کوچ از شام
..
..
امیر سفیدی اقدم اهری
..
..
ای شامی ایدن روضه رضوان گیدیروخ بیز
هیهات، تاپیلسین بو گلستان گیدیروخ بیز
..
..
ای چوخ گجه لر یاتمیان آخر نه یاتوبسان
ویرانه ده سن گوزیاشیمی قانه قاتوبسان
ایوای منه ، اولما بی بیوی گوزدن آتوبسان
دور سال یولا سن زینبی گریان گیدیروخ بیز
..
..
دویدون نیه تیز دهریده آواره لریندن
گورسن باباوی سن دی گونی قاره لریندن
سن بیل بی بیوین جانی دیمه یاره لریندن
راحت یاتا قوی شاه لب عطشان گیدیروخ بیز
..
..
هجران اوخون آخر بی بیوم سینمه تاخما
یاندیرما فراق آتشینه زینبی یاخما
گورسن صودامر قارداشیوی حلقینه باخما
یوم گوزلریوی قلبین اولار قان گیدیروخ بیز
..
..
باخ صبریمه، بیر آد منه صابر یازیلیبدی
عاشق دی بی بیون، عشق ده ماهر یازیلیبدی
باخ زینبین اقبالینه زائر یازیلیبدی
عرشه قوناقام، بی سر و سامان گیدیروخ بیز
..
..
باخ گور نجه آواره لریندن سولانین وار
بیر جمع پراکنده ، بولوت تک دولانین وار
ویرانه ده بیر قافله جن ساچ یولانین وار
قوی قبرین اولا زلفیله پنهان گیدیروخ بیز
..
..
نه زجر، قالیب قافله میزده نه سنان وار
بیر عده ولی یاسلی سنه، مویه کنان وار
دور دوت الینی بیرده قیزیم غملی آنان وار
گیتماق نظرین اولسا دور الان گیدیروخ بیز
..
..
سالدین بو یانان قلبیمه بیر آتش سوزان
سس ویر سسیمه، قویما اولا زینبی گریان
سوقاتِ سفر ویر آپاریم گر اولا امکان
صغرایه ویریم ایلیوم افغان گیدیروخ بیز
..
..
گویلون واریدی سن گیده سن کرب و بلایه
اوردا گله سن زینبیلن آه و نوایه
گورسن ، سن اگر اکبری ایت بیله گلایه
خوار اولدی منه شام غریبان گیدیروخ بیز
..
..
گر چارم اولا بیرده قیزیم شام ده قالام
سندن باباوین بوردا قالیب عطرینی آلام
دورسان ایاقا نازیله قول بوینوا سالام
قمچی آجیسین بولمرم اوندان گیدیروخ بیز
..
..
چوخ یاره وارین دلده قیزیم گلمز حسابه
باش قوزا گوز آلتی نظر ایت غملی ربابه
یانّام بونا باغلاندی قولون بند طنابه
خوش حالینه، ایپ اؤپدی قولوندان گیدیروخ بیز
..
..
چوخ چکمز عزیزیم،منه بیر گون چاتاجاقسان
بو آیریلیقین فکرینی باشدان آتاجاقسان
سن حشره کیمی شامده منلن یاتاجاقسان
من گون ساییرام تا گچه دوران گیدیروخ بیز
..
..
لازم دی یته یارین الی دامنِ یاره
قویمام اولا بو بند محبت داخی پاره
بیر گون سنه خاطر گلرم شامه دوباره
فکر ایتمه اولور عشقیمه پایان گیدیروخ بیز
..
..
حسرت ده دی قبرین گوروب «عاذل» اولا راحت
سن شه قیزیسان، نوکریوه ایله عنایت
گهواره بیر الده گله ای کانِ کرامت
بیر الده ده گوشوارۀ جانان گیدیروخ بیز
..
..
..
#کوچ_شام #اقدم_اهری #ترکی #زبدةالاشعار
نظر دهید