بابا ویرانه نی مدتدی مکان ایلموشم #حضرت_رقیه_تبسمی

زبانحال حضرت رُقیّه (س)
..
..
..
..
..
حاج ناصر تبسّمی اردبیلی «صفا»
..
..
..
..
..
بابا ویرانه نی مدّتدی مکان ایلموشم
گوزومون یاشینی هجرونده روان ایلموشم
..
..
..
..
..
من هارا غم هارا ویرانه هارا غصّه هارا
ویرار هر لحظه یانان قلبیمه بو قصّه یارا
یوخ بو زندان بلادن منی بیر کس قوتارا
درد جانسوزیمی قلبیمده نهان ایلموشم
..
..
..
..
..
تیکموشم گوز یولا امّیدیله ای میر انام
دیورم اؤز اؤزیمه رجعت ایدر ایندی بابام
سویلرم باخ نجه گور شامده پوزقون قوناقام
گوندوزی ناله گجه آه و فغان ایلموشم
..
..
..
..
..
یوخدور آللّهه گوره شامده بیر دادرسیم
دوشموشم تنگه چیخور سینه دن آخر نفسیم
بلبل ایستر گُلی منده سنه واردور هوسیم
بو سببدن آدوی ورد زبان ایلموشم
..
..
..
..
..
بلورم حشره کیمین شامیدی آخر وطنیم
بالشیم بیر پارا کرپیچدی قرا پیرهنیم
تیره تپراقلارا مأنوسدی یورقون بدنیم
منه مدفندی بو ویرانه گمان ایلموشم
..
..
..
..
..
چاره ئولمکدی منیم بیرجه بلاکش باشیما
گلمدی دردیمی اظهار ایلیم قارداشیما
بیر امیدیم گلوری گوزدن آخان قان یاشیما
جمله بو غملری من آفت جان ایلموشم
..
..
..
..
..
یوخدی بو مهلکه دن قاچماقا فرصت بالوا
یازیلوب شامدی مدفن اولا قسمت بالوا
گل ملاقاته وصالون اولا منّت بالوا
قدمون مزدینی نقدینه ی جان ایلموشم
..
..
..
..
..
بابا روحیم قوشی هر یرده سُراقونده گزور
گرچی همسایه دی باشونله فراقونده گزور
حیف بیر قصرده سن دشمن اطاقونده گزور
آلموشام عطروی قوش تک طیران ایلموشم
..
..
..
..
..
سقفی یوخدور بو مکانون یوخی گلمور گوزومه
گجه نی صبحه کیمین آغلیورام اوز اوزومه
عمّه لر گوزلریمه آغلور اوشاقلار سوزومه
حرم آهولرینی اشک فشان ایلموشم
..
..
..
..
..
گوگلوم ایستور کی ملاقاتیم اولیدی سنلن
محتضر حالده باری گوروشیدون منلن
آز قالور دفن اولام اگنیمده کی پیراهنلن
اولورم عمّه می حتی نگران ایلموشم
..
..
..
..
..
دویموشام جانیمه شالودۀ عمریم اوزولوب
بختیمون اولدوزی بی شبهه یریندن سوزولوب
سیل اشکیم یوزه چون قطره ی شبنم دوزولوب
گوز بولاقیندن اوره ک قانی روان ایلموشم
..
..
..
..
..
آیریلان گوندن ایدوبسن منی فوج غمه توش
سالدیلار قلبیمه سندن سورا چوخ جوش و خروش
هم دوولدیم هم اسیر اولدیم همی خانه بدوش
گور نه اندازه بابا تاب و توان ایلموشم
..
..
..
..
..
بسکی بحران حوادث منی ایلوبدی ملول
کاش صیّاد اجل قویمیا عمریم تاپا طول
یوخسا زجرون الینه بیرده دوشه دخت بتول
اوندا عمریمده بیلرسوز نه زیان ایلموشم
..
..
..
..
..
آی چکر منّت اولا هر گجه یولداش منه
بیلمورم سن نیه بس چکمیوسن باش منه
نه اوره ک دردین ایدورسن بابا جان فاش منه
نه بیلورسن نجه بو لیلی اذان ایلموشم
..
..
..
..
..
دفتر عمریمه هر کیم باخا محزون اولاجاق
دوشه جک چوللره دیوانه و مجنون اولاجاق
اولسا احساسی غم و غصّیه مقرون اولاجاق
سوزلریم دوزدی گورر هر نه بیان ایلموشم
..
..
..
..
..
گچور عمریم داخی ای دختر ارزنده مقام
دعوت ایت منده گلوم قبروه ای طوطی شام
قوی «صفا» ده سنه عرض ایلیه صدقیله سلام
منده بو حسرتی مثل دگران ایلموشم
..
..
..
..
..