زبدةالاشعار

بهار فصلی دوشنده گوزوم گلستانه #کوچ_کربلا_شانی_تبریزی

#بهاریه
در آرزوی زیارت
آمدن علیا مکرمه (ع) به قتلگاه
.
.
مرحوم شانی تبریزی
.
.
بهار فصلی دوشنده گوزوم گلستانه
آچلمیان اوره گیم لاله تک دونر قانه
.
بو رسمدور گیده هر کیمسه سئیر گلزاره
فرحلنور اوره گی گیرم اولسا غمخانه
.
ولی باخاند گله گل کیمی سارالّام من
یتر ملال دلِ عندلیب خوش خوانه
.
حسینیلر داخی بیرده گلون گل ایگلمیاخ
خرابه ده اوتوراخ گئتمیاخ گلستانه
.
چون اکبر ئولدی خرابه نشین اولوب لیلا
گرک ایداخ تبعیت او زار و نالانه
.
گورنده نیزده شهزاده اکبرین باشنی
باخاردی زلفنه باخمازدی دسته ریحانه
.
گر ایستسن باخاسان ای گوزوم گلستانه
دیار شهریوی ترک ایت دولان غریبانه
.
سراغ ایله او یری کربلادی بیر آدی
باخوب او روضیه میل ایتمه باغ رضوانه
.
گورن او صحنی بهشت برینه میل ایتمز
سزادی زائری قاره گیه بوعنوانه
.
اولوم حسین آقا غمناک قبریوه قربان
بو جمعی ایسته بو ایل عید ماه قربانه
.
او قبر اگر منه عمریمده اولماسا قسمت
بو حسرت همره اولور پای قبره گور یانه
.
بیر عمردور که حسین گاه کربلا دئموشم
اورک او یردی دوشه گر گذاریم هر یانه
.
نصیب اولا هامی حسرت چکنلریله بله
سلام ایدوب ال ال اوسته دوراخ ذلیلانه
.
چوخ ایستورم دولانیم بیر او قبریوین باشنا
سُوور بو رسمدی شمع وصالی پروانه
.
مخیّر اولسا بهشتیله کربلا فرضاً
بهشتی ایستمز هر کیم گر اولسا فرزانه
.
نچون او یرده دعا مستجاب اولور بی رشک
بهشت حاصل اولور اوردان اهل عرفانه
.
علاوه ال که یته اکبرین یاتان یرینه
دگل او ال داخی لایق شرار نیرانه
.
او دل که ایلیه عباسیله حسینه سلام
روادی بیرده او دل نار دوزخه یانه
.
ولی بوشرطیله که عارفاً بحق اولا
اورک گوزیله باخا سرور شهیدانه
.
قلم ازلده گلستان و گل سوزی یازدی
دوباره شرح ویرم ایسترم او عنوانه
.
غریبه سئیر و صفا وار او گلستان ایچره
گل اوسته ناله چکور عندلیب مستانه
.
او گلشنین گلی قاسمدی بلبلی آناسی
ویرون تسلّی خاطر عروس نالانه
.
حسین پیکرینون هر یاراسی بیر گلدور
که ایمدیده گلور عطری مشام هر جانه
.
او عطر خیمه ده یتدی مشامنه تاکیم
بلالی زینبی چکدی بلالی میدانه
.
هی عطرین آلدی دولاندی اوقان دولان دشتی
که سئیر عشقده یتدی وصال جانانه
.
ولی بیرعاشقه اولموب نصیب بیله وصال
مگر او وادی سیناده پور عمرانه
.
او اَرنی سویلدی بو سویلوب اَ اَنت اخی
او محو اولدی بو گَلدی دله دلیرانه
.
دیدی یارالی آنام حقّینه دانش دیله گل
نشان ویر آخر اوزیوی بو واله حیرانه
.
آنا آدین باجیدان تا ایشیتدی تشنه اوغول
ادب نثار ایلدی اسم خیر نسوانه
.
دیدی آنام باجی گل گل حسینوم زینب
نه آه و ناله دی دولدورموسان بیابانه
.
یازولّا پیکری مستوریدی امام زمان
نه نوعی پرده چکوم مطلب نمایانه
.
باخوب اوگود دولی لخت نیزه دور اوخدور
بدن گورونموری اودلاندی گلدی افغانه
.
قلج سنقلارینی گوتدی بیر به بیر آتدی
بویاندى اللرى تازه خضاب تک قانه
.
اگر صحیح اولا حتماً او مقتلین یازیسی
ئولونجه آغلاسام آزدور بو درد پنهانه
.
یازار دوزلدی اوتوردی یارالی جانیله
که تسلیت ویره اول زینب پریشانه
.
دل آچدی درد دله تا او دلربائیله
کدر یتیشدی دل پاک شیر یزدانه
.
او طور عشقده زهرا، علی، پیمبر، حسن
باخاردی زینبیله شهریار عطشانه
.
علی دیردی حسین وای بتول جان زینب
قیزیم نه گوندی بو لعنت بو دور دورانه
.
منیم یریمه ده اؤپ اوغلومون یارالارینی
سرشک چشمیله سو سپ بو نعش شان شانه
.
یری واریدی دییدی آناسینا زینب
بغیشله زینبوی ای رسوله ریحانه
.
اؤپوم حسینمون آخر هاراسنی آناجان
یارا یارایه یتوب باخ سنان و پیکانه
.
او قدر آغلادی آغلاتدی دشمنی حتّی
فغان و ناله سی اود سالدى قلب عدوانه
.
دیدی حسین بولوسن بیرزادا گمانیم یوخ
اساس زینت شاهانه گتدی تالانه
.
قوییدیلر منه ای کاش کهنه بیر ساتر
که سایبان ایلییدیم بو جسم عریانه
.
دولاندی دوره اوگون گچدی عزتیم واریدی
گیدوبدی غارته قالمور اساس شاهانه
.
نه بیرباجون هامی بیر معجره اولوب محتاج
بیری اولیدی دییدی او شاه مردانه
.
نجفده یاتما بابا کربلایه ایله گذر
زمانه گورنه مساعد دی آل سفیانه
.
سویوب عیالوی ایلوبدی اهل شام اسیر
هنوز ظلم و ستم یتمیوبدی پایانه
.
چکوله شامه حسینون دوروب اذان ویروری
یتیم اوشاقلارین ایلور سپرده سبحانه
.
بولورکه کوفه ده بیر مجلس ایلیوب برپا
علیل امامی ایدوب دعوت ابن مرجانه
.
.
#کوچ_کربلا #شانی_تبریزی
#قتلگاه #بهاریه_شانی_تبریزی
#بهار_فصلی_دوشنده_گوزوم_گلستانه
#ترکی
#زبدةالاشعار

متن پیشنهادی:  کیم ابوالفضل عشقینه دنیا بویی پرچم ویرا #ورود_محرم_سیدی_زنجانی

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی