شام غریبان
.
.
.
مرحوم میرزا عبدالوهاب حقیرخویی
.
.
بو گجه زینبین حالین خدایا
بولن اولدی نه حاله قالدی اما
.
.
طلوع صبحدن تا اول شام
دوتوب گور بیر دقیقه قلبی آرام
اویاندان ترک و تاز لشگر شام
بویاندان اضطراب آل طاها
.
.
قاچوب میدانه گاهی قتلگاهه
گلوب گه قتلگهدن خیمه گاهه
زمانی اهل بیت بی پناهه
وئروب دلداری صبر و شکیبا
.
.
بوکوب قدّین غم هجر برادر
چکیلدی سینه سینه داغ اکبر
سالوب بیر گونده یدّی قاره معجر
قالوب بیر کهنه معجر باشدا اما
.
.
یاتوب خیمه داغیلدی خانمانی
سویولدی هئچ زادا قالموب گمانی
ائدوب تا گون غروب ائتماق زمانی
اویانموش خیمه نی بیر یاندا برپا
.
.
قیلوب کلثوم زاره دردین اظهار
گچن شبده باجی آخر علمدار
کشیکچیدی بیزه بو گجه ناچار
کشیک چکماقلیقا سنسن من اولا
.
.
اولوب جمع اهل بیت شاه مظلوم
او یانموش خیمیه مأیوس و مهموم
اوزیلن خیمه اطرافینده کلثوم
کشیک چکماقلیقا اولدی مهیّا
.
.
قویوب بیر لحظه باشین غم دیزینه
خیال و فکر ائدردی اؤز اؤزونه
او دم بیر آز یوخی گلدی گوزونه
گوروب رؤیاده گویا آشکارا
.
.
آناسی فاطمه قدی خمیده
آغاروب ساچلاری رنگی پریده
بویوردی زینبه ای نور دیده
ندور حالون بیانه گلدی گویا
.
.
خبر آلما نه بیداد ائتدی دشمن
نه یاخشی کربلاده اولمادون سن
مصیبت بیر دگل هانسی بیرین من
سنه عرض ایلیوم یوخ دلده یارا
.
.
مگر اکبر عقاب اوستن دوشنده
گوروب سن دوشموسن بو حاله سنده
آت اوسته خیمیه نعشی گلنده
گوریدون بیر نه حاله قالدی لیلا
.
.
آنا من دستگیر اولدوم سنانه
سنون قدون ندن دوندی کمانه
بویوردی معجریمده باخ بو قانه
بو دور خون گلوی شاه بطحا
.
.
حسینین حنجرینه شمر خنجر
قویاندا اولدی خون آلوده معجر
سحردن ایمدیه سنلن برابر
وارام هر حالده ای جان زهرا
.
.
قیزیم حالا دگل دگل وقت شکایت
یتیمداره یاراشماز استراحت
بو سوزده زینبه یوز وئردی وحشت
قیام ائتدی یریندن بی محابا
.
.
هامی اطفال بیربیر قیلدی تعداد
گوروب یوخدور ربابی قیلدی فریاد
دئدی کلثومه باجی ایله امداد
گوراق هاردا قالوب بو طفل آیا
.
.
قویوب یوز مصرح شاه شهیده
نه گوردیلر او طفل داغ دیده
به سان بلبل هجران کشیده
ائدوب گل سینه سین گلشنده مأوا
.
.
خیالیمی خیال حال زینب
الیمدن آلدی الدن گئتدی مطلب
وئره بو مطلبی اتمامه یا رب
کرامت قیل«حقیره»نطق گویا
.
.
#شام_غریبان #حقیر_خویی
#بو_گئجه_زینبین_حالین_خدایا
#ترکی
#زبدةالاشعار
نظر دهید