زینب سلام اولسون سنه
.
✍️ #زبدةالاشعار ✍️
.
🆔: @nohe_torki
.
مرحوم انور اردبیلی
.
ای گرفتار بلا زینب سلام اولسون سنه
دختر خیر النساء زینب سلام اولسون سنه
.
.
ای مصیبت لر چکوب ام المصائب آدلانان
صبر ائدوب اعظم بلایه صبریده تصدیق آلان
ای شکسته محملون اوستونده بی معجر قالان
وی اسیر و مبتلا زینب سلام اولسون سنه
.
.
ای فداکاری مقامینده ازلدن سان وئرن
نهضت عُظمای عاشورادن اؤتری جان وئرن
ای ایکی اوغلین علیِّ اکبره قربان وئرن
عشقده جلوه نما زینب سلام اولسون سنه
.
.
ای یانان وقته خیامی آتش سوزانیده
ساخلیان آل رسولی موقع طوفانیده
وی امام ساجدی جاندان کچوب بحرانیده
ایلین اوتدان رها زینب سلام اولسون سنه
.
.
ای یازوب نسگل لرین لوح اؤرکده سطر ائدن
گلشن مقتلده استشمام بوی عطر ائدن
ای آچوب زلفین داغلمیش سینه اوسته چتر ائدن
نسگلی بی انتها زینب سلام اولسون سنه
.
.
ای حسین تک عهد و پیمانینده نقصان قویمیان
هورمیَن آغ ساچلارین ماتم لباسین سویمیان
ای وداع آخرینده قارداشیندان دویمیان
گوز تیکَن حسرت یولا زینب سلام اولسون سنه
.
.
ای الی باشدا قاچان گوداله اول بحران زمان
ای گورن قارداشینی گودالیده بیر پارچا قان
ای چوخور یرده حسیندن اؤتری شمره یالواران
ایلین محشر بپا زینب سلام اولسون سنه
.
.
ای کنار نهر علقمده قوران غم خیمه سی
صبحه تک قطع اولمیان مظلوم حسینیم وای سسی
جمع ائدن باشینه بیر عدّه سویولموش بی کسی
وردی «جان مظلوم اخا » زینب سلام اولسون سنه
.
.
ای یاتان نیلی بدنلن شهر شومِ شامیده
آهیوون تأثیری واردور بزم خاص و عامده
یاد ائدر محنتلرون «انور» سحر آخشامیده
ورد ائدر صبح و مسا زینب سلام اولسون سنه
.
.
.
#زینبیه_مدح
#زینبیه_شهادت
#ای_گرفتار_بلا_زینب_سلام_اولسون_سنه
#انور_اردبیلی
#جلوه_عاشورا2_انور
#ترکی
.
✍️ #زبدةالاشعار ✍️
.
🆔: @nohe_torki
نظر دهید