خرابه شام
زبانحال حضرت رقیه (س) به حضرت زینب (س)
.
.
مرحوم نجمی تبریزی
.
.
بیجا یره آخماز یوزیمه گوز یاشی عمه
سندیردی گوگل شیشه سینی غم داشی عمه
.
.
هیچ من کیمی بیر بختی گونی قاره تاپولماز
ایلدن وطنیندن اولان آواره تاپولماز
بس هاردا قالوب اکبر مه پاره تاپولماز
سالماز باجی نی یاده مگر قارداشی عمه
.
.
ایلوب بو خیالاتی منی ایله خیالی
یاددان چخادوبدور هامی بیر فکر و خیالی
علت اودی ویرانه ده من باشی بلالی
ورد ایلمیشم آدینی هر سوز باشی عمه
.
.
قارداشیم علی مندن ایدوب قطع محبت
مدتدی قویوبدور منی دیدارینه حسرت
قیلّام گیجه لر کعبۀ روبونده عبادت
محراب اطاعتدی منه خم قاشی عمه
.
.
روحیم قوشی بو شامیده گور عمه سیخیلماز؟
دلدن علی اکبر غمی بیر لحظه چیخیلماز
بیر بیله غم و درد و مصیبتله یخیلماز؟
بیر طفل صغیرین که اولا اوچ یاشی عمه
.
.
یوللاردا منیم عمریمون عمه گلی سولدی
گل تک ایاقیم خار مغیلانیله دولدی
از بس که پیادیدیم ایاقیم قبار اولدی
آهو کیمی گزدیم هامی داغ و داشی عمه
.
.
عاجز له میشم سیرده من صبر یولومدان
آچماز رسن ظلمی ندن شمر قولومدان
گوز یاشیم آخار عارضیمه صاق و صولومدان
دریا کیمی غرق ایتدی منی گوز یاشی عمه
.
.
عمه علی اکبر آدی دلده ئولورم من
ویر غسلیمی اشکیله دویونجا ایله شیون
قوی قبره بو اگنیمده اولان کوینگیلن سن
یاز اکبر آدین قبریمه قوی باش داشی عمه
.
.
بیرق من ئولندن صورا وور سر حد صبره
دوندرمه گوزون یاشینی چوخ بارش ابره
سال اصغریمون اؤنّوگینی شال ایله قبره
حشره کیمی اولسون منه غم یولداشی عمه
.
.
تحصیل ایلدیم دفتر عشقین هامی سطرین
دود دلیمون آچدیم اودور باشیمه چترین
فکریم بودور اؤنّوکدن آلام اصغرین عطرین
مدهوش ایلیه عطری من کولباشی عمه
.
.
بو بس دگی تبدیل اولونوب ذلّته جاهیم
طعن ایلوری شام اهلی منه وار نه گناهیم
یاندورسا اگر وار یری بو شعلّ آهیم
غم آتشینه هم قورونی هم یاشی عمه
.
.
بیز ایلمیشوخ نجمی نی بو نوحیه ارشاد
چوخ ضیقدی چون قافیه ایتدوق اونا امداد
باخسا بوله جاقدور نه چکوب شاعر استاد
اما نه بولور زحمتینی هر ناشی ، عمه
.
.
#حضرت_رقیه #نجمی_تبریزی #حضرت_رقیه_شهادت #ترکی #زبدةالاشعار
نظر دهید