شجاعت و شهادت حضرت علی اکبر علیه السلام
#تضمین قصیده مرحوم #حقیر_خویی با مصرع اول :
#چو_عزم_رزم_ایدوب_اول_شیر_دل_غضنفر_تک
.
✍️ زبدة الاشعار ✍️
.
🆔: @nohe_torki
.
سید بشیر حسینی میانجی
.
جهانه شبه نبی گلمیوبدی اکبر تک
ایشیقلیدور یوزی گوزلرده شمس اظهر تک
قویوب باشا یاشیل عمّامه سین پیمبر تک
(چو عزم رزم ائدوب اُول شیردل غضنفر تک)
(قدم رکابه قویوب حیدرانه حیدر تک)
.
.
یوزونده جدّی کیمی واردی گورملی قئره خال
ایکی کشیده قاشی تیغِ ذوالفقاره مثال
مینوبدی رفرف عشقه باشیندا شوق وصال
(عقاب اوسته آچوب شاهباز تک پر و بال)
(خدنگ تیرکمانی، سنانی، شهپر تک)
.
.
تعجّب ایلمیون ایلورم بو طرزی بیان
امین وحی دئسه بیرده «لافتا»نی عیان
سزادی چون علی اکبر مثالی یوخدی جوان
(نهال قدّ دلآراسی تک الینده سنان)
(کمان ابروی مژگان، خدنگ، خنجر تک)
.
.
دیلینده واردی ثنا و ستایشی حقّه
گونیله نسبتی چوخدور باخون بو مشتقّه
صاقیلا صول یوزی مظهردی ماه مُنشقّه
(کمند زلفینی چین چین ائدوبدی دؤرد شقّه)
(دوتوبدی دؤرد طرفی بوی مُشک، عنبر تک)
.
.
مَثَل گوزیله باخوب اکبره، دیء مِهر وقار
گورنده شب پره لر بو گونی ائدولّه فرار
صفوف لشکره بنزر گوزونده کیپریگی وار
(وئروب قباقیجه بیر دسته پیش جنگ، قرار)
(دوزوب یمین و یساره سوار لشکر تک)
.
.
مسیحِ حُسنیدی امواتی ایلیور زنده
ارادت عالمی عیسی اولار بونا بنده
صفوفی، زلفی کیمی ایلیوب پراکنده
(دالیندا دست ی زلفی اولوب سرافکنده)
(علی دالیندا بِعِینِه غلامی قنبر تک)
.
.
گوزلّیک ئولکه سینه بو اولوب ازلدن شاه
حسینون اوغلی علی دور اولوبدی عالی جاه
جمالی شمس دلآرا، جبینی همچون ماه
(یوزی صحیفه ی قرآن، خطی کلام الله)
(ایکی طرفده سیه زلفی خطّ مُسطر تک)
.
.
جدلده شیرخدا مثلی مردِ مردانه
گهی الینده باخوب تیغِ تیزِ و بُرّانه
گهی نظر سالوب افواج قوم دونانه
(مبارزتله خرام ائتدی سمتِ میدانه)
(آت اوسته قامت رعناسی بیر صنوبر تک)
.
.
گوزلدی، یوسف صدّیقه چوخلی بنزری وار
نه، اشتباه ائله دیم یوسف اکبره اوخشار
نچون کی خلق اولونوب عین احمد مختار
(یئتوب او عرصه ده بیرگردش ائتدی چون پرگار)
(دایاندی مرکز میداندا قطب محور تک)
.
.
آلوبدی دوره سینی چوخ فرشته دوشادوش
قنادلارین ائلیوبلر قدومینه مفروش
چمنده سرو کیمین اُول جوان اخضرپوش
(جیدایه تکیه ائدوب لحظه ای دوروب خاموش)
(ثباتی کشتی بحر بلایه لنگر تک)
.
.
ائدوبدی خال و خطی مُصحفِ رُخین تذهیب
اولوب وجودی سخا و صفائیله ترکیب
گلوبدی، بی ادب اشراری ایلسون تأدیب
(حصار جسمی وئروب سدّ آهنین ترتیب)
(برابر صفِ یأجوجیده سکندر تک)
.
.
حجازیدن گتوروبدور عراقه بو شوری
هدایت ایلمه دی اصلیقصد و منظوری
دئسم سزادی بو، نورانی ایلیوب طوری
(علی یوزونده پیمبر جمالینون نوری)
(تجلّی ائتدی او دم آفتاب انور تک)
.
.
جهانه جلوه لنوب نور حق جمالینده
بیر اوزگه جذبه سی وار لعل و خطّ و خالینده
عُقولِ جنّ و بشر مات اولوب جلالینده
(دوشوب تحیّره لشکر سکوت حالینده)
(تمام عرصه ی حیرتده مات ششدر تک)
.
.
دیولّه بیربیرینه بیر باخون آلاگوزونه
بو قدری لشکری ذرّه گئتیرمیور اوزونه
دیلینده سوزلری بنزیر پیمبرین سوزونه
(شل اولسون اللریمیز گر قلیج چکک یوزونه)
(اگر چه شعله چکه برق تیغی آذر تک)
.
.
سالوبدی حضرت عبّاس تک صفوفه نظر
اوجالدی قوم ستم دن صدای أینَ مَفَر؟
قباقه گئتمه یه هر پهلوان ائدوردی حذر
(بیلوب عقیده ی قومی، خطاب قیلدی عُمَر)
(بو نوجوان گوروسوز صورتاً پیمبر تک)
.
.
بیری بیریزه دیورسوز بو حیدرین اوزیدور
مگر بو جنگ و جدل جنگ خیبرین اوزیدور
الینده تیغِ شرربار صفدرین اوزیدور
(خیال ایلمیون سیز پیمبرین اوزیدور)
(اولوبدی جدّینه بنزر جمالی مظهر تک)
.
.
دگول بو حیدر و صفدر ولیک حیدری دور
وئرن گونه آیا نوری، جمال انوری دور
بونون گوزل آدی لیلانین هر دم ازبری دور
(دگول رسول، حسینون علیّ اکبری دور)
(شجاعتیله صلابتده شیرِ داور تک)
.
.
شجاعت ارث آپاروبدور هُژبرِ سالبدن
گلوب آتاسینی حفظ ایلیه اجانبدن
غضبله باخماقیلان جان آلور محاربدن
(نه دورموسوز؟ بو جوانی، چهار جانبدن)
(ائدون احاطه جماعت! محیط اخضر تک)
.
.
بو مست و سرخوشِ جامِ اَلَسته حمله ائدون
جمالی قویمیون اولسون خجسته حمله ائدون
بو، شیردور اولا هیهات خسته، حمله ائدون
(قلیج ووران! اوخ آتان! دسته دسته حمله ائدون)
(وورون ییخون یئره رعنا قدین صنوبر تک)
.
.
گلوبدی تک باشینا جنگ ائده بو لشکریله
یوزونده نور نبی، قولدا زورِ حیدریله
رشادتیله رجزخواندی تشنه لبلریله
(سِنان و نیزه و شمشیر و تیر و خنجریله)
(تیکه تیکه بدنین دوغریون گلِ تر تک)
.
.
حسینِ فاطمه نین گلشنون ائدون پوزقون
بو چولده مجنون اولا لیلی، لیل یده مجنون
آتاسینی قویون آغلار آناسینی دلخون
(اونون جمالینی قانیله ایلیون گلگون)
(کی سُرخ رو، گئده بزم نگاره دلبر تک)
.
.
اورک گوزیله باخون کربلایه ای یاران!
دوشوبدی دشت بلا ایچره سهمیلی طوفان
قولاق وئروردی عمرسعده لشکر شیطان
(وئریلدی لشکره تا ابن سعددن فرمان)
(صدای کوس اوجالوب های هوی لشکر تک)
.
.
او دم ظهوره گلوب قدر و قدرت علوی
مجسّم اولدی او میداندا همّت علوی
مذلّته سالا اعدانی عزّت علوی
(گلوب تلاطمه دری ای غیرت علوی)
(قیزاردی رنگی غضبدن طلای احمر تک)
.
.
غضبلی باخدی دوتوب رُعبی جنگ، میدانین
دونوبدی برگ خزانه وجودی دونانین
گوروب دوتوبدی گوزون خونِ سرخ، اعدانین
(آچوب فصاحتیله لعل گوهرافشانین)
(توکوب لآلی دُرّ کلامی گوهر تک)
.
.
بویوردی حقّیله علّت ندور جدال ائدیسوز؟
نیه عزیزِ رسولیله سیز قتال ائدیسوز؟
ندن حرام خدانی بئله حلال ائدیسوز؟
(نه سس سسه وئروب ایقوم! قیل وقال ائدیسوز؟)
(نه بیر بیره قاریشیبسوز زنان و دختر تک؟)
.
.
هانی بحور حروب ایچره کی شناورلر؟
هانی قضاوتی ناعادلانه داورلر؟
هانی یزیده اولان ظالمانه یاورلر؟
(هانی او لاف کذاف ایلین دلاورلر؟)
(گله مبارزته فارسِ هنرور تک)
.
.
محال امریدی سیز لایق جنان اولاسوز
گرَکدی تیغیمیله دوزخه روان اولاسوز
نه باعث اولدی کی شیطانه هم عنان اولاسوز
(حرام اولا سیزه غیرت، گرَک نهان اولاسوز)
(بو غیرتیله، پسِ پرده ده مخدّر تک)
.
.
نجابت اولسا اگر بیر کسین وجودینده
شهامت اولسا اگر بیر کسین وجودینده
رشادت اولسا اگر بیر کسین وجودینده
(شجاعت اولسا اگر بیر کسین وجودینده)
(چیخار اودا قویولاندا، عیاریدن زر تک)
.
.
کمکلیق ایستیورم من، خدای داوردن
رسول خالق ارض و سما، پیمبردن
و بیرده شیرخدا، شاه عشق، حیدردن
(بوکثرت ایچره اوزوم تک، بو قوم و لشکردن)
(گوروم بو یئرده دوران وار، بو تک دلاور تک)
.
.
دوباره سویله دی من گلموشم اولام مذبوح
بو بحر عشقیده طوفانی گورمیوبدور نوح
سؤزون بورا یئتورنده او چهره سی چون یوح
(دایاندی یئرلی، یئریدنده، چو قالب بی روح)
(نه حسّ، نه حرکت، صورتِ مصوّر تک)
.
.
اسوبله بید کیمی قورخودان هامی لشکر
نفسلرینده اوتوبلار چو روبهِ مضطر
فیکیرله شیردیله مکریله اُول جفاجولر
(گورنده حالتِ قومی، نبیره ی حیدر)
(دولاندی حالتی، خشمه گلوب غضنفر تک)
.
.
اولوبدی ساغر صبری او حین ده لبریز
کی ناگه اولدی نمایان الینده تیغِ تیز
ائدوبدی شیر غضبناک مثلی جَست و خیز
(ووروب عقابه چپ و راستدن، ائله مَهمیز)
(گلوب او دم، تک و پویه عقاب، صرصر تک)
.
.
یاراتدی اُول حرکاتیله محشری اکبر
سالوبدی وحشته قوم ستمگری اکبر
اراده ایله دی قیرسین او لشکری اکبر
(اوجاتدی معنیِ اللهُ اکبری اکبر)
(ال آتدی قائمه ی ذوالفقاره حیدر تک)
.
.
اولوبلا آگه اونون ماجرای غیضیندن
اماندا قالمیاجاقلار بلای غیضیندن
فضا دوتولدی دییرسن هوای غیضیندن
(یوزی-گوزی قیزاروب منتهای غیضیندن)
(ائدردی حمله او حالیه ضیغمِ نر تک)
.
.
گوروبدی نه گورَجکدور نظیرین آینده
مقابل اولماقا یوخ بیر نفر برازنده
اورَکلر اولدی اونون رُعبیئیله آکنده
(بسان مور و ملخ ایله دی پراکنده)
(جناح قلب داغیلدی یمین و ایسر تک)
.
.
بیر آندا گوردوله وابسته لر قوشون سیندی
قاریشدی محوریلن هسته لر قوشون سیندی
دوتوبدی لزره او دلخسته لر قوشون سیندی
(علَم یاتوب، پوزولوب دسته لر، قوشون سیندی)
(داغیلدی رشته ی نظم و نظامی صفلر تک)
.
.
چکوبدی تیغینی اکبر قیریلدی سررشته
گلوبدی کیم قاباقا اولدی ناگهان کُشته
او لشکرین چوخونی ائتدی قانه آغشته
(وئروب او دشتیده ترتیب، کُشته دن پُشته)
(بیری بیر اوسته دوشوب سرنگون بدن، سر تک)
.
.
دوباره گلدی بروزه صلابت علوی
دوشوبدی دیللره اُول چولده صولت
علوی گوروندی گوزلره معناده صورت علوی
(علی الینده ظهور ائتدی سطوت علوی)
(یهود قومینه رزم قتال خیبر تک)
.
.
چکوردی تیغ، ائله بیل اوندا آللّهین شیری
ایتوردیلر هاموسی راه و رسم تدبیری
اوجالدی اکبرین اُول دمده صوت تکبیری
(اولاندا بارقه، هر فَرقَه، برق شمشیری)
(بؤلردی راکب و مرکوبی عَمرو عنتر تک)
.
.
او پست لشکره باغلاندی چون طریقِ نجات
تعجّب ایله دی اُول تشنه کامه نهر فرات
اونون الینده دی گویا رگ حیات و ممات
(ائدوب او عرصه نی اعدایه حوضه ی عرصات)
(مجسّم اولدی نظرلرده هول محشر تک)
.
.
گوروب معاینه مرگی او فرقه ی مردود
اولوبدی «بکر» کیمین پهلوانیلر نابود
آخوبدی خونِ کثیفِ عدو چوله چون رود
(قالاندی تلّ کیمی نعشلر، ائدوب مسدود)
(فرار ائدنلره راه فراری معبر تک)
.
.
خدنگ قهرینه ایلوبدی لشکری آماج
آلوبدی قوم جفا پیشه و کَفردن باج
او قدری قان توکوب آیینه ی شهِ معراج
(فضای دشت چو دریای خون اولوب موّاج)
(او قان ایچینده بدنلر نگون، شناور تک)
.
.
تاپانمورام اونی مدح ائتمه یه قَوی تعبیر
فقط بونی دیه بیلّم او شیرِ میدان گیر
ووروردی دشمنه مولا علی کیمین شمشیر
(قیلیب قُلوب سپاه مخالفی تسخیر)
(باباسی بدریده منصور اولان مظفّر تک)
.
.
علی نین آدی گوزلدی، دیلمده چون بالدی
بو منظره یادیما آیری منظره سالدی
یازانمادیم اورَگیمده سؤزون چوخی قالدی
(گلَن خیالیمه، الدن قراریمی آلدی)
(خیالیمی ائدوب آشفته زلف اکبر تک)
.
.
محالدور علی اکبر تایی جهانه گله
منیم الیمده نه وار چاره سوز گلوبدی بئله
یان ای دیلیم! بو زمان نینواده ناله ائله
(نوای ناله ی نی، ناله دن دایاندی، دِله)
(ائدر اثر رگ جانه زبان نشتر تک)
.
.
بیلور تمام قبیله م بیلور تمام ائلیم
اولوب عجین، منیم محنتیله آب و گِلیم
گوزوم سرشکیدی دشت محبّت اؤزره سئلیم
(قلم دایاندی الیم تیتره دی، دوتولدی دیلیم)
(دولوب ملالیله قلبیم، دلِ مکدّر تک)
.
.
مباد، یار، غمِ یارینی آغیر سانسون
اورَک اودور کی شرار محنده اودلانسون
جگر اودور کی بلا تیشه سیله دوغرانسون
(شهادتی دیله گلمز دئسم دیلیم یانسون)
(اوزوم بو اوددا یانام سهلدور، سمندر تک)
.
.
گرَکدی عاشق اولان عشق یاری جانه چکه
او عشقیله اوزونی یاره، عاشقانه چکه
دیل ایستیور کی غم اکبری بیانه چکه
(کی قورخورام اورَگیمدن بیر اود زبانه چکه)
(یانا الیمده کی خامه «حقیر»! دفتر تک)
.
.
«بشیر»م عشق دیارینده همدمیم آلام
یازاندا، روحِ قُدُس چوخ سوزوی ائدور الهام
بو بیت اولوب دیلیمین ازبری سحر-آخشام
(نه پیرِ دهر گوروبدور، نه مادر ایّام)
(جوان مردِ هنرمند، علیّ اکبر تک)
.
.
#اکبریه_شجاعت
#جهانه_شبه_نبی_گلمیوبدی_اکبر_تک
#سیدبشیرحسینی
#ترکی
.
✍️ #زبدةالاشعار ✍️
.
🆔: @nohe_torki
نظر دهید