بو گون یوزی سارالان زینبون ئولن گونیدی #زینبیه_معزی_اردبیلی

شهادت زینب کبری سلام الله علیها
.
.
.
مرحوم معزی اردبیلی
.
.
بو گون یوزی سارالان زینبون ئولن گونیدی
مصیبتی چوخالان زینبون ئولن گونیدی
.
.
دیور امام زمان عمه وای آچوب یاخاسین
جهاندا تیز قوجالان زینبون ئولن گونیدی
.
.
گل ای دیردی اوغول داغی قتلگاهه یخان
باجیسینون اورگین باشی اوسته غصّه سخان
سنان سینه سینه چکمه ایاقدا شمر چخان
هورگی آغ قوجالان زینبون ئولن گونیدی
.
.
امانتون سینه سینده دوتوب سنه یوزینی
غریبدور اوخی قرآن گئنه ایشیت سوزونی
یارالی اللریلن باغلا ناگران گوزینی
الی اورکده قالان زینبون ئولن گونیدی
.
.
گل ای فرات کنارینده قوللاری سالینان
وورولماقا یارا میداندا صاق صولی آلینان
باشینا آهن عمودی عدولرون چالینان
حزین سسی اوجالان زینبون ئولن گونیدی
.
.
کنار شامیده دور کعبهٔ وفا حاجیسی
ئولوب قالوب اورگینده زمانه‌نون آجیسی
گلون آدامسیز ئولور یدّی قارداشون باجیسی
نفسی دای آزالان زینبون ئولن گونیدی
.
.
گل ای سلاحی انن نابکار باشلارینا
وجود پاکی نشان اهل کوفه داشلارینا
چاتان باشینداکی خنجر یاراسی قاشلارینا
علی علی یورولان زینبون ئولن گونیدی
.
.
گل ای قویان گوزی یاشلی اورگی آخلی سینی
وران سپاه عدو طوی گونی آداخلی سینی
چکن دالیجا دمشقه قرا دوواخلی سینی
الین باشنا چالان زینبون ئولن گونیدی
.
.
گل ای غریب بی بی سیندن بیرایل دوشن آرالی
آدی رقیه شیرین دیللی اکبرون مارالی
سوزی گوزل آدی گویچک ایاقلاری یارالی
سنی قوجاقه آلان زینبون ئولن گونیدی
.
.
بیان ایدر گوزی یاشلی کلام بی غرضین
طبیب لر بیله بیلمز اورگینون مرضین
ئولنده گوزلریوی باغلیوبدی چخ عوضین
باشنا قاره سالان زینبون ئولن گونیدی
.
.
گل ای عداوتیلن حلقی تیریلن اوزولن
بوغازینون قانی آغ دوشلوگ اوستنه دوزولن
یارالی قوش کیمی میداندا گوزلری سوزولن
خیام صبری تالان زینبون ئولن گونیدی
.
.
.
#زینبیه_شهادت
#بو_گون_یوزی_سارالان_زینبون_ئولن_گونیدی
#معزی_اردبیلی #زینبیه
#ترکی
#زبدةالاشعار