خرابه شام
زبانحال حضرت رقیه (س)
.
.
مرحوم ذوقی تبریزی
.
.
یتوبدور باشه عمروم گل اماندور عمه جان عمه
ئولوم آثاری گور منده عیاندور عمه جان عمه
.
.
غم هجر على اکبر آلوب تاب و توان مندن
کسوب الفت نه مدتدور نیه اول نوجوان مندن
گلیدی بیر گوریدیم تا ایدیدیم شکوه دشمندن
ہولیدی دردیمی دلده نهاندور عمه جان عمه
.
.
علی اصغر ئولوب قالموش سسی عمه قولاقیمده
اونا لای لای دیردیم گه بشکده گه قوجاقیمده
اؤپردیم گول دوداقیندن دوداقی بو دوداقیمده
گورردیم تشنۀ آب رواندور عمه جان عمه
.
.
قبیله ائل قالوب هاردا شه یثرب بابام نولدی
آنام هم عمه لر یکسر اسیر اهل شام اولدی
عموم عباسه نه گلدی مدینه گلشنی سولدی
سارالدى غنچه گل گویا خزاندور عمه جان عمه
.
.
عبث بلبل فرار ائتمز چمندن اولماسا علت
یتر خار جفادن چون چمنده بلبله زحمت
چکر ال آشیانیندن گیدر بیچاره بیر مدت
اولونجا فصل گل شغلی فغاندور عمه جان عمه
.
.
اسارت قیدی غربت درد ویرانه مصیبتدور
چتین هر بیر مصیبتدن بیزه طعن و شماتتدور
ایدن قان باغریمی اما منیم اندوه فرقتدور
آتا قارداش فراقی چوخ یاماندور عمه جان عمه
.
.
منی ویرانه ده چوخ چوخ سیخور چوخ اینجیدور دشمن
آچیلماز قان اولان گویلوم اگر دنیا اولا گلشن
اولوبدور همدمیم ناله انیسیم آهیله شیون
گجه گوندوز گوزوم یاشی رواندور عمه جان عمه
.
.
سبب نولدی بیزه منزل اولوب بو کنج ویرانه
دونوبدور کنج ویرانه اگرچه باغ رضوانه
وطندن جبراً آیریلدوخ اسیروق قوم عدوانه
ندور سرّی من زاره سن آندور عمه جان عمه
.
.
بیزه منزل اولان گوندن خرابه محنتیم آرتار
گچن گونلر دوشر یاده سرشگ حسرتیم آرتار
خیالیمدن گچر صغرا ملال فرقتیم آرتار
منه صغرا آدی ورد زباندور عمه جان عمه
.
.
من ئوللّم دردیمی هرگز منیم عمّه بولن أولماز
بولن اولسا نه دردیله من ئولدوم هچ گولن اولماز
بو وضعیلن که من ئوللم بو نوعیلن ئولن اولماز
صغیره قز غم غربت گراندور عمه جان عمه
.
.
آچوبدور طایر طبعون غریبه بال و پر « ذوقی »
دولاندی کوفه نین شهرین سالوب شامه گذر « ذوقی »
رقیه گوردی بو وردی ایدوب ازبر دیر « ذوقی »
یتوبدور باشه عمروم گل اماندور عمه جان عمه
.
.
#حضرت_رقیه #ذوقی_تبریزی #حضرت_رقیه_شهادت #ترکی #زبدةالاشعار
نظر دهید