باش گوتور بیر قبریدن یا فاطمه بغداده گل #جوادیه_شوری_تبریزی

شهادت امام جواد علیه السلام
.
.
مرحوم میر محمود آقا شوری تبریزی
.
باش گوتور بیر قبریدن یا فاطمه بغداده گل
جان ویرور اوغلون تقی بیر یالقوز ایوده داده گل

.
ای خانم بیر باش گوتور قبر شریفوندن اویان
الامان بیر نانجیب عورت الیندن الامان
اوز ایوینده قویموری وئرسون بالان آسوده جان
چوخ سوسوز دور ممکن اولسا ایله سو آماده گل

.
تک به تک گر چه سنون اوغلانلارون مظلوم اولوب
هر بیری بیر نحویلن بو دهریده مغموم اولوب
بعضی سی مقتول اولوبدور بعضیسی مظلوم اولوب
لیک ام الفضل الیندن بیر اولان بیداده گل

.
هر کیمه یوز ویرسه هر نوعی غم و درد و بلا
اوز عیالی جدّ و جهد ایلر خانم ائتسون دوا
اوغلوون اما اولوبدور اوز عیالی بی وفا
بیر نفر یوخ قوم و قارداش تا یته امداده گل

.
اولمادی بیر کیمسه باخسون اوغلوون افغانینه
قالمادی یالقوز ولی اوغلی گلوبدور یانینه
عاقبت بولمم نجه جان ویردی اوز جانانینه
قالدی گول جسمی ولی بو صفحۀ غبراده گل

.
اوغلوو اوز عورتی هر ظلم ائتدی دویمادی
اوز لباسی من دئمم آیا سویوب یا سویمادی
ئولدوروب راحت گئنه اوز مسکنینده قویمادی
اُفّ اولا لعنت گله بو عالم ایجاده گل

.
اول خبیثه بُغضینی ایلوب او وقته آشکار
نه دیوم یانسون دلیم نه امر ایدوب اول نابکار
دورمیون بامه بو جسمی حمل ایدون ای اهل نار
بو قضیه باغریوی قان ایلدی معناده گل

.
وار یقینیم اوج ایده ناله او دمده گوگلره
بولمورم عالم ندن بس دگمیوبدور بیر بیره
بامدن اول جسم پاکی آتدیلار بیردن یره
بو مصیبت شیعه نی آغلار قویوب دنیاده گل

.
آچ باشون آغلار گوزیله خطّۀ بغداده باخ
داد امّ الفضل الیندن ائتدوقی بیداده باخ
اوچ گجه گوندور قالوبدور کوچه ده گل داده باخ
بیرده بیر اوغلون دوشوب باشسیز قالوب صحراده گل

.
باش بدنده یوخ حسینون گون ایوی عریان قالوب
زینب مظلومنون آرامنی الدن آلوب
زلفینی ائتدی پریشان نعشینه سایه سالوب
گوردی حدسیزدور یاراسی گلموری تعداده گل

.
عرض قیلدی بو یارالی نعشیوه زینب فدا
کیم گوروب بیر جسمیده اولسون بیله سانسیز یارا
هر قدر عمریم اولا وردیم اولور ایوای اخا
تسلیت ویرماقلیقا اول زینب ناشاده گل

.
عالم معناده اولسا #شوریا گر خدمتون
بُول هدر گئتمز یقین دنیا و عقبی زحمتون
بو اماموندن برآورده اولور هر حاجتون
الده عنوان ائتگیلن بو نوحه نی عقباده گل

.
#سبک_زینبم_جان_اوستیم (4سبک)

.
#جوادیه_شهادت
#باش_گوتور_بیر_قبریدن_یا_فاطمه_بغداده_گل
#شوری_تبریزی
#ترکی #جوادیه
#زبدةالاشعار