نوحه حضرت علی اکبر علیه السلام
: @nohe_torki
.
مرحوم انور اردبیلی
.
بزم ماتمده که هر نوحه دیین دفتر آچار
اکبر آدیله سوزون رشته سینی بهتر آچار
.
.
بو مبارک آدا مشتاقیدی ارباب کمال
مدعی فکره دوشوب ایلمسون آیری خیال
روحی بیدار اولانا بسدی همین استدلال
هر چتین مشکلی اوّلده علی اکبر آچار
.
.
مغزینه هر متفکر نقدر ویرسه فشار
مدح اکبرده اگر فکر ایلسه لیل و نهار
بیله بیلمز بو جوانون نقدر عزتی وار
قفل صندوق مقاماتینه دوشمز هر آچار
.
.
بو جوان علوی هاشمیانون گوزیدور
طینت و قدر و شرافتده حسینون ئوزیدور
سوزی عینا باباسی ختم رسولون سوزیدور
یریشینده قدمین مثل همان سرور آچار
.
.
منقذون ظلمی حسین قامتینی ایلدی خم
تاپدی مقتلده جوان اوغلون او دریای کرم
گوردی دلدن ایله سالمش اونی شمشیر ستم
ایاقین گاهی یوموب گه او نکو منظر آچار
.
.
باشین آلدی دیزینون اوسته دیدی جان گوزون آچ
بو پریشان آتوی ایتمه پریشان گوزون آچ
گوزلریم دوشدی ایشیقدان سنه قربان گوزون آچ
گوزون آچ طایر روحیم نجه گور شهپر آچار
.
.
سن او گوهرسن على خبره منم قیمتوه
مفتخر ایتمیشیدی خلق ایده نون خلقتوه
حیف اولا گوز دولوسی باخمادوم هیچ قامتوه
هر آتا باخسا گوزل اوغلونا بال و پر آچار
.
.
ئوپورم لبلروی بلکه منی دیندیره سن
آغلورام اشکیم آخا گل یوزوه دیسکینه سن
دشمنیم گوزگوزه دورموش منیله بیر دینه سن
دینمه سون طعن و شماتت دیلینی لشکر آچار
.
.
صرصر ظلمیله صولموش چمنه چاره ندور
قطعه قطعه اولونان بیر بدنه چاره ندور
آغلاماقدان صورا اوغلى ئولنه چاره ندور
داغلى قلبون گنه ده عقدہ سین اشک تر آچار
.
.
باغبانلار نئجه سنسیز اولاجاقدور گله یار
نئجه سنسیز گله جک لاله لره صبح بهار
نئجه سنسیز علی نرگس اولاجاق مست و خمار
نئجه سنسیز على گلشنده قزل گل لر آچار
.
.
بزیینده سنی قربان تک او بیچاره آنون
زلفوه شانه وران وقته گونی قاره آنون
بیلمیوردی وراجاقلار باشوا یاره آنون
بیلمیوردی اونا منقذ بئله شور شر آچار
.
.
شانه نون ارزشی یوخدی ورا هر طریه چنگ
سرمه نون قیمتی یوخدی ویره هر کیپریگه رنگ
میلۀ سرمۀ عشاق اولور میل خدنگ
عاشقون زلفی گره لنسه اگر خنجر آچار
.
.
محنتون ائتدی اثر یوسف صدیقه سنون
اله گلمز ایله پیکان داغیدوب پیرهنون
خیمیه گئتمز عباسیز متلاشی بدنون
من عبایه بوکرم زینب غم پرور آچار
.
.
قلب مقتلده عباسین یره فرش ائتدی امام
هیجده سالۀ لیلایه ویروب اوندا مقام
نوجوانان بنی هاشمه ائتدی اعلام
حمل ایدون فوری یوبانسوز آناسی معجر آچار
.
.
سعدون اوغلى منى یخدی هوس منصبیله
سیز گیدون خیمیه منده گلورم زینبیله
قاباقا چخسا رقیه باجیسی مطلبیله
دیسوز اکبردی عباده ایلمز باور آچار
.
.
زینبیم یاخشی کمک ائتدی حسین قارداشینا
یولداش عالمده حمایت ایلیور یولداشینا
قویمیون خیمه ده اما الین آتسون باشینا
باشین آچسا باشینی عترت پیغمبر آچار
.
.
آلدی آغوشینه عباس او داغیلمش بدنی
کیم سالوبدور عمون ئولسون دیدی بو حاله سنی
قاسمون دیندیر اقلاً على دیندیرمه منی
دؤزمیور تزتز عبانی سنی چوخ ایستر آچار
.
.
حمل ایدوب خیمیه اسماعیلینی آل خلیل
شبه پیغمبره یاس دوتدی او مردان جلیل
ئوزینی ایلدی زهرا قزی لیلایه دلیل
بیلدی نسگللی سوزی اوغلى ئولن مادر آچار
.
.
گلدی حسرتله عبایه او خانم سالدی نظر
دئدی بیر اوخشاما آفاقه سالوب شور و شرر
کول توکون باشیمه اولسا بو علی اکبر اگر
باشینا اوغلى ئولن معجر خاکستر آچار
.
.
یانورام اکبریمه سیز منه بیر لحظه یانون
آی خانملار ئوزیمی منکه ایتوردوم اینانون
رسمیدی اوغلی سفردن گله هر بیر آنانون
گورسه یورقوندی اونا فوراً ایپک بستر آچار
.
.
گوسترون یارہ سینی خشک ائلیوم من یاراسین
گورمدوم منقذ اونون پارچالیوبدور هاراسین
زلفی آشفته لنوب نازلی سکینم داراسین
اونا خاطر یومولان گوزلرینی اکبر آچار
.
.
نه کیچلدوب بالامون قامتینی قانلی عبا
نه گلوب باشینه ای عترت شاه شهدا
نگران سوز سوزی بی پرده دیمورسوز گویا
جان ویرور لیلی گورورسوز سیزه درد سر آچار
.
.
جمعیدی بزم خصوصیده نچه پاک نهاد
«میرزا فرهادی» «حاجی اصغر» با استعداد
دل آچوب «میرزا شفیع» ائتدی منه پیشنهاد
یاز تخلص بیله سوز منظره سین «انور» آچار
.
.
#اکبریه_انور_اردبیلی
#اکبریه_شهادت
#بزم_ماتمده_که_هر_نوحه_دیین_دفتر_آچار
#یادگار_انور
#ترکی
.
#زبدةالاشعار
: @nohe_torki
نظر دهید