بیله روایت ایدوبلر مفسرین خبر #حبیب_ابن_مظاهر #خائف_تبریزی

حالات حبیب بن مظاهر (ره)
.
#زبدةالاشعار
.
: @nohe_torki
.
مرحوم خائف تبریزی
.
بیله روایت ایدوبلر مفسرین خبر
دیار کوفه ده ابن زیاد بد اختر
.
ایدوبدی ظلمیده طغیان اول جفا گستر
تدارک ایتدی حسین جنگینه آغیر لشگر
.
بو قصه دن واریدی شهر کوفه ده آشوب
کیمیسی شاد کیمی نار محنته آلیشوب
.
سرور ایدردی اورکدن او گون منافقلر
یاناردی آتش غمده ولی موحّدلر
.
گورردی مومن و کافر همان او قائله نی
بو قصه پوزموشیدی مسلم ابن عوسجه نی
.
گیچوردی بیر گونی ناگه او مرد باایمان
اورکده محنت و غم دلده سوز و آه و فغان
.
حبیبی گوردی آلوردی حنا بقصد خضاب
ویروب سلام ایدوب ماجرایه کشف الحال
.
دیدی یوخوندی خبر یوخسا ای وفا گستر
حسین جنگینه عازمدی کوفیان یکسر
.
مخالفت علمین قوزیوب گروه لئام
آلولّا اسلحه آلات حرب تیر و سهام
ایشتدی بو خبر وحشتی او پیر نجیب
توکوبدی گوز یاشی رخساره حسرتیله حبیب
.
حنانی قویدی یره ترک ایدوب تمنانی
بویوردی مسلمه گویا همین بو عنوانی
.
حسین معاونتی فرض امرلازیمدور
حرامیدور منه دنیا حنا نه لازیمدور
.
حضور زادۀ زهرایه من شتاب ایدرم
بو آغ محاسینیمی قانیله خضاب ایدرم
.
دیوب بو سوزلری ترک ایتدی فکر دنیانی
آخاردی صفحۀ رخسارینه جگر قانی
.
غبار محنت و غم نشست ایدوب دلینه
پوزولدی حال شریفی قیتدی منزلینه
.
باشیندا شور شهادت دلینده نام حسین
آلوب قرارینی الدن وصال کام حسین
.
اولوبدی بحر غمه غوطه ور او پاک نژاد
ایدردی کشف غمه خالقیندن استمداد
.
دیردی بیر اوزیمی مقصده یتورسیدیم
حسین قدملرینه بو یوزیمی قویسیدیم
.
حضور ناسیده گرچه اوزینی ساخلاردی
کنار و گوشه ده گزلین گیدردی آغلاردی
.
زبسکه دلده حسین آدین ایتدی برنامه
گلوب یتیشدی حبیبه حبیبیدن نامه
.
حسین عطرین ایدوب نامه سیندن استشمام
کسیلدی طاقت و آرامی قالمادی آرام
.
ایک(ی) اللی نامه نی آلدی ایدوبدی اشکی روان
اؤپوب قویوب گوزی اؤسته چو آیۀ قران
.
گتوردی مهر شریفین نگوردی ثارالله
یازوبدی خط شریفیله لفظ بسم الله
.
ازلده نامه ده لطفیله کشف رأفت ایدوب
حضور اقدسینه نامه سینده دعوت ایدوب
.
یازوب حبیب منی کربلاده لشکر کین
سالوب حصاره جفائیله قوم بد آئین
.
اولار که نامه یازوبلار منه ارادتیله
نقیص عهد ایلیوبلر ولیک جرأتیله
.
خبر ویروب منه جدّیم رسول والا شان
علاوه باب کباریم او ناطق قران
.
اوزیمده حجت برحق قدرت اللهم
علوم غیبه بلورسن اوزیمده آگاهم
.
صراحتاً سنی مطلبدن ایلورم اگاه
منی شهید ایده جاق جور و ظلمیله بو سپاه
.
یانیمدا واردی منیم عده ای وفا پرور
بو چولده حاضر اولوب ئولماقا علی اکبر
.
اوخی بو نامه نی مطلبدن اولگلان آگاه
سنونده شوق شهادت واروندی بسم الله
.
اوخودی نامه نی تا مطلبه اولوب حالی
الولاشوب اورگی چوخ پوزولدی احوالی
.
دیدی ثنا اولا بیحد حی یکتایه
باشیم اوجالدی منیم طاق عرش اعلایه
.
خدای لم یزله ایلیوبدی شکر و ثنا
دوشوبدی سجدیه عرض ایتدی ای خداوندا
.
عجب سعادته یتدوم بو گون من نالان
یازوب حسین گیدم من اونا اولام قربان
.
اوزون عطا ایله توفیق ای خدای وحید
حسین یولوندا اولام منده لطفویله شهید
.
ولی اورکده کی منظورین ایلدی کتمان
تمام خویش و احبادن ایلدی پنهان
.
ایدوبدی حفظ تقیه ایله دین و آیینی
امام اؤزی بویوروب «اتقیه والدینی»
.
سفر تدارکینی گوردی چوخ شهامتیله
تمام فکرت و تدبیریله مهابتیله
.
نچونکه یولّارا جاسوس ابن مرجانه
معیّن ایتموشیدی سخت او دینه بیگانه
.
شهادت امرینی اوز نفسینه بلوب واجب
وداع ایدوب حرمین ئولماقا اولوب راغب
.
وداع قصه سی تاریخیده مطوّل دور
یوخ احتیاج اولارا شرح حال اجملدور
.
نه بیر هراس ایلیوبدور نه بیر ایتوردی اوزین
بلا دیارینی قصد ایلیوب یتوردی اوزین
.
حبیب گلماقینی نصرته امام مبین
بیان ایلدی اصحابینه امام حسین
.
دیدی حبیب گلور سیزده سرفراز ایلیون
دورون ایاقه گیدون ایمدی پیشواز ایلیون
.
حبیبیدور منه هم جدیمین نشانه سیدور
صحابه نبوینین در یگانه سیدور
.
کمال وجدیله کوی وصاله عازمدور
محاسینی آغاروب احترامی لازمدور
.
موحدین عرب ایچره ماه تاباندور
گوزیمده نور بصر دور گرامی مهماندور
.
جلیل قدر معظمدی پیر نورانی
یازوبدی لوح دله آیه آیه قرآنی
.
قوجالیقیندا گلوبدور وفا نشان ویرسون
اودا منیله بو صحراده تشنه جانویرسون
.
بِامر سرور دین ایلیوبله استقبال
علیّ اکبر و عبّاس اول حمیده خصال
.
ایدوبله جمله جوانان هاشمی پیشواز
اوپیر محترمه ایلیوبله چوخ اعزاز
.
مصافحه ایلیوبلراودم محبتیله
گتوردولر او خردمندی مهر و رأفتیله
.
یتنده محضر پر نور حجت الهه
بیر آیری حال ویروب یوز او مرد آگاهه
.
گوزی دوشنده حسینین جمال انورینه
پوزولدی حالی یخلدی اونون قدملرینه
.
سلام ویردی ویروبدور اجازه گوز یاشینا
ایاقه دوردی دوباره دولاندی بیر باشینا
.
توکوبدی صفحۀ رخسارینه جگر قانی
حبیبین حالتی آغلاتدی رکن ایمانی
.
امام دوتدی الین حرمت تمام ایلدی
یانیندا یر ویروب اگلشدی احترام ایلدی
.
بویوردی آغلاما بزم بلایه خوشگلدون
حسینی گورماقا کرببلایه خوشگلدون
.
حبیب گلماقینا منتشر اولوب مطلب
ایشیتدی بو خبری فاطمه قیزی زینب
.
حبیب آدین ایشیدوب جدّی یادینه دوشدی
آلیشدی قلبی گیچن لر خیالینه دوشدی
.
دیدی حبیبه گیدون لطف و احترام ایلیون
منیم دلیمجه علاوه اونا سلام ایلیون
.
دیون حبیب حسینیم غریب و تنها دور
پیمبر اوغلودی نور دو چشم زهرا دور
.
یتوردولر او پیامی او مرد دانایه
اوجالدی آه شرر باری عرش اعلایه
.
توکوب محاسینه حیرتله دیده دن قانیاش
دیدی حبیب ئولیدون بو گونده ازّل کاش
.
علی قیزی نه روادور سنه سلام ایلسون
خانم غلامه نه لازمدی احترام ایلسون
.
سلام ویرماقونا راضی اولمویوبدی حبیب
توکوبدی گوز یاشی رخسارینه او مرد نجیب
.
خوشابحال حبیب گورمدی او اوضاعی
نه حاله سالدیلار آخرده دخت زهرانی
.
حسینیدن صورا اطفال سینه داغلادیلار
او گون علی قیزینین قولارینی باغلادیلار
.
مطول اولدی سوزون «خائفا» تمام ایله
حسینه آغلا بو عالمده اخذ کام ایله
.
.
#اصحاب_الحسین
#بیله_روایت_ایدوبلر_مفسرین_خبر
#ترکی
.
#زبدةالاشعار
.
: @nohe_torki