شب عاشورا
گریز به حضرت ابوالفضل علیه السلام
..
..
..
حسینی زنجانی
..
..
..
بو فنا دهره گوگل باغلاما دل بیر آنی
عیشی مذمومیدی لذّتلرى یکسر فانی
..
باغلاسا عهد اگر کیمله وفا ایتمیه جک
تاپسا فرصت نه زمان سیندیراجاق پیمانی
..
چوخ سویر عاقلی عالمده پریشان ایلیه
یتوره سلطنت و جاهه ولی نادانی
..
چاهیده گاه ویروب یوسف صدّیقه مکان
مصریده گه مه کنعانی ایدوب زندانی
..
گه زناکاریدن ایلوبدی حمایت افسوس
کسدیروب طشت طلا ایچره سر یحیانی
..
گاه فرعونی اوجالدوب یتوروب آماله
لیک خائف یتَرَقَّبدَه قویوب موسانی
..
گه مسیحایه بیلوب نسبت بیهوده روا
پای داره آپاروب گه نئجه گور عیسانی
..
آل پیغمبری گه دام بلیاته سالوب
ایلیوب شاد دل آل ابو سفیانی
..
قویمیوبلار وطنینده قالا زهرا بالاسی
مکّه دن خارج اولوب ترک ایلیوب بطحانی
..
باشدا اصحابی گزور چوللری سرگشته امام
گول جمالین گورور ایمان گتورور نصرانی
..
یتیشوب کرب و بلایه شه فرخنده جلال
موسى عشق مسخّر ایلیوب سینانی
..
بیر چوخور یرده وروب خیمۀ شاهانه حسین
تا قالا امنیده هم قیزلاری هم نسوانی
..
رسمیدی گیتسه بویوک شخص قوناق بیر شهره
هدیه الده آپارالار گوره لر مهمانی
..
عجبا ایلدی بورسمه عمل کوفه لیلر
آلدیلار دور شهى الده جفا پیکانی
..
آلّانوب پوچ و یالان وعده لره شام اهلی
دینلرین ساتدیلا بلکه آلالار دنیانی
..
چوخلاری حافظ قرآنیدی گر ظاهرده
ئولدوروردی ولی جزئی ثمنه قرآنی
..
یدّی گون گیچدی اولوبدی شب عاشور بلا
گون گیدوب مغربه ظلمت بورودی صحرانی
..
امر ایدوب خیمه قباقینده قویولدی کرسی
صندل اوسته اوتوروب کرب و بلا سلطانی
..
بعد بسم الله ایدوب حمد خدای ازله
اوخودی حسرتیله آیۀ استرجانی
..
ئوز دوتوب باشدا کی اصحابینه ایلوبدی خطاب
اولون آگه بیلوسوز یوخ سوزیمون کتمانی
..
من ریاست هوسیله بوچوله گلمه مشم
سلطنت ایستمورم خوشلامارام عنوانی
..
هدفیم امر به معروف ایله مکدی تنها
ویروب الله تعالا منه بو فرمانی
..
من سحر عشق وضوسین آلارام قانیمله
قیلارام وصل نمازین گوررم سبحانی
..
دیدی خاموش ایلیون مشعل و فانوسلری
بوروسون ظلمت شب هر طرفی هر یانی
..
گیتسه هر کیم دیدی گیتسون ولی چوخ آهسته
بیلمه سون گیتماقوزی فاطمه نین ریحانی
..
قوتاروبدی سوزونی چکدی عباسین باشنا
گوزونی یومدی او کان کرم یزدانی
..
قیدوب عشق ریاستله گلنلر یکسر
غالب اولدی اولارا خوی دد و حیوانی
..
نوریدن چکدیلر ال گیتدیله ظلماته طرف
یاری تک قویدولا شاد ایلدیلر اعدانی
..
دسته دسته او بلا عرصه سینی بوشلادیلار
حاصل بیعیدن اخذ ایلدیلر خسرانی
..
شرف و دینینی ایمانینی آخر اوتوزار
بشرین اولماسا باطنده اگر وجدانی
..
الغرض نفسینه لبیک دینلر گیتدی
ایتدی اغوا اولاری وسوسۀ شیطانی
..
قالدى یتمیش نفر عشّاق کَحَبْلٍ مَرْصُوص
دیریلیکدن گیچوب حفظ ایلدیلر ایمانی
..
بیرده تکلیف ایلدی فاطمه نین دلبندی
قالمیون سیزده گیدون وار بو چولون بحرانی
..
بیر بیره باخدی هامی آغلادیلار سیزلادیلار
دوردی عرض ایتدی حسینون قوجالان دربانی
..
آند ویرم آناوین حقّینه یاندیرما بیزی
گیتمک آدین دیمه آغلاتماگلان طفلانی
..
گوردی اصحابینی ثابت قدم اول کان کرم
قوردی بیر بزم صفا مدرسۀ عرفانی
..
نصف شب طور ایلدی کرب و بلا صحراسین
ظاهر ایتدی کف دستینده ید بیضانی
..
ایدوب اعجاز امامتله حسین کشف حجاب
چاغیروب محضره لبّیک دین جانانی
..
گلون ایندی دیدی دقتله باخون تا گوره سیز
باغ جنّتده سحر ایلدیگوز مأوانی
..
گوردی هر کس یرینی شوقیله عرض ایتدی گورن
قوتارار بو گیجه ، تا اینکه گورم فردانی
..
عشقیله بوسه وروبلار او شهین اللرینه
آلدی مدرکلرینی عشق هنر جویانی
..
گوردیلر لیک ابوالفضل اوزاقدا دایانوب
باخور حسرتله حسینه او مروّت کانی
..
سوروشوبلار ندی علت آقاسن گلمورسن
گورمگه اوز یریوی مرتبۀ شایانی
..
آلا گوزلر دولوب اشگیله دوتولدی ئورگی
ایسلادوب گوزدن آخان یاشی قرا مژگانی
..
دیدی من وصل نگاری سوورم اوّلدن
گورمسم یاریمی گر ایستمرم طوبانی
..
سیز باخون جنّته من روی حسینه باخورام
صورتونده گورورم نور حق یکتانی
..
نیلورم جنّتی فردوس برینمدی حسین
خاک پاییله عوض ایلمرم رضوانی
..
عاشقم روز ازلدن من حسینین ئوزینه
باخیشی زنده ایدر خاطرۀ طاهانی
..
اولسا هر یرده حسینیم اورا جنّتدی منه
هاردا گر اولماسا یوخدی او یرین رجحانی
..
اللرین اوپمگی ویرمم دیدی یوز جنّاته
آتمشام اوندان اؤتور عالم ما فیهانی
..
آنادان اولدوم ازل باخدیم حسینین یوزینه
آلدی آغوشه ئوپوبدی اودا بو نالانی
..
منده عهد ایلمیشم دائم ایاقیندن ئوپم
قدمونده قویولا توپراقا بو پیشانی
..
دل آچان گوندن همیشه دیموشم نوکریوم
ئورگدیب امّ بنین بو سخن شیوانی
..
یخیلاندا یره آتدان دیدی بیر یول قارداش
گل حسین درک ایله قولسوز یخیلان عنقانی
..
قولّاریم اولدى قلم مشگیم اولوب تیره نشان
سو توکولدی یره شرمنده ایدوب سقانی
..
الیم اولسیدی بدنده علمیم یاتمازدی
سر فکنده ایلمزدی بو بلا گردانی
..
دگدی بیر اوخ گوزومه قارداش ایتوردوم یولودا
گوز یاشیملان قاریشوبدی باشیمون آلقانی
..
صاق گوزوم اولدی حسین آدیوه قربان اما
صول گوزومده گل اولا مقدموین قربانی
..
وردیلار آهن عمودیله باشیمدان قارداش
قارداشیندان او یارا سلب ایلدی یارانی
..
یوزی اوستینده دوشن وقتیده گوردوم دایانوب
بیر خانیم ، باشدا قرا دلده غم سوزانی
..
گل دیدی سینمه سنده منیم اوغلومسان اوغول
سنی چوخ ایسترم عباس حسینیم جانی
..
بیلدیم اوندا او آنام فاطمه دی فوری دوشوب
ایاقون ئوپدوم اونوندا اوجالوب افغانی
..
چوخ ایشتمشدیم آنان فاطمه نین تعریفون
آخر عمریمده حسین گوردوم آنان زهرانی
..
گلمسن گر منه خاطر آناوا خاطر گل
منتظر قویما گوزی یولدا او مه سیمانی
..
ئولمه مش کاش او زیبا یوزیوی بیرده گورم
صدقیله بلکه دوتام تا او گوزل دامانی
..
لطف ایدوب بیرده بو السیز باشیما ال چکه سن
نوکری ایتمیه غمگین آقانین هجرانی
..
سن تلاوت ایله قرآن آچا روحیم قوشی پر
باخا کوثر گوره اوغلی اوخور اعطینانی
..
راضی اولسان سن آقا راضی اولار حق مندن
عفوایله خدمتیمون اولسا اگر نقصانی
..
نعشیمی بیرده آپارما منیم اخیامه شها
گورمه سین خورداجا قیزلار یارالی اعضانی
..
سن آنان فاطمه عباس آقا چوخدی دردی
بو «حسینینون» ، ئورکده ، قیل اونا درمانی
..
..
#شب_عاشورا #حسینی_زنجانی #عباسیه_حسینی_زنجانی #عباسیه #عباسیه_شهادت #ترکی #زبدةالاشعار
نظر دهید