بیر گون آنام بویوردی کی هشیار اُول ای اوغول #عباسیه_سیدبشیرحسینی

نصایح مادر و گریز به حضرت ابوالفضل علیه السلام
.
زبدة الاشعار
.
: @nohe_torki
.
#سیدبشیرحسینی
.
بیر گون آنام بویوردی کی هشیار اُول ای اوغول
گَل گئتمه خواب غفلته بیدار اُول ای اوغول
.
.
فکر ائت اولده آخره آخرده اوّله
واردور سفارشیم سنه آیدیندی مسئله
عُمرین باغیندا باتما تیکان مثلی هئچ اله
گوللر کیمی چمنده بی آزار اُول ای اوغول
.
.
لازیمدی هر آنا دییه منتک جوانینه
آل دستماز، گئت شهِ دین آستانینه
دینِ مبینین اوسته حسین باتدی قانینه
راه حسینی گئتماقا دیندار اُول ای اوغول
.
.
ای گؤزلریم ضیاسی! بودور اوّلین سوزوم
بزم عزاده گوزیاشیلان ایسلانوب یوزوم
گوزیاشیمی قاتوب، سنه صود وئرموشم اوزوم
سنده امامه دائم عزادار اُول ای اوغول
.
.
یار اولما ناحقه گوزلیم! طالبِ حق اُول
تای توشلارون ایچینده صدیق موثّق اُول
آغلا حسینه، آغلاماقیلان موفّق اُول
ساغر کیمی سرشکیله سرشار اُول ای اوغول
.
.
هر هیئته گئدنده ئوپ اوّلده پرچمی
کرب و بلا حساب ائله اُول بزمِ ماتمی
یاد ائت حسینی، قلبیوه دولسون اونون غمی
یازدا بولوط یاغان کیمی غمبار اُول ای اوغول
.
.
بیر آی فقط محرّمی، گئیمه قرا بالا!
ماه صفرده ده قره گئی، دوت عزا بالا!
بو قاره آغ گونه چیخادار برملا بالا!
گئی قاره، مثل خالِ لبِ یار اُول ای اوغول
.
.
تشنه دئمه حسینه دئنن چشمۀ حیات
غیرتلی نوکر اُول رهِ عشقینده تاپ ثبات
چپ باخسا قاره پرچمه کیم، دوت گوزون چیخات
بدخواه اولانلارین گوزونه خار اُول ای اوغول
.
.
دنیا هدف دگول بالا، مردِ کیاسته
صبر ایله، مایل اولما جهاندا سیاسته
جاه و جلال و مال و منال و ریاسته
جهد ایله عبدِ درگهِ دادار اُول ای اوغول
.
.
گوزیاشی توکمه سه کیم حسینه، اولار شقی
آغلار، اؤزی بویوردی منه، چشم متّقی
گر چکسه لرده داره، دیء منصورتک حقی
ترک سر ایله داریده، سردار اُول ای اوغول
.
.
بیر نقطه کربلایه قویوب کاتب ازل
روی زمینه خالدور اُول نقطه فِی المثل
ششگوشه قبر عرشده حتّی دگول بدل
مین شوقیله او نقطیه پرگار اُول ای اوغول
.
.
گر قسمت اولماسا گئده سن کربلایه سن
گَل نینوانین عشقینه نی تک نوایه سن
یاز «یاحسین!» دفتره گل آه و وایه سن
ئوپ آدینی بو طرزیله زوّار اُول ای اوغول
.
.
گوگلوم چوخ ایستیور یازاسان مهر و ماهیدن
شطرنجِ عشق ایچینده، وزیریله شاهیدن
جانِ خلایقه او ایکی جان پناهیدن
ذرّه مثالی والهِ انوار اُول ای اوغول
.
.
فکر ایلورم کی بیر گونی امّ البنین خانیم
بیت الحزنده فاطمیه جانشین خانیم
عبّاسی سسلیوب یانینا نکته بین خانیم
فرمایش ائتدی سامعِ گفتار اُول ای اوغول
.
.
فخر ائتمورم کی اهل ولانین عزیزی ام
فخر ایلورم کی فخر نساء، اشک ریزی ام
من عترت رسول خدانین کنیزی ام
سنده غلام عترت اطهار اُول ای اوغول
.
.
ایندی سنه گرَکدی بو بیر امری تاپشورام
قدّون اوجادی، وار بو سؤزومده بویوک پیام
ساخلا یادوندا کرب و بلانین آدین مدام
اُول دشتیده حسینه علمدار اُول ای اوغول
.
.
زینب باجون چاغیرسا سنی جان دیء زینبه
اسراریوی علن دئمه پنهان دیء زینبه
من راضی ام، آنام اولا قربان دیء زینبه
چوخ غم چکر او غملیه غمخوار اُول ای اوغول
.
.
بو سرّلر کی من دئیورم بیل آتان دئیوب
القانینه نمازینون اوسته باتان دئیوب
اسرار کربلانی، نجفده یاتان دئیوب
سرِّ مگویه محرم الاسرار اُول ای اوغول
.
.
ثابت قدم اُول عشقیده هنگامه گلسه ده
گئیمه عدودن هر نقدر جامه گلسه ده
ال چکمه قارداشوندان امان نامه گلسه ده
یالقوز قالان گونونده اونا یار اُول ای اوغول
.
.
یاددان چیخاتما دهریده پروردگاریوی
اُولی بیل اوز وجودیوه ایستکلی یاریوی
ثاراللّهین یولوندا نثار ایله ثاریوی
«موءثِر ملقّب»، اُسوۀ ایثار اُول ای اوغول
.
.
جان فکرینی دیار بلاده باشوندان آت
قربان کیمی منای محبّتده قانه بات
جانان یولوندا جانیدن ال چک وصاله چات
جانیله وصل یاره خریدار اُول ای اوغول
.
.
واردور یئری چو ابر بهاران اولوم بالا!
یاده سالوم جمالیوی گریان اولوم بالا!
باب الحوائج آدیوه قربان اولوم بالا!
روءیامه چوخ گل عاطفه رفتار اُول ای اوغول
.
.
آیدیندی ماه انوره عاشق اولار هامی
الحق کرملی اللره عاشق اولار هامی
هر بیر قولون دوشن یئره عاشق اولار هامی
وئر قوللاریوی صاحب آثار اُول ای اوغول
.
.
عشق اهلینه بهشت اولاجاق بزمِ ماتمون
محشر اولونجا آغلاداجاق گؤزلری غمون
جنّت اولار هر اُول یئره نصب اولسا پرچمون
غم مجلسونده ناظرِ حُضّار اُول ای اوغول
.
.
عاشقدی حق، قنوت و قیام و قعودیوه
مدیوندی، اهل غم کرم و بذل و جودیوه
سقّالیق ایلمک یاراشیر گول وجودیوه
سقّای آل احمد مختار اُول ای اوغول
.
.
گؤرسون اوجالدی العطش عرشه بناتیدن
اذن آل فراته گئتماقا، فُلک نجاتیدن
فتح ایلینده نهری، سو ایچمه فُراتیدن
سن آبروی حیدر کرّار اُول ای اوغول
.
.
تأخیره قویما دوشسون او دم مشک دولماقین
سال یادیوه حسین آقاوین تشنه اولماقین
یاد آوری ائله سووا، گول مثلی سولماقین
دائم به یاد سرور احرار اُول ای اوغول
.
.
قویما گؤزی یولا باخا اُول تشنه لبلرین
سال موته جنگینون یادیوا فوج لشکرین
بیر جوت الوندن ال گوتور آل عشق شهپرین
جنّتده یارِ جعفر طیار اُول ای اوغول
.
.
قولسوز قالاندا قلبیوه غم اوز وئرن زمان
آهن عمود باشیوی منشق ائدن زمان
ای پورِ بوتُراب! تُرابه گلن زمان
«یافاطمه» دیء لایقِ دیدار اُول ای اوغول
.
.
جان اوسته شِکوه ایلمه سن سرنوشتیدن
یول گوزلمه او وقتیده بو غم سرشتیدن
زهرا خانیم گلر عوضیمدن بهشتیدن
سسلر: حسینی سسله، گهربار اُول ای اوغول
.
.
گَتدی حسینیله سنون عشقون بورا منی
چوخ ایسترم بالام کیمی من قلبیدن سنی
قارداش چاغیر، حسینده ائشیتسین بو کلمه نی
عشقین طبیبی گلماقا بیمار اُول ای اوغول
.
.
گلسین هرایوه شهِ دین باغلاسین گؤزون
قارداشیوه وصیت ائله اولسا هر سؤزون
اوخشور دوتولموش آیه بو قانه باتان یوزون
محنت سراده شمع شب تار اُول ای اوغول
.
.
عبّاس! ای حسین کیمی زهرایه نور عین
وی یادگار شیر خدا فاتح حُنین
ای کاش گلنده قوللاریوی گورمیه حسین
بو یاره لرله سن گل گلزار اُول ای اوغول
.
.
محشر گونی پیمبره محتاج اولار هامی
الطاف آل حیدره محتاج اولار هامی
خاصّه بو بیر جوت اللره محتاج اولار هامی
او سخت گونده حامی انصار اُول ای اوغول
.
.
وئرمم بو قانلی چهره وی ماه منیره من
چون عاشقم سنون کیمی قولسوز وزیره من
قیلاّم شفاعت حشریده «سید بشیر»ه من
سنده بو نوحه خوانه هوادار اُول ای اوغول
.
#پندیات
#عباسیه_شهادت
#بیر_گون_آنام_بویوردی_کی_هشیار_اول_ای_اوغول
#ترکی
.
#زبدةالاشعار
.
: @nohe_torki