بند جوردن اولمشام رها یتمیشم ئورک آرزوسینه #اربعین_غمکش

اربعین حسینی
زبانحال حضرت زینب(س)
.
.
#سبک_ساخلا_ناقه_می_کاروانیدن … 8 سبک سینه و زنجیر
.
.
مرحوم غمکش
.
.
بند جوردن اولمشام رها
یتمیشم ئورک آرزوسینه
گلمیشم حسین اشگ چشمیله
توزلی قبروین شستشوسینه
.
.
ای سوسوز تراب اوسته جان ویرن
سو گتورمشم گوزلریمده من
بیربه بیر دیوم درد قلبمی
بیر توجه ایت ای شه زمن
بولمورم دیوم قتلگاهدن
خیمه گاهدن یا که تلّدن
جور خولیدن یا سنانیدن
شمر دونیدن یا که زجردن
تازیانه لر اینجیدوب منی
باخ ئوزون ئورک آه و واسینه
.
.
سیلی ضربه سی سولدوروب حسین
قیزلارون یوزین یاسمن کیمی
اشگ دیده لر شبنمی اولوب
غنچه گللرون نسترن کیمی
کیم گوروبدی لب تشنه جان ویرن
اکبر و ابوالفضل و سن کیمی
تیر محنته قلبی آشنا
هانسی باجینین اولدی من کیمی
لخته لخته قان دولدوربدی اوز
آهِ سینه سی دل سبوسینه
.
.
چوللری دولاندوق گیجه گونوز
ناقه اوسته من نیزه اوسته سن
بین راهده باغلو قولاری
نصف شب قیزون دوشدی ناقه دن
کاروانی من ساخلادیم سنون
قانلو گوزلرون باخدی نیزه دن
ناگرانیدون منده ناگران
توکدوم اشگ تر رویه دیده دن
زجر و ساربان تازیانه لر
الده گیتدیلر جستجو سینه
.
.
شام شومدن ایلیوم بیان
یا دئیوم سنه شهرکوفه دن
کاسۀ دلی قانیلن دولی
قیزلارون باجون بستۀ رسن
غم قطارینی چکدیلرگهی
رهگذار و بازار وکوچه دن
چیخدیلار تماشایه شامیان
کف ویروب بیزه هر گلوب گیدن
یاندوروبلا، نی، اوت توکوبدولر
دامدان اهل بیتون رئوسینه
.
.
آلتی گوشه لی قبروین سنون
دیدینه گلوب آل مصطفی
گلشنون دل آرادی گل آچوب
یاس و سوسن و لاله و صبا
قانلوکوینگون آلموشام اله
قبرون اوستونه سالمیشام اخا
گلشن و گلستان و گللرون
بلبلون اولوب ذکری آه و وا
بلبلان گلوب ارغوان گلون
برگ و غنچه و شاخه بوسینه
.
.
اول ستیزه جو مجلس شراب
ایچره ایلدی تازه بیر ستیز
قلبمین گیدوب تاب و طاقتی
عرض ایدم ایا خسرو حجیز
اشگ ریزیدیم ائتدی تازه دن
اول زماندا بیر محنت اشگریز
شامی بیر نفر سویلدی، یزید
ایندی ویر منه بو قیزی کنیز
ایلدون اشاره دانش باجی
وئرمه فرصتی دین عدوسینه
.
.
تنگ اولوب سینم نطقیم اولدی باز
یوز دوتوب اونا ایلدیم بیان
قویموسان قباقه حسینیمون
قانلو باشینی الده خیزران
ایلوسن اشاره دوداقینه
آل فاطمه اولدی باغریقان
یوخدی قدرت و جرأتون دغا
بو قیزا ائدن آیری بیر گمان
چوخ عزیزیدی بو قیزیم منیم
هم باباسینه هم عموسینه
.
.
قارداشیم چکردی بوقیزلارین
سینه اوسته هر لحظه نازینی
یاد ایدور بو قیزلار حسینمون
قتلگهده آخر نمازینی
داش دگوب جبینیندن آخدی قان
آچدی قان دولان جا نمازینی
قویدی سجدیه آنّنی ادا
ایلدی مناجات و رازینی
اوجینا یغوب قانینی اوگون
سو یرینه آخر وضوسینه
.
.
مونس اولمشام محنت و غم و
غصه و ملالیله روز و شب
اشکیمی یوزه جاری ایلرم
اربعین خیالیله روز و شب
عاشقم اوپم آلتی گوشه لی
قبروی کمالیله روز و شب
لطف ایله شها ذرّه دوشمه سون
لکه «غمکشون» آبروسینه
.
.
#اربعین #غمکش #ترکی #زبدةالاشعار