حالات حضرت علی (ع) در شهادت عمار یاسر و شهادت حضرت زهرا (س)
.
✍️ #زبدةالاشعار ✍️
.
🆔: @nohe_torki
.
مرحوم حاج حیدر خوندل تبریزی
.
بصیرتیله گوزوم بیر جهان خلقته باخ
جهان خلقته بیر اعتبار و عبرته باخ
.
ولاد تیله جهان اهالی بو جهانه گلر
گیدلّه مرگیله بیر رجعت و ولادته باخ
.
غرض عبارت حق اولسا آفرینشدن
بو ناسپاس بشرده اولان عبادته باخ
.
نه حق منعمی آنلار نه نعمتین قدرین
الینده ضایع اولان بی حساب نعمته باخ
.
وجودی بولمور امانتدی اوز باشیمدی دیور
خلاف آیۀ قرآندی گل امانته باخ
.
غرض لیَبلُوَکُم دن ندور دالینجا اونون
و فی کلامده آتاکُمُه عبارته باخ
.
اماندی صرف ایله الله اوزی سِوَن یرده
امانتین عملونده اولان رضایته باخ
.
على که خلقت اولوب نفس پاکینه مرهون
جلالته شرقه بیر رهین منّته باخ
.
ایله یورولدی ایله درده گلدی عمرینده
محیط جهلده مقهور اولان فضیلته باخ
.
گیدردی دردینی چاهه دیردی آغلاردی
گوزینده اشک زلاله اورکده رقّته باخ
.
بیر آیری امره بو موردده ایتمدی اقدام
علیده حوصلیه صبره استقامته باخ
.
بولنمورم نجه تنگ اولدی روزگاری اونون
فقط بو مطلبه تاریخدن اشارته باخ
.
علی آقا ایکی دفعه تمام عمرینده
ئولوم ایدوب اوزینه آرزو مصیبته باخ
.
بیریسی غزوۀ صفین ده او جنگده بیر
معاویه ایلین ظلمه باخ جنایته باخ
.
او گونکه ظلمله عمار یاسر اولدی شهید
زهی شرف ایله عمّاره باخ شهادته باخ
.
سنانیله اونا بیر یاره ووردی (ابن جوین)
او پایداری ایاقدان سالان جراحته باخ
.
یخلدی تپراقا قان آخدی گتدی طاقتدن
باشین آیردی اَبوالغاویه شقاوته باخ
.
اوزینده ایتدیله بی بهره مال دنیادن
ایکی جهاندا کی خسرانه باخ خسارته باخ
.
اجابت ایتمدی حجّاج خواهشین ای داد
جزای امره مکافاته باخ طبیعته باخ
.
تاَسُّفیله دیدی دینیمیز فدا اولدی
سیزون یولوزدا بیزه یوز ویرن هلاکته باخ
.
خلاصه قاتل عمّار تیره بخت اولدی
ولی سفارش عمّاره باخ سعادته باخ
.
وصیّت ایتدی منی دفن ایدون لباسیمیله
او پاک پیکره زیبنده قانلو خلعته باخ
.
ایدم مخاصمه الله یانیندا دشمنیله
او پاکبازیده اخلاصه باخ ارادته باخ
.
گرگ معاویه اوردا جوابگو اولسون
بو ظلمله توکولن قانلارا وصیته باخ
.
گلوب نه حالیله گوردی امام عمّاری
کُتُبده معتبر اخباره باخ روایته باخ
.
آخوبدی قانی ایدوب تیره تپراقی گلون
او قانیله بویانان لاله رنگ ترتبه باخ
.
اولوب معاویه نون لشگرینده نشر خبر
همان خبرده کی عکس العلمده وحشته باخ
.
او لشکرین چوخی آگاهیدی بو مطلبدن
مقام صدقده فرمایش رسالته باخ
.
اولان زماندا بنا مسجد رسول الله
تلاش و کوشش عمّاره باخ رشادته باخ
.
دعا ایدوب اونی آینده سین ویرویدی خبر
رسول حقّده اعجازه باخ کرامته باخ
.
بویوردی بیر فئۀ باغیه شهید ایده جاق
جنایتیله بو عمّارى صدق صحیته باخ
.
علاوه هاردا بو عمّار اولسا اوردادی حق
ملاک حقّدی عمّارده لیاقته باخ
.
علامتی بودی آخر غذاسی سود اولاجاق
او لفظ وحی ده اخباره باخ علامته باخ
.
اودم که تشنه قایتدی امام محضرینه
على جمالینی بیرده گوره زیارته باخ
.
سو ایستوب او، غلامی الینده سود گتوروب
سوسوز جگرده عطش سوزی گور حرارته باخ
.
سودی گوروب دیدی صَدَّقتَ یا رسول الله
آلوب ایچوب سودی سیرابه باخ سقایته باخ
.
گینه قایتدی ایده اوز وظیفه سین ایفا
رکاب حقده شهید اولدی بیر ولایته باخ
.
او گئتدی روضۀ رضوانه رستگار اولدی
ذلیل اولوب فئۀ باغیه مذلّته باخ
.
جنایت اوز اثرین ویردی اوز ایشین گوردی
بلی معاویه نین لشکرینده ذلّته باخ
.
دیردی بیربیرینه اهل شام حیرتیله
بیزوق یقین فئۀ باغیه خیانته باخ
.
گوروب معاویه لشکرده آیری زمزمه وار
او فتنه کارده تدبیره باخ سیاسته باخ
.
بو نیّتیله که افکاری انحرافه چکه
خیال باطله بیر ایله سوء نیته باخ
.
دیدی معاویه: قاتل علیدی عمّاره
ایناندیلار ایله فرهنگسیز جماعته باخ
.
گتورمسیدی اگر کار زاره ئولمزدی
دلیله باخ سوزه باخ شرمه باخ وقاحته باخ
.
ایشتدی بو سوزی مولا پوزولدی احوالی
محیطه باخ او جماعتده بیر جهالته باخ
.
بویوردی بس عمومون قاتلی پیمبر اولار
على کلامیدی منطقده بیر صراحته باخ
.
اُحُدده حمزه شهید اولدی کیمدی مسئولی
او سیّدالشّهداده اولان جلالته باخ
.
مع الأسف او جماعتدن اولمادی آیلان
قبول ایدوبله غلط فکری خواب غفلته باخ
.
بوله بوله که على منبع هدایتدی
دایاندیلار گنه لشگرده بیر ضلالته باخ
.
او سروره نقدر مشکل اولدی بو مطلب
غم شهادت عمّاره درد فرقته باخ
.
گورون على نجه مظلوم اولوبدی دنیاده
بولور ئولومده نجاتی او شیر صولته باخ
.
شرار قلبینی ایتسون نه نوعیله خاموش
گوزینده سیل سرشک ملال و حسرته باخ
.
کمال یأسیله مولا خطاب ایدوب ئولومه
خطابه باخ سوزه باخ درده باخ حکایته باخ
.
دالینجا حسرتیله لَستُ تارکی بویوروب (1)
اَرَحنی لفظنه باخ ادّعای نصرته باخ
.
که یعنی گل منیده راحت ایله دنیادن
امامه باخ غمه باخ انتظار راحته باخ
.
تمام دوستلریمدن منی آیردون سن
یورولموشام منیده گل آپار قضاوته باخ
.
اوزون اَراکَ بصیراً اَحَبُّهُم ای مرگ(1)
و یا که وار سنه بیر رهنما کنایته باخ
.
نشان ویرور سنه کیم بیر بیر آشنالریمی
او باوفالره ایثاره حسن خدمته باخ
.
مَعَ الأَسَف فَقَد أَفنَیتَ فَقِد کلَّ خلیل(1)
بلی کَاَنَّکَ تَنحوا دلیل و حجته باخ
.
أمام بیر ئولومین بوردا آرزو ایلیوب
نه آرزودی امامه فشار امّته باخ
.
بیرینده اوندا کی تاپشوردی قبره زهرانی
کنار قبرده حال شه ولایته باخ
.
بویوردی گل منیده ای ئولوم خلاص ایله
بو پست دهرده بیر خصلت رذالته باخ
.
نه ماجرادی على دویدی اوز حیاتیندن
مقام فاطمیه باخ خانمدا عزّته باخ
.
سلام ویردی جواب اولمادی حبیبیندن
گلوبدی خاطری درده کمال الفته باخ
.
بویوردی فاطمه من قبریون کنارینده
دایانموشام تک و تنها بو بزم خلوته باخ
.
على غریبدی یالقوزدی یوخدی بیر کمکی
بو قدر کثرت خلقیله سنده وحدته باخ
.
حسینیله حسنی ایلیوم نجه آرام
فغان زینب و کلثومه باخ قیامته باخ
.
او مهد عاطفه سنسیز اولوبدی غمخانه
شرار نالۀ جانسوز آل عصمته باخ
.
نیه عم اوغلوا زهرا جواب ویرمورسن
عجبدی خواهشیمه اولمیان اجابته باخ
.
على زمانه ده قورخور حیاتی طول اولسون (2)
او طول عمرده تجدید امر بیعته باخ
.
نه لر اولار منه آینده ده اوزوم بولورم
گرک دوزوب دایانام مقتضای حکمته باخ
.
آلالّا حقّیمی الدن ایدلّه خانه نشین
ریاست اوسته بو امّتده بیر عداوته باخ
.
دیر خلیفه که گیت قال على مُسَیّجَده
گرک گیدم منه باخ قدرت خلافته باخ
.
غریب عم اوغلیوی تبعید ایدلّه شهریندن
کنار یثربه، اسلامه باخ عدالته باخ
.
دوشر فشاره گورر تنگناده قالدی گنه
منی مدینیه احضار ایدر ندامته باخ
.
اونون سیاستی ایجاب ایدر گیدم قایدام
او ترک دار و دیاره دوباره رجعته باخ
.
جهالتیله ایدر علم مسندین اشغال
اوزین خلیفه بولر خلقه اوندا نخوته باخ
.
دیر گیت اگلش ایوینده فقط اوخی قرآنپ
بو جامعاته قاریشما على فراسته باخ
.
اوزی دیر که على اولماسا هلاک اولّام
خلیفه دن منه بیر احترام و حرمته باخ
.
بو اعترافیله ارثیه می ایدر غارت
هوای نفس اسیرینده غصب و غارته باخ
.
گوروب امام که غم الدن اختیارین آلوب
تحمّلینده کی تاراج صبر و طاقته باخ
.
پناه آپاردی نمازه او شاه دریا دل
او تیره شبده نمازینده قصد قریته باخ
.
فقط خدائیله مأنوسیدی او حالتده
او پاک بنده ده اخلاصه عرض حاجته باخ
.
بو نیّتیله که آلام قلبی اسکیلسین
یوزین قویوب قوری تپراقه بیر اطاعته باخ
.
دیردی سجده ده یارب منه عنایت ایله
فراق فاطمه ده خواهش عنایته باخ
.
بو آیریلیقدا اوزون صبر ویر منه یارب
نه قدر مرحله مشکلدی استعانته باخ
.
او فاطمه که همیشه منه ویرردی سلام
جواب ویرموری ایمدی غمیمده شدّته باخ
.
–
نجه جواب ویرر آیریلیق سالوبدی ئولوم
تراب تیره ده مهر سپهر رأفته باخ
.
گینه آلار اورگیم دردین اولسا امکانی
دیسم خلافدی زهرادہ ترک عادته باخ
.
اجل گلوب منیده راحت ایلیه ای کاش
بو طول عمرده اشراردن جسارته باخ
.
منیم بتولیدی هر غم گونومده غمخواریم
قاپوم یاناندا حریمیمده کی حراسته باخ
.
دایاندی مندن اوتور سالدى جانینی خطره
وفا و همّته سیر ایله بیر محبّته باخ
.
امان او مرحلۀ ماجرای بیعتدن
او سخت لحظه ده ایثاره باخ شجاعته باخ
.
دالیمجا دوردی او حالیله مسجده گلدی
دوزنمدی منی بیکس قویا عطوفته باخ
.
عتابیله دیدی سیز ال چکون عم اوغلومدان
اوزی یارالی منه ایتدوقی حمایته باخ
.
خیال ایدوب ایشیدنلر که مصطفی دانشور
او گرم لهجه دن اخذ ایتدوقی وراثته باخ
.
منی قلجلارین آلتندان ایلدی آزاد
شجاعته شرفه قدرته شهامته باخ
.
جلال و شأنی اولار همطرازی قرآنون
سنه حدیث شریف کتاب و عترته باخ
.
اطاقینی عوض ایتدی گلنده نابینا
حیایه، عصمته، تقوایه، زهده، عفّته باخ
.
مقام فاطمه نی ایستدی بولوندورسون
رسول حقّده اظهاره باخ دلالته باخ
.
بویوردی گوزلری گورمور که ابن مکتومین
جواب فاطمه ده صدقه باخ صداقته باخ
.
گوزوم گوروردی علاوه بو سقفین آلتندا
اولا او، منده اولام ننگدی صیانته باخ
.
سایوب خدا غضبین هم ردیف اوز غضبی
رضای حقدی رضاسی جلال و شوکته باخ
.
جزاده اودّان ایدر ایستین لرین آزاد
شفیعه دور صف محشرده بیر شفاعته باخ
.
امام بیرده دوتوب روضۀ رسوله یوزین
یانقلی دلده کی درد دله شکایته باخ
.
کمال شرمیله عرض ایتدی یا رسول الله
عجب او اجر رسالتده بیر موّدته باخ
.
سلام اولا سنه مندنده اوز قیزونداندا
حضور انوره گلماقدا اوندا رغبته باخ
.
حکایت ایلر اوزی عمده سرگذشتیمزی
دوشن محاقه خطادن او ماه طلعته باخ
.
منه بتولی سلامت ودیعه وئرموشدون
قصوریم اولسا گذشت ایله منده خجلته باخ
.
اوزومده خانه نشینم جفای امّتدن
علیده حوصلیه امّتونده جرئته باخ
.
اماندی سنده وفا ایله عهدیوه خوندل
مجازی مرگ ایله بسدور داخی حقیقته باخ
.
دیدون که عمروم اگر اولسا خدمتیم چوخ اولار
او حال عهدیوی بیر یاده سال او ساعته باخ
.
تجاهل ایتمه منزّهدی ساحت زهرا
دی هر نه دلده دی دردون او پاک ساحته باخ
.
.
(1)أَلاَ أَیهَا اَلْمَوْتُ اَلَّذِی لَیسَ تَارِكِیأَرِحْنِی فَقَدْ أَفْنَیتَ كُلَّ خَلِیلٍ أَرَاكَ بَصِیراً بِالَّذِینَ أُحِبُّهُمْكَأَنَّكَ تَسْعَى نَحْوَهُمْ بِدَلِیلٍ
اى مرگ كه گریبانم را رها نمیكنى مرا آسوده بگذار تو كه تمام دوستان مرا از بین بردى.مى‌بینم چشم دوخته‌اى بدوستان من گویا یك نفر بتو آنها را معرفى میكند.
(2)لَا خَیرَ بَعْدَكَ فِی الْحَیاةِ وَ إِنَّمَا أَبْكِی مَخَافَةَ أَنْ تَطُولَ حَیاتِی
در زندگی بعد از تو خیری نیست؛ همانا گریه‌ام از آن است كه مبادا زندگیم طولانی شود.
.
.
.
#حیدریه_خوندل_تبریزی
#فاطمیه_شهادت #عمار_یاسر
#صحابه
#بصیرتیله_گوزوم_بیر_جهان_خلقته_باخ
#ترکی
.
✍️ #زبدةالاشعار ✍️
.
🆔: @nohe_torki
سلام محضر آقای ببیرپور، عارضم که زحمات حضرتعالی واقعا مورد رضایت خدا و اهلبیت علیه السلام هست، یک محبتی کنید که اپلیکشن یا صفحه سایت، امکان تغییر رنگ زمینه باشه،رنگش اذیت کننده هست، سفید بود و خط نوشتاری مشکی، خیلی عالی می شد.
سلام سرور گرامی
ممنون از لطف و مرحمت تان
ان شاءالله مورد درخواستی شما بررسی و در صورت امکان در آینده اعمال خواهد شد.
با تشکر