شهادت حضرت زینب سلام الله علیها
.
✍️ #زبدةالاشعار ✍️
.
🆔: @nohe_torki
.
#عندلیب_تبریزی
.
بو همان اوشهریدی بوردا من
سنه چوخلی گوزیاشی یغمیشام
بو بلالی باشیمه نیزه دن
نچه ذبح اولان باشی یغمیشام
توکولنده کوچیه بامیدن
باشیوا دگن داشی یغمیشام
که دوباره آتمیا داش آتان
ئولورم حسینیم هایانداسان
.
.
.
گورورم فراتین آخور چوله
گینه قانیله بولانان سویی
ایکی قول دوشوب ,یولو باغلانوب
دایانیبدور آب روان سویی
باشا باش جنازه دی دوغرانوب
که چکوب قوجاقینه قان سویی
گورورم زمین وزمانی قان
ئولورم حسینیم هایانداسان
.
.
.
سنون عشقیوین من اسیری یم
نه اسیر محنت روزگار
قولی باغلی باشیوین آردیجان
منی شامه ایتدیله رهسپار
سوسوز حنجریندن آخان قانین
هله ساچلاریمدا نشانی وار
مگر اهل عشق اولی بی نشان
ئولورم حسینیم هایانداسان
.
.
.
بو عیاندی جان ویرن آشنا
گوزی یولدا بیر گلن آختارار
دیمورم گلنده کفن گتور
اونی گرچه هر ئولن آختارار
سنی بیکفن گوره زینبون
اوزونه مگر کفن آختارار
باشیم اوسته دیده گلوب آنان
ئولورم حسینیم هایانداسان
.
.
.
منه آرزودی بو صون نفس
او گوزل جمالیوی بیرگورم
یول اوزاخدی سنده یارالیسان
سنه چوخدی زحمتی لاجرم
دیورم دیزیمده توان اولا
بویولون یاراسینی من گلم
یاریسیندا سن گله سن الان
ئولورم حسینیم هایانداسان
.
.
.
داخی بوردیف حیاتیدن
قلم زمانه چخور منی
گلوری قولاقیمه بیر صدا
ایله صون نفسده سیخور منی
دیه سن رقیه دی سسلوری
بی بی قویما ناقه یخور منی
پوزوب حالیمی او گوزل بالان
ئولورم حسینیم هایانداسان
.
.
.
اوزی قورتارور,قوتولان دگول
ولی رنج ومحنتی زینبون
اولاجاق محرمیله صفر
دوشه جاق حکایتی زینبون
دوزولوبدور آنینا گور نجه
عرق شهادتی زینبون
باخورام صاقا صولا ناگران
ئولورم حسینیم هایانداسان
.
.
.
سنون او یارالی جنازه وی
نچه دفعه خوابیده گورموشم
اورگیمده قان قطراتینی
آخان اشگ نابیده گورموشم
قوری یرده جان ویریب ئولماقین
غمینی ربابیده گورموشم
اولور آیریلیق غمی چوخ یامان
ئولورم حسینیم هایانداسان
.
.
#زینبیه_شهادت
#بو_همان_او_شهریدی_بوردا_من
#ترکی
.
✍️ #زبدةالاشعار ✍️
.
🆔: @nohe_torki
نظر دهید