زبانحال حضرت امام حسین علیه السلام به خواهر در شهادت طفل شش ماهه
..
..
اشکی تبریزی
..
..
باجی گل اللریم اوسته بو ماه انور اوخلاندی
بویاندی لاله تک قانه على اصغر اوخلاندی
..
..
عطشدن یاندی یاندوردی بو حالی کون و مکانی
سوسوز اوخلاندی جنّتده گتوردی درده زهرانی
سو ویردی گلشن دینه بوغازیندان آخان قانی
یگانه بیر در گنج حبیب داور اوخلاندی
..
..
بشیکده اوچ گجه گوندوز عطشدن سو دیوب یاندی
فیوضات شهادتدن ئوزی بیر شمّه ای قاندى
اودور سو ایچمدی گول تک سارالدی تشنه اوخلاندی
آدی اصغر ولی تاپدی مقام اکبر اوخلاندی
..
..
صدف سینه مده گوهر تک آپاردیم سمت میدانه
نشان ویردیم او حالیله بالامی قوم عدوانه
سوزوم دیلده قالوب گوردوم بویاندی اصغریم قانه
صدفدن آیریلوب گویا او دمده گوهر اوخلاندی
..
..
بونون قانین دم پیکان منیم ئوز قانیمه قاتدی
بیچوب اوچ شعبه اوخ حلقین گیدوبدور هوشدن یاتدی
تاپوب یول وصل جانانه داخی سو فکرینی آتدی
آلوب کام دلین یتدی مرامه اصغر اوخلاندی
..
..
پوزولموش گلستانیمدن باجی بو غنچه قالمیشدی
عطشدن غنچه وقتینده ساری گل تک سارالمیشدی
دم پیکان ده امّا سراغ مقصد آلمیشدی
دوشوبدور باشینه چونکه خیال کوثر اوخلاندی
..
..
ربابین وار یری دونسه سرشگ دیده سی قانه
اؤرکدن اود دوتوب یانسا بو لعل قانه غلطانه
سو امّیدیله گوندردی بالاسین گرچه میدانه
بالا میدان ده امّا خیَمده مادر اوخلاندی
..
..
منای عشقده بو گون بیوک بیر امتحان ویردی
بویاندی قانه قونداقی ز بسکه یاره قان ویردی
الیمده حال حاضرده بالام اوخلاندی جان ویردی
و لیکن باطن قلب بتول اطهر اوخلاندی
..
..
ربابه سن دیمه بیردن ازل چک مطلبه پرده
گلر بولسه بو احوالی ربابین خاطری درده
باجی گیت رمزیله آندیر توک اشگون عارض زرده
باخوب آغلا دیمه واضح بو گلبرک تر اوخلاندی
..
..
دگنده اوخ بوغازیندان گولوب بیر ال ایاق چالدی
اوچوبدور طاهر روحی الیمده بوش قفس قالدى
بهشت عدنده زهرا آنام آغوشینه آلدى
باخوب بو حالته یاندی دل پیغمبر اوخلاندی
..
..
دیمم قان آغلاما هرگز فغان ایت سینه وی داغلا
ازل سیل حلقینین قانین باجی اوخ یاره سین باغلا
آپار گهواریه سال راحت اولسون سنده یان آغلا
خبر ویر حالینی بولسون عیال حیدر اوخلاندی
..
..
اورکدن یاندی دشمنلر بونون احوالینه باخدی
یانقلی قلبیمی بو غم دوباره یاندیروب یاخدی
مه تابان الى اوسته امامت اولدوزی آخدی
کواکب دوشدی گردشدن گوروبلر اختر اوخلاندی
..
..
هامی اهل دلین «اشکی» دلینده درد پنهان وار
سنون شوریده باشوندا ولی شوق خراسان وار
بو قدری بی سبب سانما بو سوزده آیری بیر جان وار
باجی گل اللریم اوسته بوماه انور اوخلاندی
..
..
#اصغریه #اشکی_تبریزی #اصغریه_شهادت #ترکی #زبدةالاشعار
نظر دهید