ورود به کربلا
زبانحال امام حسین (ع)
..
..
بهزاد قاسمی اردبیلی
..
..
باجی گلستان عمروم اولاجاق خزان بو چولده
باتاجاق گلاب عشقه قوجا باغبان بو چولده
..
..
یره اَن کجاوه اوستن بو یر آشنادی زینب
وار الهی عطری گویا حرم خدادی زینب
وئرر آبرو بهشته آدی کربلادی زینب
منیم انقلاب عشقیم تاپار آرمان بو چولده
..
..
بورا پایتخت سُرخ شهدای جان بکفدی
بورا قصر سبز رنگ شه مُلک لو کشفدی
بورا قبلۀ هدفدی بورا کعبۀ شرفدی
قان ایچینده باشرفلر وئرر امتحان بو چولده
..
..
بورا حبس ائدر ئور کده نفس نجیب عشقی
بورادور سوسوز مسیحین باجی جان صلیب عشقی
ائله بوردا داشلیارلار بدن غریب عشقی
داشین آتمامیش قیتمز باجی داش ویران بو چولده
..
..
بو همان منادی قانیم آخاجاق ترابه نم نم
آت ایاقى آلتدا زینب سیناجاق یارالی سینم
باش آچوب بابام پیمبر قوراجاق بساط ماتم
اولاجاق نبی اکرم منه نوحه خوان بو چولده
..
..
بو او چولدیکی سویوندان گلر العطش صداسی
یازیلوبدی تپراقیندا غم و غصه ماجراسی
قورولار او تپراق اوسته علی اکبرین عزاسی
او عزا ائدر یقیناً منى باغریقان بو چولده
..
..
بو مکاندا اشک حسرت بورویر نگاه عشقی
یازار آتشین قلم لر غزل سیاه عشقی
اوت ایچینده نوعروسین یانار حجله گاه عشقی
غم اونون رشیده قدّین ائلیر کمان بو چولده
..
..
باجی باغبان یومار گوز گل پرپری گورنده
دوتولار بلوط کیمین دل، غم دلبری گورنده
سیناجاق بلیم سو اوسته کسیک اللری گورنده
یخیلار ائویم، اباالفضل یخیلان زمان بو چولده
..
..
ئورگیمده واردی بیر سوز ویرار اوت دل سحابه
بو سوز ایندیدن سالوبدی منی درد و اضطرابه
بو سوزی گوزتله زینب دئمسون بیری ربابه
وئرر آلتی آیلیق اوغلوم الیم اوسته جان بو چولده
..
..
بو او یردی ماه رحمت ایته جک دومانلار اوسته
غم الینده تیر ماتم گزه جک کمانلار اوسته
بابا وای دئیوب رقیّه م قاچاجاق تیکانلار اوسته
آخاجاق ایاقلاریندان یره لخته قان بو چولده
..
..
یاناجاق باجی وجودون بو کویر پر محنده
سنیده غریب آنام تک سالاجاق فلک کمنده
سیناجاق قولون قابورقون سنه قمچیلر دگنده
بدنونده تازیانه قویاجاق نشان بو چولده
..
..
#ورود_کربلا #بهزاد_قاسمی #ترکی #زبدةالاشعار
نظر دهید