ناگه آجخلانیب الینی قوزادی گویه
اندی الی هوادن ، اولوب عالم دگر
.
مقداده چوخ تکبّریله وردی سیلی سین
مقداد الین قویوب یوزونه اولدو خونجگر
.
مقدادی ورماقا دئدی چوخ جرعت ایسته میر
فکر ایلمه وراندا منی ایلدین هنر
.
سن خلقتین گوزل لیقنه سیلی ورموسان
سیلین سالبدی فاطمه نین جانینه شرر
.
سنسئن الین کی فاطمه نی یخدی کوچه ده
آلله بولور ئولونجه چکیب دی نه زجر لر
.
ثانی وئربدی حکم گرک نبش قبر اولا
بوبکر اونا نمازقیلا ، حرمتی گئدر
.
همراه ائدیب له نچّه خانم دوشدولر یولا
خلقی چکیب بقیعه او شیّاد فتنه گر
.
گلدی خبر سکوت ائلمه یا ابالحسن
قبر بتولی نبش ائلیور پیر خیره سر
.
تئز ذوالفقارینی گوتوروب لافتیٰ علی
عزم بقیع ائدیب دی ئورک غصّه دن اسر
.
دیوارینه چخب دی بقیعون ائدیب خطاب
آگاه اولون ایا فسقای جفا سیر
.
داش تپراقی اگر بو یئرین دگسه بیر بیره
بو تیغ تیز ئوزر باش زی قان زی توکر
.
عرض ائتدی ثانی من بو قبوری آچام گرک
بولموب ئوزون سوزون او شقی ایلدی خطر
.
آتدی الین امام ، گریباننی دوتوب
چکدی ایاقی آلتنا یخدی او شیر نر
.
بوبکر گوردو ثانی نی ، گلدی وساطته
عفو ایله ثانی نی دئدی ای دائم الظّفر
.
آزاد ائدیب دی ثانی نی ، گئتدی گروه کین
بیر قالدی قبر فاطمه بیر میر معتبر
.
اگلشدی ، دل غمین دئدی ، سس چکدی آغلادی
گوزدن عذار زردینه آخدی سرشک تر
.
دور باخ دئدی عم اوغلووا دنیا اولوبدو تنگ
تک قالمشام یوخومدو کمک ای فرشته فر
.
واردور هدایتین ده ئورک ده گران غمی
مشکول لرین سن ایسته سن آللّه دان حلّ ائدر
.
ئوز نوکرون دی بیر باخ عنایتله ، لطف ائله
زورق شکسته دور چک ئوزون امن ساحله
.
.
.
#فاطمیه #هدایت_تبریزی #ترکی #زبدةالاشعار #فاطمیه_شهادت

متن پیشنهادی:  از کوثر و زمزم دهن خویش بشویم #فاطمیه_سازگار

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی