زبانحال حضرت زینب علیها سلام در کوچ از کربلا
..
..
محیر اردبیلی
..
..
باش آچوبدی جدّیم آغلار بزم محنتونده قارداش
وار آنام بتولون عطری قانلو تربتونده قارداش
..
..
ای اولان گوزل وجودی اعتباری کائناتون
متّصفدی چون صفات کبریایه هر صفاتون
یاندی لبلرون عطشدن ایچمه دون سویون فراتون
آخدی کوثرین سرشگی شوق حسرتونده قارداش
..
..
اولدی بو چوخور مکاندا قوملار اوستی سجده گاهون
ساکنان عرشی گتدی سوز و سازه سوز آهون
عاشقان حقّون اولدی قبله گاهی قتلگاهون
پر وورا چتین ملکلر اوج رفعتونده قارداش
..
..
کیم حسین سنی زیارت ایتسه قصد قربتیلن
همنشینیدور جزاده دوستان عترتیلن
قتلگاهوون دولاننام باشینه بو نیّتیلن
وار ثوابی یتمه میش چون هر زیارتونده قارداش
..
..
سن کیچن گون آیریلاندا مندن ای شه خجسته
آز قالوردی زنده گیدن ال یوسون بو دل شکسته
بیر الون محبّتیلن قویدون اودلی سینم اوسته
مشگلیم آچلدی دست باکرامتونده قارداش
..
..
کاش حسین همین کَرَملی اللرون اولیدی سالم
سینم اوسته بیر قوییدون اسکیلِیدی تا ملالیم
سن دعا ایله کومکلیک ایتسون حىّ لایزالیم
ایلیوم سنون تحمّل هر مصیبتونده قارداش
..
..
چوخ یورولموشام کیچن گون خیمه لر اولاندا غارت
ایتمیوب باجون بیلورسن بیر دقیقه استراحت
قورتارانمازیدی اوتدان قیزلارین بیری سلامت
اولماسیدی گر گوزوم بو باشسیز عترتونده قارداش
..
..
اوندا کی یانان چادردان قیزلارون اوزاقلاشوردی
قورخودان او بینوالر سس چکوردی آغلاشوردی
کیم گلوردی بیر بیریلن روبرو قوجاقلاشوردی
قالمادی توان حریم باطهارتونده قارداش
..
..
وار یری اگر بو غمده دونسه جام چشمیم ابره
باغلامیدی کاش دشمن قوللاریم طناب جبره
زینبون سنون قوییدی نعشووی بو چولده قبره
حیف یوخ امان بو خصم بی مروّتونده قارداش
..
..
نیلیوم حسین بیلورسن دست خالی ام کفندن
نعشووی قویوم کفن سیز آیریلوم نه نوعی سندن
راضیام جنازون اوسته روحیم آیریلا بدندن
حشره جک قالام جوار پاک رحمتونده قارداش
..
..
لطف ایله بو دلفکارین جام آرزوسی دولسون
راضی اولما بوندان آرتوق گلشن امیدی سولسون
ساخلا اؤز یانوندا زینب غملی باغبانون اولسون
بو صفالی گلستان باطراوتونده قارداش
..
..
ایسته دى فلک کیچن شب جام صبریمی داشیردا
آلدى دوره می بیر عدّه قیز اوشاقی خوردا خوردا
سن گیدوب کول اوسته یاتدون زینبون یانان چادردا
صبحه جک یانوب آلشدی نار فرقتونده قارداش
..
..
آی کی چیخدی گویده نورین سالدى نهر علقم اوسته
باخدیم حسرتیله گلدی تازه غملریم غم اوسته
یاتدی سن چوخ ایستین قیز صبح اولونجا سینم اوسته
قالدى فکریم اول غزال ماه طلعتونده قارداش
..
..
مشکلات مُعظَمین وار چون کلید حلّی سنده
هر کیم ایچدی جام حبّون اولدی دهریده برنده
گلدی حشره کی «محیر» دست خالی سرفکنده
اوندا چشم انتظاری وار شفاعتونده قارداش
..
..
#کوچ_کربلا #محیر_اردبیلی #ترکی #زبدةالاشعار
نظر دهید