حواله اولدی یازام کوفه ماجراسیندن

کوفه
.
✍️ زبدة الاشعار ✍️

?: @nohe_torki
.
محمد رضا صادقی و صبوری
.
حواله اولدی یازام کوفه ماجراسیندن
اوخطبه ایکه دیوب زینب ابتداسیندن
.
بوسوز که نقل اولوری سیدبن طاووسی
یازور خزیم و طبرسی یازان رواسیندن
.
یازور حزام اسد زینبی او گون گوردوم
خدایه آند اولا بولدوم اونون حیاسیندن
.
بلیغ صحبت ائدور مرتضی کیمی گویا
اشارئیله دیوب اسکتو،صداسیندن
.
قیتدی انفس مردم دایاندی اشترلر
اذل خدایه دل آچدی خانم ثناسیندن
.
تانیدروب اوزونی جدینه سلام ایلدی
سوز آچدی جدی سفارش ائدن آناسیندن
.
بیوردی کوفه نین اهلی مگر دگلدوز سیز
که بئش ایل اولموسوز آسوده آشناسیندن
.
خیانتیله مگر سیز کتابت ایلمدوز
که دویموشوق طلقا زاده نین جفاسیندن
.
یالاننان آغلامیون بیعتوز یزیده اولوب
آیرماسین سیزی آلله گوروم صلاسیندن
.
چوخ آغلیوب گوله سوز آز بو دار فانیده
که نیلدوز نه دیوم سلطنت هواسیندن
.
بولورسوز هانسی قانی توکموسوز گنه گلوری
صدای حمدوثنا هر قلج یاراسیندن
.
گناهوزی یواسوز سیز مگر نجه اولی بو
که چخموسوز بابامون سنت و رضاسیندن
.
سوروشسا جدیم اگر اهل بیتدن، اوتانون
توکوب قانین گینه ال چکمدوز اساسیندن
.
حیالی زینبیله اهل بیتی آغلادوز
که یر گوی آغلیوری قارداشم عزاسیندن
.
گورنده کوفه نین اوضاعینی خانم زینب
بویوردی ساکت اولون قورخون حق بلاسیندن
.
حقارتیله بیزه باخمیون بیر آز اوتانون
بیر آزجه شرم ایلیون خویش و اقرباسیندن
.
ندن بیزی بو قدر ناقه ده دولاندیرسوز
اوتانموسوز نیه اطفال بینواسیندن
.
حیا ایدون بیزه آز ظلموزی عیان ایلیون
بو قلبیمیز دولودی قوم کین جفاسیندن
.
یوزوز قارا اولا اطفالینه ندن گولوسوز
بیر آزجه شرم ایدون اطفال مه لقاسیندن
.
کجاوه اوسته اوشاقلار توکوله گوز یاشینی
خجیل اولون بولارون اشک پر بهاسیندن
.
گورون رباب نجه سینه سین اوغوشدوروری
اولوبدی قان اورگی حرمله خطاسیندن
.
علی اصغره لای لای دیر ایدر شیون
یر اوسته غم یاغوری کوفه نون فضاسیندن
.
ال اوسته اوخلادیلار بیر ایچیم سودان اوتری
اولوبدی قانینه غلطان بو ادعاسیندن
.
توکور عذارینه اشکین کجاوده لیلی
دولوبدی کوفه اونون آغلاماق صداسیندن
.
دولی گوزیله باخور سیزلره ایدیر شیون
نه شرم ایدیرسوز اونون دل یاران نواسیندن
.
سریه قاسمه اوخشار شکسته بیر نی تک
یانان دلی آلوشورغملی ماجراسیندن
.
اورک باشیندا الی ، وای اوغول دیر آغلار
اوجادان آغلاموری عفت و حیاسیندن
.
ایدوبله قارداشم عباسی قانینه غلطان
گنه اوحالیله ال چکمیوب لواسیندن
.
سالوبلا قوللارینی کوفیان فرات اوسته
بویاندی قانه یوزی باشینون دماسیندن
.
او قدر یاره دگوب اوخ اوخ اوسته سانجلدی
که چخدی قارداشیمون پیکری نماسیندن
.
نجه دیوم سیزه من نوفل ایلین ظلمی
عمودیدن دانشوم یا که دل یاراسیندن
.
الی یوخیدی قویا باشینه او شیر شجاع
یوخیدی اللری آخدی قانی محاسیندن
.
رشید قارداشیمی سیز او یرده اولدوردوز
نه شرم ایدوب نه اوتاندوز اونون آناسیندن
.
اگر چه قوللاریمی باغلیوبدی قوم دنی
نشانه دور بو عمل دشمنون هراسیندن
.
بو کوفه نی دوتا دشمن علی قیزی قوخماز
رشادت ارث قالوب چونکه اوز آتاسیندن
.
بوشهره گلماقیما واردی عمده منظوریم
دیم او رهبروزون جمله ماجراسیندن
.
گرکدی نطقیمیله کاخننی او بی دینون
شجاعتمله سالام لرزیه بناسیندن
.
گرک عمللرینی بیربه بیر ایدم افشاء
خبر ویروم طلقا زاده نین حیاسیندن
.
قویوبدی آدینی مسلم او بی حیای دنی
تصور ایتموری گچمز خدا جزاسیندن
.
بو فکر خامیله ایستور که اولماسون قرآن
نه شرم ایدور اولان اگیننده کی قباسیندن
.
ایاقی آلتدا قویوب حکم شرع و قرانی
اوظالم ال گوتومور فکر بی اساسیندن
.
ایدوبدی سیزلری اغفال او شوم بی ایمان
هاموزی آیری سالوب خالقین رضاسیندن
.
بوقدر خواب ظلالتده یاتمیون اویانون
کسون علاقه مسلمان نما نماسیندن
.
اسیرلر که گورورسوز حسین حرملریدی
اولوبلا بند بلا دشت کربلاسیندن
.
بس ایله یازما «صبوری»که آز قالور یانسون
الونده صفحه، یازان خامه نین صلاسیندن(1)
.
اوسوزلریکه یازوب «صادقی» چتین یازاسان
سوز اهلی یاخشی یازار شعرین آشناسیندن
.
اولوب بوسوزلرون البته وصلهٔ ناجور
دعا ایله سوزون اسکلمه سون صفاسیندن
ـــــــــــــ
(1) صلا به معنی «آتش»
.