ورود اهل بیت به مدینه
.
#زبدةالاشعار
.
: @nohe_torki
.
مرحوم خوندل
.
بیله یازوبلا خارج شهر مدینه ده
بیر ماجرا که واردی لزومی کتابته
.
غم کاروانی اوردا که تا ایلدی نزول
بیر عده پیشوازہ گلوب قصد قربته
.
چوخلار گلوبله گورماقا آل پیمبری
یعنی که هر کسین ، کسی گلدی عیادته
.
بیرده گلوبدی همسری غم دیده زینبون
تا بو خبر یتیشدی او کان سخاوته
.
عبدالله اولدی خارج شهره روانه تا
گورسون جناب زینبی باخ بیر ارادته
.
چون وارد اولدى خیمیه ئوز زینبین گوره
ناگه گوزی ساتاشدی او زهرا وراثته
.
مشهور اولوب تانیمادی اوّلده زینبی
فریاد اگر یتیشسه بو موضوع صحته
.
آلدی خبر على قزینی گورمورم ندن
نه حادثه وئروب یوز اُو صدیقه سیرته
.
وئردی جواب ، وار بلی حقّون عم اوغلی جان
نا آشنا اولام سنه یر یوخدی حیرته
.
بیخود دگول قوجالماقیمون واردی علتی
روشندى عمق مسئله اهل فراسته
.
بیر نیم روز صحنۀ عاشور اولوب سبب
آفت یتوب او لطف و صفا و طراوته
.
بیر داغ دلدن اولسا اگر لاله داغدار
مین داغ گورموشم گنه باخ منده قدرته
.
صحرای نینواده یتوب آفت خزان
سن گوردوقون طراوته لطفه صباحته
.
دقتله باخ عم اوغلی همان زینبم ولی
غملر بهار عمرومی توش ائتدی آفته
.
طومار اولار بو یولدا نه لر گورموشم دیسم
آماج ایدوبله قلبیمی تیر شماتته
.
تا حسّ ایدوب او خیمه ده کی بانوی عفاف
زینبدی گلدی نطقه آخوب اشگی صورته
.
ایوای دیدی خانم نیه بو حاله قالموسان
نه گلدی بس او حشن جمال و وجاهته
.
آیا اولوب ندن او رَسا قامتون کمان
نه غم قرین ایدوب سنی مرگ و هلاکته
.
گویا دیدی سوروشما منیم سرگذشتیمی
بیر غملو ماجرادی که گلمز عبارته
.
بو قدر وار که نامه یازانلار حسینیمه
سیندیردی عهدی اولمادی پابند دعوته
.
بیر کاروان بلالی عزالی شکسته دل
نه قافله انیس ملال و مشقّته
.
واضح دیوم قالان بیزه زین العباد دور
اما نلر اولوبدی او کان شرافته
.
هرگز گتورمرم دله زنجیر صحبتین
یا خیمه لر یاناندا دوشوب نه ریاضته
.
«خوندل» قلمده سنده یورولدون یورولما یاز
قویما گنه مسلّط اولا فوتی فرصته
.
آلِ پیمبرین یولی حق شاهراهیدور
شاید بو یولدا یول تاپاسان راه جنته
.
.
.
#ورود_مدینه_خوندل_تبریزی
#بیله_یازوبلا_خارج_شهر_مدینه_ده
#ترکی
.
#زبدةالاشعار
.
: @nohe_torki
نظر دهید