غصب خلافت و حضرت فاطمه (ع)
.
✍️ #زبدةالاشعار ✍️
.
🆔: @nohe_torki
.
مرحوم نادری میانجی
.
اول گون که دوشدی لوح و قلم یر تلاطمه
رحلت ایدوب رسول یتیم اولدی فاطمه
.
.
دست اجل گلوبدی خموش ایتدی مشعلی
ظلمت سرای عصرده یالقوز قالوب على
قنفذ لرین جنایته آزاد اولوب الی
قالدى جنازه یرده قورولدی مشاوره
باشلاندى اهل دینه او یردن مخاطره
.
.
زندیقلر مخالف اولوب حقه دوردیلار
کوی ثقیفه ده علم جهلی وردیلار
کاخ جفایه مشترکاً پایه قوردیلار
خفاشلر جهانه سالوب شور و انقلاب
یاندی قاپوسی خانه نشین اولدی بو تراب
.
.
غصب خلافت امری ایدوب عالمی ملول
اود وردیلار یانوبدی سرا پردۀ رسول
دوشموش یارالی صحنده بیهوش اولوب بتول
سال یاده اوندا حالتی شاه ولایتین
مشکلدی صاحبی باخا وورسونلار عورتین
.
.
تیترر غلاف ایچینده ایکی باغلی ذولفقار
صبر ایلیور بو وضعه على شیر کردگار
آلمش وصیت نبوی الدن اختیار
دشمن بیلوب وصیته مولا مطیع اولی
ئوز منزلینده باغلادی خیبر یخان قولی
.
.
چکدی علینی مسجده اول قوم بی حیا
سلمان دیردی داده یتش ختم انبیا
مظلوم اولوبدی گور نجه قول باغلی مرتضا
صفلر پوزان قوشون داغیدان دوشدی ذلته
شیری چکوبله روبه مکاره بیعته
.
.
گلدی حسن حسین یتشوب باب أطهره
ناگه گوروبله صحنده وار غملو منظره
زهرا یانان قاپیلا دوشوبدی قوری یره
سنمش قنادی قوش کیمی نالان اولوب حسین
آلدى عمامه سین اله باشلاندى شورو شین
.
.
جدّیم گیدنده قلبمیزی سخمادون آنا
امید ایوین او وقته بله یخمادون آنا
گلدیک ایوه قباقمزه چخمادون آنا
قلبون کمی بو درگھی کیم اودلیوب گیدوب؟
هاردا بابام بو نوعی سنی بوشلیوب گیدوب؟
.
.
سس گلمدی حسین آنا نعشین قوجاقلادی
بیکس حسن دیدی آناجان دور چوخ آغلادی
زینب ویروب حسینه خبر سینه داغلادی :
قلبندہ کی یاراسنی کفّاردن سوروش
بازوده کی یاراسنی مسماردن سوروش
.
.
قارداشلاریم قوجاقلامیون ناتوان اولی
اینجیتمیون آنامزی آغریر سینوب قولی
بیچاره اولموشوق کسیلوب چاره نین یولی
گوردوم قاپو یاناردی آنامی وراردیلار
حیدر بابامی قوللاری باغلی آپاردیلار
.
.
من زینبم بلا اوخونا اولموشام دچار
سینّیم اوشاقدی قلبمی چوخ درد و غم سیخار
آچ گوزلرون آنا بابامی قیددن قوتار
ایندی یقین دی مسجده شیون سالوب بابام
قول باغلی دشمن ایچره کمکسیز قالوب بابام
.
.
قویما یانان بو قلبمی هجرونده چوخ یانا
آغلور حسن حسین دونوری گوز یاشیم قانا
یالقوز قالوبدی حیدر کرار دور آنا
هوشه گلوبدی فاطمه سسلندی جان بالا
سویله بابان نه یرده قالوب باغریقان بالا
.
.
زینب دیدی بو قوم گناهه باتاردیلار
سنگ جفانی خانۀ دینه آتاردیلار
گوردوم بابامی مسجده ساری آپاردیلار
فرمایش ایتدی فاطمه لازمدی داد ایدک
امداد ایدون منه بالالار مسجده گیدک
.
عذر ایسترم یازام بونی یا صاحب الزمان
مولا هراینه گیدوری بیر قولی سینان
ساقدا حسن صولوندا حسین مسجده روان
جانلار سنون او حالوه قرباندی یا علی
فریادیوه گلن قوجا سلماندی یا على
.
.
سینسون سنون او چرخ ستمکارون اى فلک
زهرا یتشدی مسجده قانه دونوب ئورک
سسلندی ای عم اوغلی سنه گلمیشم کومک
هیچ گلشنین گلی بئله ظلمیله سولماسون
هیچ کیم جهاندا سن کیمی بی یاور اولماسون
.
.
باخدى نظام مجلسه اول دخت مصطفا
گوردی ابو قحافه نین اوغلوندا یوخ حیا
منبر مقابلنده ایاق اوسته مرتضا
مجبور ایدیله باطله حق بیعت ایله سون
پیغمبرین قزی بله بیر وقته نیله سون
.
زهرا خطاب ایدوب اوتوران مرد منبره
سویله اذیت ایلمه سون ثانی حیدره
آتسام الیم باشمدا کی بو قاره معجره
تک معجریمله من یخارام سقف مسجدی
هاردا پیمبرین قزینی امّت اینجیدی
.
.
شرم ایلیون خدادن ایدون خوف واهمه
گلمیش وساطته حسنینیله ، فاطمه
نفرین اهدہ حسین دوشر عالم تلاطمه
اولماز رضا رسول بو غصب خلافته
یردن گوگه بو ظلمدی شاه ولایته
.
.
یاددان چخارتمیون بابامون سیز وصیتین
تاپشورمادی سیزه مگر اولاد و عترتین ؟
ظلمیله اودلادوز بابامون باب رحمتین
ایندی جسارتی یتوروبسوز بویوک یره
زندیقلر اهانت ایدر شاہ خیبره
.
.
سالدون خیاله نادری شامون خرابه سین
زین العبادی مسجد شامین خطابه سین
باشی قرالی فاطمه نایب منابه سین
زینبده معجره ال آتوب سینه داغلادی
شیون سالوبدی مسجده دشمنلر آغلادی
.
.
.
.
#فاطمیه_نادری
#فاطمیه_شهادت
#اول_گون_که_دوشدی_لوح_و_قلم_یر_تلاطمه
#ترکی
.
✍️ #زبدةالاشعار ✍️
.
🆔: @nohe_torki
نظر دهید