بالینیمه گل قارداش حسین جان ئولورم من #زینبیه_عزتی

شهادت حضرت زینب (س)
.
زبدة الاشعار
.
: @nohe_torki
.
عزتی
.
بالینیمه گل قارداش حسین جان ئولورم من
گل باشیمون اوسته اوخی قرآن ئولورم من
.
.
یوردی باجووی غصه لرون سالدى ایاقدان
آز قالدی چیخا جانی بو غربتده دوداقدان
دیداریمه گلسیدون اگر آنی قاباقدان
ائتمزدی غمیم سینه ده طغیان ئولورم من
.
.
واردور سنه منده بیلوسن آیری علاقه
آغلار گوزولن دؤزموشم هر لحظه فراقه
تسکین گل اوزون وئر یورولان غملی قوناقه
گل ایله گیلن دردیمه درمان ئولورم من
.
.
گلشنده سو گل وئر گل احساسیمه قارداش
تئز ایله خبر اکبریلن قاسیمه قارداش
قولسوز قالان عباسیله گل یاسیمه قارداش
یورقون یارالی زار و پریشان ئولورم من
.
.
هر گون نچه یول سن کی منی یاده سالاردون
هر ایل سن عزیز گونلری یانیمده قالاردون
بایرامدا عزیز گونده منه خلعت آلاردون
حقیمده ائدردون منیم احسان ئولورم من
.
.
بیر یرده اجل زینبووی بنده سالوبدور
گون ایستی سی آرام و قراریمی آلوبدور
سال زینبووی یاده گوزی یولدا قالوبدور
گل کامل اولا عهدیله پیمان ئولورم من
.
.
سن گلمه سون آیا منه کیم آغلیاجاقدور
کیم باشیمون اوسته منه دل داغلیاجاقدور
یوللاردا قالان گوزلریمی باغلیاجاقدور
کیم دوندره جک قبلیه جان جان ئولورم من
.
.
اولسا باجینون قارداشی جان اوسته حسینجان
چوخ عزّتیلن قبره گئدر دفن اولار هرآن
یوخدور باجووین بیر کسی زینب سنه قربان
گل ایله گیلن شیون و افغان ئولورم من
.
.
بیر گونلری نسوان باشینون منده تاجیدیم
سن کعبه ی عشق و سنه زیبنده حاجیدیم
من یدى گوزل قارداشا دنیاده باجیدیم
دوندی ولی اول گردش دوران ئولورم من
.
.
باشیمه منیم هر نه بلانی قارا گتدی
بوکدی بئلیمی قلبیمه سایسیز یارا گتدی
اقبالیمه باخ گور منی آخر هارا گتدی
گوزلردن ایراق بی سروسامان ئولورم من
.
.
آز قالدی ایاقدان منی غم شامیده سالسین
قارداشلاریمون یوخدی بیری گوگلومی آلسین
نیلوم بو گونه من کیمی باعث لری قالسین
غربتده نیه دیده سی گریان ئولورم من
.
.
من شام غریبانووه گلدیم یانا یانه
قانونله باتیردیم آغاران ساچلاری قانه
سن كان سخاسن بیلورم گل بو مكانه
عباسیله دوت شام غریبان ئولورم من
.
.
فکر ائتمزیدیم مندن حسین سنده دویارسان
اگنوندن اخا رخت وفاداری سویارسان
غربتده بو قدری گوزومی یولدا قویارسان
یاددان چیخادارسان منی بیر آن ئولورم من
.
.
قارداشه وئره یوز غم دوران باجی قویماز
قارداش غمینه یانسا عزا رختینی سویماز
قارداشدان ئولونجه بونی بیل هئچ باجی دویماز
شاهد بو سؤزه زینب نالان ئولورم من
.
.
صدقیلن اگر گئتسه حقیقی حاجی دونمز
دوز عشقیده کیم یانسا اوت اوسته ساجی دونمز
قارداش باجیدان دونسه ئولونجه باجی دونمز
وار سنده منیم گوزلریم الان ئولورم من
.
.
از بس یدی غم زینبوون باشی آغاردی
جان اوسته سنه قلبیده گیزلین سؤزی واردی
هر بیر باجینون قارداش الینده گوزی واردی
زینب کسیلن اللره قربان ئولورم من
.
.
#سبک_ای_باد_صبا … 7 سبک
.
#زینبیه_شهادت
#بالینیمه_گل_قارداش_حسین_جان_ئولورم_من
#عزتی
#ترکی
.
#زبدةالاشعار
.
: @nohe_torki