تشییع حضرت زهرا (س)
.
.
.
حاج حسین حسنی افشرد
.
.
.
باشه ویروب عمرینی جهاندا
یول سالدی حضوریاره زهرا
یدی نفریله حمل اولوندی
قبره بدنینده یاره زهرا
.
.
سلمان و اباذریله مقداد
عمّاریله میر لافتادور
بیرده حسنینیدور گلنلر
تابوتیده دخت مصطفادور
تابوتی یواش یواش گیدر چون
اوز خواسته سیله بو سزادور
روحی قیدور دویونجا باخسون
زینبده سولان عذاره زهرا
.
.
بیر باغین ئولوبدی باغبانی
گل بسلدی دوتمادی گلابین
گوردی چیچگین گلین خزانین
گورموب آچا غنچه لر نقابین
آز اولدی بهاری حیف بوکدی
غم صرصری عمرینین کنابین
حسرتده قالوبدی گلستانه
گلزاره گله بهاره زهرا
.
.
تابوت قباقیجه علیدور
آردینجا گیدن ایکی بالاسی
ایلور اونی بدرقه کنیزی
بیرده ایکی دخت مه لقاسی
دورد مرد مُسن حمل ایدردی
گویا که یوخ اوزگه آشناسی
بیر عالمین آشنا غریبی
گیزلنجه گیدور مزاره زهرا
.
.
زینب دولی گوزلی چوخ باخاردی
تابوت دالینجا دل شکسته
سسلردی آنا هارا گیدورسن
ای سینه شکسته بیعت اوسته
گیتمه بیزی قویما تک حیادن
قبر اوسته گلنموری بو خسته
تابوتی اودور یواش گیدوردی
ایتسون او قیزا نظاره زهرا
.
.
.
اشکیله دولاردی گوز بلاغی
دریا کیمی موج ایدوب داشاردی
گوز منظرینی آخوب کسردی
تابوت گیدوب اوزاقلاشاردی
کلثومین الین دوتاردی ناچار
قهراً ایکیسی قوجاقلاشاردی
چوخ آغلاما آغلاساق دیردی
حتما گلر آه و زاره زهرا
.
.
فکر ایله گیجه قرانلوق ایوده
دگمور گوزه نور شمع و فانوس
زهرا ایویدور باتوبدی یاسه
زینب کیمی نا امید و مأیوس
زهرا که گیدوبدی حبسه بنذر
ایوده ایکی قیز اوشاقی محبوس
قالدی بالالار بو ایوده گیتدی
بیر اوزگه دیار و داره زهرا
.
.
فریاد فلک سنون الیندن
هر بیکسه بیر جفا ایدوبسن
چوخ سینه لره یارا ووروبسان
هانسی یاریا دوا ایدوبسن
سن آلموسان عزّتین صفاسین
چوخ ایولری بی صفا ایدوبسن
لطفیله صفا ویرردی هر گون
اول منزل تیره تاره زهرا
.
.
بیر عمر علی سنون الیندن
غم باده سینی آلوب ایچردی
هجران بتول بیر اوراق تک
جان مزرعه سین کسوب بیچردی
دوز دور گیجه دور ولی گیچنده
هر کوچه نی بیصدا گیچردی
تا بلمیه لر هاچان دوشوبدور
بو قافله دن کناره زهرا
.
.
ظلمتدی گیجه زمانی دوتموش
یثرب یوزینی سکوت مرموز
تابوت گیچنده هر قرانلوق
کوچه دولانوب اولاردی چون روز
محشردی مگر بیله یغشموش
بیر نقطه ده گون بولود آی اولدوز
اولموشدی بولود حسین، علی گون
آی اوغلی حسن ستاره زهرا
.
.
آخموشدی ستاره نه ستاره
ظلمت گیجه ده مه درخشان
غم آی یوزینه سالوبدی حاله
آغلار بولودی ایدوب پریشان
گون باتماقین آختاروردی هرآن
مغرب دالیجان گلور هراسان
آهسته دیور علی که مثلین
گلمز داخی روزگاره زهرا
.
.
راحت یاتون ای مدینه اهلی
ای غفلت اوزیله خواب ایدنلر
آسوده و شاد اولون اورکدن
زهرا اورگین کباب ایدنلر
زهرا داخی یوخدی ناله سیندن
وحشت ایدوب اضطراب ایدنلر
سیز قلبیمه ووردوقوز یارایه
تاپدی ئولومیله چاره زهرا
.
.
حمل اولدی او طرزیله بقیعه
دردانۀ خاتم رسالت
دوتموشدی وجود مرتضانی
درد و غم و رنج بی نهایت
اظهار ایلینمیوبدی دردین
آخدوقجا سرشک ایدوب کتابت
ایوای ولایت اوسته دوزدون
بیحد ستم و فشاره زهرا
.
.
تشییعه گلنلره بویوردی
مأجور ایده کردگار دادار
پیغمبریزین عزیزه سیدی
تشیعینی قویمادوز اولا خوار
تک تک قییدون گیدنده، سلمان
مقداد عزیز و بوذر عمّار
باهم سیزی گورمسونله ایلوب
بو امره اوزی اشاره زهرا
.
.
آیریلدیلا اَتقی الاَتقیادن
آغلار گوزیله گیجه زمانی
بیر کوچه دن هر بیری قییتدی
مولا ایوینه طرف نهانی
سلمانین الی حسین الینده
بوذرده آپاردی مجتبانی
تک قویمادی مرتضانی اولدی
همدم ایله بیقراره زهرا
.
.
.
آچدی یوزینی دویونجا گورسون
خلوتده او مهربان نگارین
گورموب او خزان اولان گلینده
بیر ذره نشانه سین بهارین
آرتوردی بو گورمماق علینین
قلبینده کی سوزش و شرارین
سسلندی بو دید واپسینیم
سالدی دله مین شراره زهرا
.
.
هرقدرتوکولدی آب دیده
دولدوردی دوباره گوزبلاغین
هجر آتشی سونمدی علاوه
آرتوردی اورکده احتراقین
سو سپدی سرشکیله مرتب
بلکه ایده فاطمه اطاقین
تپراقلاری بستر ایتدی یاتسون
ظلماتیده ماهپاره زهرا
.
.
غم سیلی دوباره آشدی داشدی
ویران ایده یخدی صبر سدّین
قویدی اثرین فراق زهرا
سیمای علیده سالدی ردّین
اوز روحینی دفن ایدوب قوتولدی
چوخ سعی ایلدی دوزلده قدّین
صد حیف دوزلمدی دوزلمز
بیر بِل که بوکه دوباره زهرا
.
.
بسدور «حسنی» مُطَوَّل اولدی
خوشدور اولا مختصر چکامه
باش گوتدی بو خام توسن
خامه یولونا ویروب ادامه
بیرقدرینی یازموسان قاباقدان
«یعقوبی» دیدی یتور تمامه
معلوم اولاجاق عیار عشقین
چکسه محک عیاره زهرا
.
.
نظر دهید