زبدةالاشعار

هر کیمسه اهل دلدی اونون دلستانی وار #کوفه_سعدی_زمان

کوفه
.
✍️ #زبدةالاشعار ✍️
.
🆔: @nohe_torki
.
مرحوم حسینی سعدی زمان
.
هر کیمسه اهل دلدی اونون دلستانی وار
هر دل که دلستانی وار آه و فغانی وار
.
چوخلار ویروب بو عالم آرا دلستانه دل
امّا کیمون منیم کیمی بیر دلستانی وار
.
بیر دلستاندی مندن آلان دل که بیر جهان
از جان گذشته عاشقی وار خسته جانی وار
.
بیر دلستاندی سوز عطش خشک ایدیب دلین
مؤمنلرین دیلینده مقام و مکانی وار
.
شهدور آتا آنا طرفیندندی ذوالحسب
هر مملکتده شهرتی نام و نشانی وار
.
اسم شریفی صفحهء تاریخ زینتی
یوز مین لریله مادحی وار نوحه خوانی وار
.
آدی حسیندی آدینا قربان آتام آنام
روح الامین کیمی خدم آستانی وار
.
فخریم بودور که من او شهین نوحه خوانیم
بو نوحه خوانلیقین شرف جاودانی وار
.
سانما حقیر رتبه سینی نوحه خوانلیقین
هر کیمسه نوحه خواندی بیوک عزّ و شانی وار
.
بو شرطیله که پاک دل و متّقی اولا
تقواسی اولماسا ایکی دنیا هواسی وار
.
سرمشق نوحه خوانلیقی بیزه بیر نوحه خوان ویریب
دنیا بوئی او نوحه گرین داستانی وار
.
شیر خدا عزیزه سی زهرایه یادگار
محکم بیانی ، منطق آتشفشانی وار
.
دیلده بسان شیرخدا آتشین کلام
گوزده اسیرلر کیمی اشک روانی وار
.
بیر کوفه کی او یرده علی حکمرانیدی
ایندی قیزی گلور قولونون ریسمانی وار
.
بیر زینبی که قامتی شمشاد رشکیدی
بارغم وملالیله قد کمانی وار
.
حبس ایلیوب نفسلری نطق بلیغیله
هانسی مبلّغین بیله نطق و بیانی وار
.
ساکت ایدوب جرسلری بیر لفظ اسکتو
بو قدرتین مباحثه ی بیکرانی وار
.
ایله تکلّم ایلوری هر کیم گورور دییور
بو مرتضادی معجز رطْب اللّسانی وار
.
کوفیلره خطاب ایدر ای اهل غدر و مکر
بوینوزدا سیز جماعتین الله قانی وار
.
بولسوز که هانسی بیر جگری پاره ایتمیسوز
فان اغلاسا گوزور دیلوزون امتنانی وار
.
قلب رسول اکرمی سیز ایتموسوز دو نیم
سیز ایلین جفادن اونون الامانی وار
.
ریسنده پیرزن کیمی پشمی نخ ایلیوب
پوزدوز گینه بو مسأله نین داستانی وار
.
بیر صبح شامه تک چالیشوردی او پیرزن
آخشام گورردی حاصلی یوخ خسته جانی وار
.
فعلوز اونا شبیهیدی امّا بو فرقیلن
تنها گورردی او که یورولموش بنانی وار
.
امّا سیزون جنایتیزون یوخ نهایتی
محشرده عدل محکمه سینده زیانی وار
.
قرآنه پشت پا ووروب اسلامی دانموسوز
هانسی بیر امّتین بیله جرم عیانی وار
.
هانسی یرین خراب شده شهر کوفه تک
شمر شریری وار؟ داش اوره کلو سنانی وار
.
گه کف چالوب بیزه گولوسوز گاه آغلوسوز
هانسی ولایتین قوناقا کف چالانی وار؟
.
بیز سولموشوخ ، ولی گل آچیب نوک نیزه لر
بولمم بهاری وار بو یرین یا خزانی وار
.
سیز آغلوسوز بیزه ، بیزی بس کیملر ئولدوروب
سیز ملّتین پیمبره بغض نهانی وار
.
شیر خدا قیزی قیزیشوب شیر حق کیمی
تشریح ایده خیالی ، اولان ماجرانی وار
.
ناگه ایشیتدی سیّد سجّاد سسلنور
عمّه دایان بو ایشده خدا امتحانی وار
.
سنسن جهاندا عالمهء بی معلّمه
دنیاده یوخ وفا هره نبن بیر زیانی وار
.
بیش گوندی بو ریاستی آل امیّه نون
ویرسون بروزه قوی نه جفایه گمانی وار
.
عزّت بیزیمدی ، سلطنت حقه بیزده دور
پاینده قالسون عزّتیمیز حق ضمانی وار
.
بو حالده نه گوردوله کوفه جماعتی
شمر شریرین الده اوجا بیر سنانی وار
.
نوک سناندا سرفه ایدور بیر یارالی باش
گویا خیالی گوستره سرّ خدانی وار
.
بیرده باخاندا گوردوله قرآن اوخور اوباش
دیلده کلام لم یزل و لامکانی وار
.
بیر بیرلرینه سویلدیلر خارجی دگول
قرآن اوخور گوزونده سرشک روانی وار
.
زینب ایشیتدی بو سسی سسلندی باشوون
فکری هدایت ایلماقا کوفیانی وار
.
هانسی امیر قافله نین سن کیمی حسین
دلخسته ، دست بسته بیله کاروانی وار
.
به به نه یاخشی وقتیده قرآنی باشلادون
بولسونله یاد ایدن بیز بی‌خانمانی وار
.
سوز صاحبی «حسینی» سنه اوزگه دل ویروب
هر شاعرین بو عالم آرا بیر زبانی وار
.
#هر_کیمسه_اهل_دلدی_اونون_دلستانی_وار
#آثارالحسینی1 ص 269
#ترکی
.
.
✍️ #زبدةالاشعار ✍️
.
🆔: @nohe_torki

متن پیشنهادی:  امروز چه غوغاست که در جان من است #حسنیه_نجمی_تبریزی

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی