حالات حضرت ابوالفضل العباس (ع)
.
✍️ زبدة الاشعار ✍️
.
🆔: @nohe_torki
.
مرحوم شانی تبریزی
.
تا نقش اولوندی لوح ِجهانه خط وفا
اربابِ مِهر او مُهری گوروب تاپدیلار صفا
.
اهلِ حقیقت اولدی مجزّا مجازدن
ایلر محبّت اهلنه بو شمّه اکتفا
.
گوستردی شه سرانِ سپاهه وفا یولون
باش ویردی، باشدان اولدی ذبیحاً مِنَ القَفا
.
عبّاس تاپدی اهلِ وفا ایچره امتیاز
كالشّمس فی السّمادی بو مطلب نه اختفا
.
نه بیر مواسی ایله مواسات ایلیوب
نه گوستروب بیر اهلِ وفا ایله بیر وفا
.
کِشت امیده رحمتِ اَبرنده وار حیات
دردِ شدیده تربتِ قبرنده وار شفا
.
دل ویردی دل ستانینه هر گونه هر قبیل
باش ویردی آلدی جانینه هر ظلم و هر جفا
.
آه اُول زمان که گوردی عطشدن سولوب تمام
پژمرده حالیدور گُلِ گلزار مصطفا
.
گَلدی حضورِ شاهه اَدبله ویروب سلام
دل آچدی، دل آچار نجه مولاسینه غلام
.
عرض ایتدی کی اولان صفِ عشّاقه پیشوا
سرداره عَرصه تنگ اولوب ای میرِ ماسوا
.
مُلکِ دلی مُسخّر ایدوب فُوجِ درد و غم
سینم گلوبدی تنگه بدندن گیدوب قوا
.
سالدی سکینه بو قوروموش مشگی چگنیمه
مین عجز و التماس ایلدی بیر ایچیم سووا
.
من عترتِ پیمبره سقّا اولا اولا
اطفالی تشنه لب قالا گور بو اولور روا
.
نه باش یارالانوب نه يتوب صَدمهٔ عَمود
نه قول قلم لنوب نه الیمدن دوشوب لوا
.
روحیم یاخوندی آیریلا جاندان علاج ایله
ای دردِ اهل کونه اولان تُربَتی دوا
.
الدن اله ویرور آنالار صُود امر لرین
دردین دیور بو بَخت قَرایه او بینوا
.
گَلدن لطیف اوشاق ایله بیر شدّتِ عطش
غنچه کیمی دوداق بیله گرمیّت هوا
.
نه حاله گور دوشر بالا لار یا آنا لاری
کیم دور بولن او حالی بیر اللّهدن سوا
.
گُل تک سولوب بالالار عطشدن سیزیل دیری
نِی تَک گلوب نوایه آنالار ایدر نوا
.
خوشدور بو یرده #شأنی او مصراعی #ذهنینون
فریادِ العطش له دولوب دشتِ نینوا
.
سلطانِ دین گوردی علمداری خشمناک
گر اذن ویرمسه اولاجاق غصّه دن هلاک
.
سویلوب مقامِ لطفده سلطانِ کربلا
ای من کیمی بلایه ازّل گون دییَن بلا
.
معشوقدن گر عاشقه مطلوب دور جفا
محبوب دن حبیبه ده الطاف دور بلا
.
هر چند سخت دور سنه اطفال ناله سی
دلخواه دور ولی منه بیر غم بو ابتلا
.
دلتنگ اولما، من سنی غمگین گورن مرم
گیرم که جَنگ خواهشینه وار جوابِ لا
.
ويرسم اِجازه فتح سنیله اولور ولی
ويرمز زجاجِ قلبیمه بو امر اِنجلا
.
من قول ویرمشم ویرم اطفالیمی اسیر
مندن آلوب دی عهد بونا خالقِ عَلا
.
من یالقوزام بو چولده علاوه کمک سیزم
ایتمه فراقوه منِ بی یاری مُبتلا
.
گئت، ممکن اولسا خیمیه بیر مشک سو گتور
شاید بونیله شیشۀ قلبون تاپا جَلا
.
سو رُخصتین ایشتدی او سقّای تشنه کام
منظورِ قلبی گلدی اله حاصل اولدی کام
.
اُول غمگسارِ عترتِ پیغمبرِ خدا
گردابِ غم سَفينه سینه اولدی ناخدا
.
سالدی کمالِ ذوقیله بُوش مَشگی چیگننه
آلدی اوزون الينه او دم بیر اوزون جدا
.
دوندردی رزمگاهه عنانِ عقابی تا
يتدی او دَم قولاقینه بیر دلنشین صدا
.
دوندی باخوب نه گوردی بنی هاشمون آیی
آردین جا دل شکسته گلور نیّرِ هدا
.
اولدی پیاده همّت بی اِنتهائيله
اولسون مباد ترک ادب دن بو ابتدا
.
عرض ایتدی سیّدی منه چوخ خجلت آرتی رور
بو گلماقون بو سس لماقون بو گوزل نِدا
.
فرمایش ایتدی گلدیم اولاخ بیرده قول بویون
وار دور قولون بدن ده هنوز اولمیوب جدا
.
رأفتله قولّارین سالوب عبّاس بوینونا
سرداره شَه ده بیله محبّت اولور خدا
.
ویرم قسم او ساعته یارَب موفق اِئت
تا ایلیوم فصاحت یله مطلبی ادا
.
آیریلدی ماه مِهردن اوز قویدی مقتله
نه حاله قالدی شاه رجوع ایله مقتله
.
سرداری شه دن آلدی اجازه دوشوب یولا
شه خیمگاه ده دایانوب گوز تکوب یولا
.
یل اسدی دگدی پرچمه دلکش صدائیله
سس لندی سرو قامت عبّاسه حِیف اولا
.
صفلر مقابلینده دایاندی اوصف شکن
حیدر باخشلی گوزلری بیر باخدی صاق صولا
.
سویلوب نجه روادی سوسوزدان بو عرصده
دین مبین گلشنی نین گللّری سولا
.
انصاف دور بالا بالالار نطقدن دوشه
باشه ویروب غریب آنالار زلفینی یولا
.
بازارِ عشق دور ایدرم بیر معامله
بیر مشک سو اگر اولا آلّام ایکی قولا
.
تا وار الیم بولون بوش الیله قیت مرم
یا سو گرک اَله گَله یا مَشگه قان دولا
.
گوردی مؤثّر اولموری سوز قلبِ لشگره
شمشیر چکدی ووردی اوزون قلبِ لشگره
.
بیر حمله ایتدی لشکره فرزندِ مُرتضا
تنک اولدی اشقیایه او وسعت ده بیر فضا
.
بیر کار زار ایتدی که اشجاعِ عالَمی
حیرتده قویدی یکسر او رزمِ فرح فزا
.
هم عاجز اولدی گردشِ تقدیرینه قَدَر
هم واله اولدی بُرّشِ شمشیرینه قَضا
.
هم ایتدی بو شجاعتی خوشنود اَحمدی
هم شاد شاهِ دینی، هم اوز خالقین رِضا
.
هم زینب ایتدی خیمده ساکت سوسوز لاری
هم فاطمه جِنان دا قوروب مجلس عَزا
.
هم کسب ایدوب جهاندا ایله عالی بیر مَقام
هم اَخذ ایدوب جزا گوننه اَحسن الجَزا
.
یاردی نهنگ وار او دریای لشکری
یول آچدی شطّه سروِ خرامان مُرتضا
.
نَصب ایلدی لواسینی شطّون کنارینه
تا تشنه لبلرین سپه سو اِستنارینه
.
شهرت تاپوب خیامِ حرم ده بو ماجرا
مسرور اولوب سوسوز بالالار خیمه گاه آرا
.
شهزاده لر سووندی ولی غصّه لندی شاه
معلوم دی او سَرورِ مظلومه ماجرا
.
شهزاده لر گمان ایلدی سو گلور اله
شه حسّ ایدوب قضیّه نی بی چون و بی چرا
.
شهزاده لر تمام ویروب بیر بیره نوید
شه بولدی خیمه گاه اولاجاخ تعزیت سرا
.
میدانی دن خیامه چکوب رشتۀ کلام
بی اختیار گور سوزوم هاردان گئدوب هارا
.
تا دولدوروب سو مشکین او سقّای تشنه کام
تجدید اولوب اورکده عطشدن اولان یارا
.
دولدوردی اوجونی ولی قویمیوبدی همّتی
اوچ گون سو دگمین دله، بیر قطره سو وئرا
.
حسرت گوزیله بیر باخوب اوجوندا کی سووا
بیر حال یوز ویروب او وفا داره ماوَرا
.
گویا همان سودا گوروب عکسین سوسوز لارین
اولدی ایشیق گونوز گوزونه بیر شبِ قَرا
.
توکدی سویی یره دئدی یا نفس خوار اُول
سنده حسین بی کسِ و مظلوم دن صورا
.
تشنه چخوب فراتدن اُول مَستِ جام عشق
حیران قویوب دی عالمی #شانی بو ماجرا
.
چگن نده مُحکم ایلدی اوّل سو مشگینی
بیر باخدی خیمگاهه طرف توکدی اَشکنی
.
بو ذوقیله که اَولدی غم و غصّه دن رها
گوزدن توکردی گوهرِ اَشک گرانبها
.
درسِ وفانی مکتبِ عشقین مَعلّمی
عبّاسه ابتداده دئدی گوردی اِنتها
.
گر اژدهای نفس دن عاجزدی هر بشر
عبّاسه ال تاپان مادی اما بو اَژدها
.
افسوس گلمدی اله مَنظوری حِیف اولا
چکمیشدی گرچه زَحمتِ بی حَدّ و مُنتها
.
ایکاش اولیدی شل الی اُول شومِ ناکسون
تا اُول مییدی تیری کماندان اونون رَها
.
تار ایلدی او تیر، ابولفضله عالمی
خجلت غباری اولدی گوزوندن او دم بها
.
بو هانسی تیریدی وئران هانسی شریردی
بو خامه نون صَریردی من ساکتم شَها
.
نخلِ اُمیدی آلعبانون بو دور خبر
مشگی دیشینده ساخلاماقی اولدی بی ثَمر
.
بولموش دی اللّرین او سووا ویرماقین خطا
وجهی بو دور سو اوسته ویروب اللّرینی تا
.
ایلردی دَفع دشمنی نُوکِ رِکابیله
میدان دا وارثِ هنرِ شاهِ لافتی
.
نوکِ رکابیله گوگه پیکانی آتماقی
بولمز بو بیر هنردی، مگر بو اوغول، آتا
.
ایلوب اوزونی اهلِ وفا ایچره سَرفراز
امّا حسین قامت ینی ایلدی دو تا
.
قانیله اولدی تربتی مَشک عبير ناب
ایندی فرات سَمت ینی بیر کشورِ ختا
.
آیا اوجالماز اهلِ حرم ناله سی گوگه
عبّاس قولّاری دوشه تندن علم یاتا
.
#شأنی بوسَخت قافیه فکرون يورار یقّین
نطقِ کلام اولماسا عبّاسی دن عطا
.
مأيوس اولوب حیاتدن عبّاس الغرض
رأيين خيامه گتمه ماقا ایلدی عوض
.
بو حینده روایتِ مقتل لره بنا
وئردی حَیاسیز حَرمله بیر تیر آنّنا
.
ال اولمادی چخات سون اوخی سجده گاهدن
دل فکر ایدنده حالینی یارب دونر قانا
.
واضح دیماق خلافِ ادب دور او بیر اوخی
نه نوع خارج ایلدی اهلی گرک قانا
.
لازمدی باش آچقّ لیقّنی باش آچیقّ دییَم
تا باش آچوب باشا ورا زَهرا يانا يانا
.
الده عمود دلده شمادت تله سرزنش
گَلدی او دم قباقينه بير زادۀ زنا
.
قويدى الين بلينه حسین خیمه گاه ده
تا اولدی گرز، تارکِ عبّاسه آشنا
.
آلتی آیدی #شأنی، بو مرضه مُبتلا اولوب
هر شام حقّه یالوارور، هر صبح ایدر ثنا
.
بو بیر مرض دی بولمور علاجين طبيب لر
قلبیم سنوب دوادن، اُمیدیم قالوب اونا
.
عبّاس آقا اَماندی سنیق گوگلومی بیر آل
اولماز رضا خدا که سنون خاطرون سِينا
.
غربت مریض خانه ده یوخ آشنا منه
نه ایل قبیله نه باجی نه مهربان آنا
.
.
#عباسیه_شهادت
#تا_نقش_اولوندی_لوح_جهانه_خط_وفا
#شانی_تبریزی
#ترکی
.
.
✍️ زبدة الاشعار ✍️
.
🆔: @nohe_torki
نظر دهید