در مدح و میلادیه حضرت خاتم الانبیا (ص) و امام صادق (ع)
.
✍️ زبدة الاشعار ✍️
.
🆔: @nohe_torki
.
سید بشیر حسینی میانجی
.
بو گونده چشم زمین و زمان ایشیقلاندی
حقیقتین گونی چیخدی جهان ایشیقلاندی
.
یاییلدی عالمه نور خدای لم یزلی
او نوریدن دل پیر و جوان ایشیقلاندی
.
امیر قافله ی انبیا اولوب آنادان
مسیر حقّ و ره کاروان ایشیقلاندی
.
پیمبران الهی گلوبله تبریکه
قاریشدی نوریلری آسمان ایشیقلاندی
.
ائشیتدی بو خبری شاد اولوب بهشت اهلی
تبسّم ائتدیله صحن جنان ایشیقلاندی
.
سئویندی قبرین ایچینده آتاسی عبدالله
فضای مرقد و روح و روان ایشیقلاندی
.
سئویندی آمنه باخدوقجا تازه مولوده
آزالدی دیلده غمی جسم و جان ایشیقلاندی
.
کویرِ مکّه نی گلزاره دؤندروب قدمی
اولوبدی مکّه چؤلو دلستان، ایشیقلاندی
.
قیزیل گول عطری یاییلدی جهانه، شوقیندن
هَزاره لر اوخویوب گلستان ایشیقلاندی
.
یازاندا (ماه فرو مانَد از جمال محمّد)
گؤروبله «سعدی» یازان «بوستان» ایشیقلاندی
.
(ستاره ای بدرخشید و ماه مجلس شد)
تاپوب انیس، دل انس و جان ایشیقلاندی
.
یخیلدی توپراقا شاهلار، سینوب بوتون بُتلار
شرفله نوبدی اودور هر مکان ایشیقلاندی
.
پیمبرین یارانوب نوری هر ندَن اوّل
قرانقیلوق داغیلوب کهکشان ایشیقلاندی
.
او بحرِ عشقه اولان تشنه لر اولوب سیراب
که بحر عشق، کران تا کران ایشیقلاندی
.
کبوتران حقیقت اوچوب قفس لردن
مدینه ده قورولان آشیان ایشیقلاندی
.
دولاندی دورِ زمان چاتدی آیری بیر دوران
بیر آیری گون چیخوب عالم عیان ایشیقلاندی
.
قویوبدی جعفر صادق قدم بو غبرایه
رئیس مذهب اولوب، آرمان ایشیقلاندی
.
آچوبدی مکتب فقه و اصول اسلامی
چیخوبدی ظاهره گنج نهان ایشیقلاندی
.
تاپوبدی مذهب برحقّ جعفری رونق
مسیرِ حقده دلِ شیعیان ایشیقلاندی
.
امام عصره بو بایرامی سؤیلورم تبریک
نچون کی دیده ی صاحب زمان ایشیقلاندی
.
سه شنبه لر گئدورم جمکرانه یاری گورَم
نولار کی منده گورَم جمکران ایشیقلاندی
.
دیون «بشیر»ه بو محفلده احسن، ای یاران!
کی شعری اولدی گؤنش بو مکان ایشیقلاندی
.
.
#17ربیع
#بو_گونده_چشم_زمین_و_زمان_ایشیقلاندی
#سیدبشیرحسینی
#ترکی
.
✍️ #زبدةالاشعار ✍️
.
🆔: @nohe_torki
نظر دهید