تشنه لب سرداریمی ئولدوردوز ای لشکر بو گون #عباسیه_غمناک_تبریزی

زبانحال امام (ع) با لشگر کوفه
در شهادت حضرت ابوالفضل (ع)
..
..
..
..
مرحوم غمناک تبریزی
..
..
..
..
تشنه لب سرداریمی ئولدوردوز ای لشکر بوگون
ظلمیله پوزدوز نظام نظمیمی یکسر بوگون
..
..
..
..
برهم ایتدوز تخت و تاج عزت شاهانه می
اود ووروب یاندوردوز آخر بو دل ویرانه می
ایله دوز ویرانه ملک کشور کاشانه می
نه قشون قویدوز نه لشگر نه منه یاور بوگون
..
..
..
..
ظلمیله عبّاسیمون قولّارینی ایتدوز قلم
لشکریم سیندی داغیلدی شوکتیم یاتدى علم
قالموشام یالقوز آلوبسوز اوستومی سیز دم به دم
قتلیمه یکسر چکوبسوز نیزه و خنجر بوگون
..
..
..
..
آز منه بو عرصۀ میدانی ایندی تنگ ایدون
بیر بیره بیله دگوبسوز بیرجه عار و ننگ ایدون
یالقوزام باری گلون تک تک منیله جنگ ایدون
تا سچلسون مرد و یا نامرد و یا دختر بوگون
..
..
..
..
قدرتیم واردور سیزی بالمرّه تار و مار ایدم
صفحه ی ایجاددن دنیا یوزینی تار ایدم
مطلبیم اما بودور جانیمی بذل یار ایدم
دیلده وار شوق لقای حضرت داور بوگون
..
..
..
..
نیلورم آب فراتی اولسا گر شکّر کیمی
گیتدی قارداشوم الیمدن نوجوان اکبر کیمی
اللریم دوتماز گورون بیر اول کسیک اللر کیمی
طاقتیم قالماز دوشنده یاده اول اگر بوگون
..
..
..
..
نه دیزیمده واردی طاقت غصّه دن نه گوز گورور
اود دوتوب جسمیم دولانماقدان بو جانیم اود ویرور
ایچمرم سو اولسا چونکه سو یرینه قان یرور
تشنه لب جان ویردی چون عباس نام آور بوگون
..
..
..
..
خیمه گاهی چولقیوب یکسر سکینه ناله سی
دوتمیش ایندی صفحه ی آفاقی قارداش وای سسی
زینب و کلثوم بالله گوزلوری من بی کسی
گیتسم عباسین اولار مندن یقین ایستر بوگون
..
..
..
..
ئولدى عباسیم داخی چارم کسیلدی لا کلام
زینب و کلثوم اولولّار دستگیر اهل شام
استراحت اهل بیت اطهره اولدی حرام
یاتمیان گوزلر یاتار یاتماز یاتان گوزلر بوگون
..
..
..
..
ایندیکه عبّاسمیون قولّارینی ایتدوز قلم
منده وورام قبّه ی افلاکه آهیله علم
روز و شب «غمناک» اولوب بو محنتی قیلام رقم
تا دولا شرح غم عباسیله دفتر بوگون
..
..
..
#عباسیه #غمناک_تبریزی #عباسیه_شهادت #ترکی #زبدةالاشعار