آتا فراقیندا
.
✍️ #زبدةالاشعار ✍️
.
🆔: @nohe_torki
.
کربلایی رحیم فیضی اردبیلی
.
باشیمون تاجی آتا، گوزلریمون نوری آتا
عمریمون ئولکه‌سینون مرد سلحشوری آتا
.
سایووه دالدالاناردیم، دوتولاندا ئورگیم
ایندی سنسیز یوخ الیمدن دوتانیم، یوخ کمگیم
.
سن سخاوتلی، شرافتلی گوزل بیر آتاسان
نه روادور بئله تپراقلارین آلتدا یاتاسان
.
یِرووی بوش گوروب ائوده اوتوروب آغلیارام
گجه گوندوز بو مصیبتده ئورک داغلیارام
.
سنیدون روحه صفا، عمرومه معنا یارادان
سن گئدندن ائله شادلیقدا گئدوبدور آرادان
.
قلبیمه غم قالانوب، کاسهٔ صبریم جالانوب
سنسیز ای روح روان، خانهٔ بختیم تالانوب
.
دایاقیدون منه داغ تک بو فنا دنیاده
سالما گوزدن منی دیداریمه گل رویاده
.
سنگ هجرون توخانوب قلبیمون آئینه‌سینه
هارداسان بوسه ویرام اللروون پینه‌سینه
.
هر شب جمعه سنون قبروون اوسته گلرم
عشقیله سنگ مزارون ئوپرم، دینجلرم
.
گوزلریم حسرت و افسوسیله اطرافه باخار
خاطراتوون سالارام یادیمه گوزیاشیم آخار
.
روضهٔ شاه شهیداندا سنی یاد ائدرم
حمد و سوریله گوزل روحووی من شاد ائدرم
.
سَنَدیم آیهٔ قرآندی بو اعلا خَبَره
آتانین حُرمتی واجبدی تماما بشره
.
(فیضی) افسوس آتانین قدرینی بیلمز بالالار
بی‌ثمردور صورادان دورِ مزارین آلالار
.
.
#پدر #فیضی_اردبیلی
#ختم_خوانی
#باشیمون_تاجی_آتا_گوزلریمون_نوری_آتا
#ترکی
.
✍️ #زبدةالاشعار ✍️
.
🆔: @nohe_torki
نظر دهید