شهادت حضرت امام موسی ابن جعفر (ع)
#گریز به #قتلگاه
.
.
.
حاج مجید امینی تبریزی
.
بغدادیده سس دوشدی ئولوب باب الحوائج
بیر نچه نفر گلدی ایده نعشینی خارج
.
.
یوز ویرمیشیدی حال خفا بدر دجایه
بو حاله باخوب گلدیله فریاد و نوایه
تا که ساتاشوب گوزلری اوّلده عبایه
گل پیکرینون عطری او سجنی بورومشدی
قالمیشدی رطوبتده لباسی چورومشدی
.
.
بو حالیله تا گوردوله سلطان ولانی
گوزدن آتوب آفاقی چخوب روح و روانی
ردّ ایتدیله تا جسم شریفیندن عبانی
امواجه گلوب بحر مصیبت گینه داشدی
تا که او زمان گوزلری زنجیره ساتاشدی
.
.
زنجیر قالوب گوردوله بوینوندا ویروب جان
مغلول ایدوب ترک جهان حجّت رحمان
بو حاله نظاره ایلیوب قالدیلا حیران
دین گلشنینه گوردوله باد غم اسوبدی
کنده ایاقین بوینونی زنجیر کسوبدی
.
.
زنجیر یریندن آخوری قانی چو یاقوت
واردور یری یانسا بو غمه عالم لاهوت
آخرده اولوبدی در زندان اونا تابوت
ای کاش اولیدی او زمان عالمی برباد
محبسدن اولوب دورت نفر حمالیله آزاد
.
.
معناده توکوب جدّی گهر گوز صدفینندن
احسن دیدی ال چکمدون عالی هدفیندن
یولدا باشی تابوتین آخوب باش طرفیندن
بو منظره نسگللرین آخر علن ایلور
هر بیر باخانی غرق ملال و محن ایلور
.
.
دوشموشدی او تابوت قباقینجه منادی
ایلردی ندا بو دلیله دلده عنادی
اؤز خویش و ائلیندن نچه ایل لردی جدادی
مدّتدی که واردور وطن آواره سیدور بو
گُلدور اؤزی اما چمن آواره سیدور بو
.
.
تابوتی او حالیله باخوب گوردی سلیمان
سسلندی او کیمدور بو حقارتله ویروب جان
ذلّتله ئولوبدور دگی بو یوخسا مسلمان
معلوم اولوری بو ئولنین نسگلی چوخدور
تابوت یانونجا گله بیر کیمسه سی یوخدور
.
.
بو فکریله یغمایه گئدوب صبر و دوامی
سعی ایله دی بو کیمدی ئولن یا ندی نامی
بو سرّی سوال ائتدی خبر گتدی غلامی
عرض ائتدی سلیمانه که ای فخر اعاظم
زنداندا دیوللر که ئولوب موسی کاظم
.
.
قصریندن انوب آتش محنت دله سالدی
دلده آقاوای ناله سی افلاکه اوجالدی
حمّالیلری سالدی یولا نعشینی آلدی
تابوتینی قویدی یره اُول منبع جودین
گوردی اریدوب بار اَلَم خسته وجودین
.
.
بو قصه فزون ایلدی قلبینده ملالین
یاغدیردی بولود تک یوزینه اشک زلالین
اطرافینه جمع ایلدی اؤز اهل و عیالین
سسلندی گلون شوره، دیون وای آقام ایوای
غربتده وطنسیز ئولن ایوای آقام ایوای
.
.
هر تک تکی اوخشاتدی گوزون بیر دولی ابره
تغسیل ویروب ظاهراً اُول منبع صبره
دفن ایلدی چوخ عزّتیله قویدولا قبره
قبره قویوب، عرض ایلدی یات صبریوه قربان
چوخ اینجمیسن عالم اولا قبریوه قربان
.
.
باطنده ولی اوغلی رضا داده گلوبدی
گوز یاشی توکوب ناله و فریاده گلوبدی
دلده بابا وای خطۀ بغداده گلوبدی
غسلین وئروب عزّتله توکوب اشکین عذاره
یاندی، اَریَن جسمینی تاپشوردی مزاره
.
.
#گریز
.
غربتده بو جان وئردی اولوب غصّه دن آزاد
یثربدن اؤز اوغلی گلوب ائتدی اونا امداد
علّت نه اولوب قتلگهه گلمدی سجّاد
دوشموشدی او ساعت که حسین قان آراسیندا
یالقوز یارالی لشگر عدوان آراسیندا
.
.
قویموشدی یوزون توپراقا افسرده و خسته
اطرافینی آلمیشدی عدو دسته به دسته
شرم ایلمیوب ووردولا یاره یارا اوسته
پیکانه نشان اولموشیدی جای سجودی
زخم و یارادان تازه گل آچمشیدی وجودی
.
.
گُل پیکری اولموشدی دمائیله مُخَضَّب
دوشموشدی بدن یاره تراب اوسته مُعَذَّب
سویلردی اوزون شاهد اول احوالیمه یارب
یاندیم سوسوزومدان، سو آخور چوللره بیر باش
بیر قطره تاپیلمور منه، قانه دونه ای کاش
.
.
عهد ائتمیشیدیم عالم عشقونده وئرم جان
ایفا ایلدیم عهدیمه، نقض اولمیا پیمان
مین شوقیله وئردیم سنه یتمیش ایکی قربان
هر تک تکین ارشاد ایلدیم من ره عشقه
تا اینکه منا رشک ایده قربانگه عشقه
.
.
اثبات ایلدیم حقیوی تا قالمیا مکتوم
کیمدور حق و ناحق ایلدیم عالمه معلوم
پیمان عتیق آز قالوری تاپماقا مختوم
بیر ایمدی گمانیم گلور عالمده بو باشه
گلسه یتورر شمر لعین عهدیمی باشه
.
.
یاز آغلا #امینی نه قدر واردی مجالون
جاری ایده گوزدن یوزیوه اشک زلالون
غفلت ایلمه کرب و بلا اولسا خیالون
دوت باب الحوائج اتگیندن، ایله افغان
جان اوسته دیردی بو سوزی ای حق منان
.
.
یوخ گوشه ی غربتده منی یاد ایدن الله
سنسن هامی بیکسلره امداد ایدن الله
ای یوسفی زندانیدن آزاد ایدن الله
قورتار منیده سندِ جفا گستر الیندن
چوخ چوخ منه ایذا یتور اول کافر الیندن
.
.
#کاظمیه_شهادت
#بغدادیده_سس_دوشدی_ئولوب_باب_الحوائج
#مجید_امینی
#ترکی
.
.
نظر دهید